ԲՀԿ-ն նախաձեռնում է միասնական շտաբ-2

ԲՀԿ-ն նախաձեռնում է միասնական շտաբ-2
Երեւանի ավագանու ընտրությունները ԲՀԿ-ին կրկին առիթ են տվել ժողովրդի խնդիրների մասին բարձրաձայնելու, եւ երկու օր է՝ ԲՀԿ-ական ծանր հրետանին ԱԺ ամբիոնից գնդակոծում է Երեւանի քաղաքապետարանը:



 



Քաղաքապետարանի  աշխատակիցների համար  թանկարժեք գործուղումների, ծառայողական շքեղ մեքենաների եւ նման բաների համար նախատեսված ծախսերի մասին  քննադատությունների պատասխանը չուշացավ: «Հռետորաբանության փոխարեն, անհասկանալի հարցերը մինչեւ բարձրաձայնելը կարող է  ճշտել  Երեւանի ավագանու ԲՀԿ խմբակցության անդամների հետ, որոնք առավել արհեստավարժ են եւ պատշաճ տիրապետում են բարձրացված հարցերի բովանդակությանը, ինչպես նաեւ  կողմ են քվեարկում դրանց»,- ԲՀԿ մամլո խոսնակ Տիգրան Ուրիխանյանի քննադատություններին ի պատասխան արձագանքեց Երեւանի քաղաքապետարանը: Նշենք, որ ԱԺ-ում Տիգրան Ուրիխանյանը հանդես է եկել հայտարարությամբ, որտեղ նշել է, որ մինչ երեւանցիների համար որեւէ բան չկա կամ էլ կա, բայց շատ թանկ է, Երեւանի քաղաքապետարանի պաշտոնյաների համար կան ծառայողական մեքենաներ, շքեղ գործուղումներ: «Օրինակ, կա 81 միլիոն 760 հազար դրամի չափով նախատեսված ծախս` 2012 թվականի գործուղումների համար»,- ասել է պատգամավորը:



 



Ուրիխանյանը նշել է, որ 73 միլիոն դրամ ծախսվել է դրոշների տեղադրման համար, ու համեմատական կարգով նշել, որ  նույնքան գումար էլ վերելակների վերանորոգման համար էր տեղադրվել: Նա հեգնել է, որ այս խնդիրներին զուգահեռ կան այնպիսի կարեւորագույնները, ինչպիսիք են, ասենք, Վոլոչկովան եւ այլն: Փաստն այն է, որ այդ շռայլ ծախսերը վավերացրել են նաեւ Երեւանի ավագանու ԲՀԿ խմբակցության ներկայացուցիչները: Ուստի Տիգրան Ուրիխանյանից հետաքրքրվեցինք՝ ԲՀԿ-ն մի կողմից   իշխանությանը քննադատում է, բայց մյուս կողմից կատարում է ՀՀԿ-ի հրամա՞նը:



 



- ԲՀԿ-ն հայտարարել էր, որ բաց է քննարկման եւ միասնական ճակատով ընտրություններին մասնակցելուն, բայց այդ միավորումը պետք է լինի բացառապես իր առանցքի շուրջ:



 



- Մենք չէինք հայտարարել, որ պիտի լինի, այլ առաջարկել էինք, հաշվի առնելով ԲՀԿ հնարավորությունները, մեկնարկային պոտենցիալը, հզոր մարդկային ռեսուրսը եւ զանգվածի զորակցությունը, աջակցությունը:



 



- Նման միավորում չեղավ: Քաղաքական ուժերն ինչո՞ւ չվստահեցին ԲՀԿ-ին:



 



- Մենք ենք, որ ունակ ենք փոխելու իրադրությունը, մենք ենք, որ կարող ենք կանխել թալանը, ժողովրդի հանդեպ գրպանահատությունը, ամբողջ հայ ազգի մայրաքաղաքը, Հայաստանի սիրտը ոչ միայն ազատագրելու, այլեւ այն վերադարձնելու, դարձնելու ավելի հասանելի, գրավչական, մատչելի եւ եկամտաբեր: Եվ հետո՝ քաղաքական ուժերը չեն մեզ ընտրելու, որ չհավատացին, այլ Երեւանի բնակիչները:



 



- Պարոն Ուրիխանյան, մինչ Դուք քննադատում եք քաղաքային իշխանությունների գործունեությունը, հակառակ կողմից պատասխան է հնչում, որ ԲՀԿ-ն էլ անմասն չի մնացել Ձեր կողմից քննադատվող գործընթացներին:



 



- Նախ ուզում եմ ասել, որ իմ կողմից հնչեցված մի քանի դրույթ եւ դրվագ՝ վերաբերող քաղաքապետարանի գործունեությանը, որեւէ ողջամիտ պատասխանի չարժանացան, փոխարենը քաղաքական մեծամասնությունը, քաղաքական մենաշնորհը զավթած ուժի մանր-մունր սպասարկող ներկայացուցիչներ, ինչպես միշտ, նախ անձնական վիրավորանքների դաշտ են անցնում: Ես նորից եմ կրկնում՝ ի՞նչ իրավունքով է այս ծանրագույն իրավիճակում գտնվող ժողովրդի մայրաքաղաքի ադմինիստրացիան իրեն իրավունք վերապահում նախատեսել ծախսելու այդպիսի գումար արտասահմանյան շրջագայությունների համար, դրանից ի՞նչ են ստանում երեւանցիները, կամ ինչ հիմունքներով է 210,5 մլն դրամ  նվիրատվության հիմունքով տրամադրվել ինչ-ինչ անհայտ, չգիտես ում հասարակական կազմակերպությունների, երբ Երեւանում բազում անապահով ընտանիքներ կան, ամեն օր տասնյակ մեքենաներ են ջարդուխուրդ լինում Երեւանի խայտառակ երթեւեկելի փողոցներում:



 



Կամ՝ խոսվում է նոր պուրակների բացման մասին եւ Շենգավիթ համայնքում ներկայացվում մի պուրակ, որը շենգավիթցիների հիշողության մեջ է առնվազն 40 տարի: Նման անհեթեթությունները շատ են, բայց զարմանալի է, երբ կոնկրետ քննադատություն է հնչում, լսում ենք միայն անձնական վիրավորանք: ՀՀԿ խորհրդի անդամ Մելիքյան Գագիկն ինձ մեղադրում է, որ ես չեմ գնահատում Վոլոչկովայի գեղեցկությունը: Հիշեցնեմ Գագիկ Մելիքյանին, որ ես քննադատում էի ոչ թե Վոլոչկովային, այլ Տարոն Մարգարյանին, եթե Գագիկ Մելիքյանը չի կարողանում այդ երկու անձանց իրարից տարբերել, ապա կոչ եմ անում նորից ուսումնասիրել դպրոցական կենսաբանության դասագրքերը:



 



- Չպատասխանեցիք ավագանու ԲՀԿ խմբակցության գործունեության մասին հարցին:



 



- Հենց դրա համար էլ ավագանու կազմը 90 տոկոսով փոխվում է, իրենք էլ դրա համար հաշվետու են լինելու կուսակցության առջեւ՝ եւ իրենց արածի եւ իրենց չարածի համար: Եվ բոլոր նրանք, ովքեր ԲՀԿ պատգամավորներին փորձում են մատնանշել ԲՀԿ-ական ավագանու անդամների գործունեությունը, թող հաշվի առնեն մի հանգամանք, որ, ի տարբերություն իրենց, մեր կուսակցության մեջ գործ անողը ստանում է գնահատական, չանողը՝ բացասական գնահատական:



 



- Իսկ երաշխիքներ է՞լ եք տալու, որ նորընտիր ԲՀԿ ավագանին չի կատարելու ՀՀԿ-ի պատվերը:



 



- Ես չգիտեմ ում պատվերներն են ովքեր կատարում, ես ձեզ ասացի մեր ավագանու մասին եւ, առհասարակ, արդյունավետ եւ անարդյունավետ գործունեության մասին:



 



- Ի դեպ, ավագանու ընտրությունների պաշտոնական քարոզարշավի մեկնարկը ապրիլի 7-ից է, բայց դուք այսօր, օրենքը խախտելով, հակաքարոզչությամբ եք զբաղված:



 



- Կներեք, բայց ես պետական աշխատավարձ եմ ստանում եւ որպես ԱԺ պատգամավոր՝ պարտավոր եմ վերահսկել բոլոր պետական կառույցների գործունեությունը իմ խղճի, ժողովրդի պահանջների թելադրանքով: Եվ յուրաքանչյուր պետական կառույց սահմանադրորեն վերապահված է հաշվետու լինել ինձ եւ իմ մյուս գործընկերներին: Այնպես որ, քարոզչություն եւ հակաքարոզչություն թողնենք մի կողմ:



 



- Վերջապես հստակ գնահատական կարո՞ղ եք տալ նախագահական ընտրություններին, որպեսզի հասկանանք, թե ինչ ակնկալիքներով եք մասնակցում ավագանու ընտրություններին:



 



- Մենք ընտրություններին գնահատական չենք տվել, որպեսզի մարդիկ իրենք տան գնահատական ու չշահարկեն ԲՀԿ-ի որեւէ արտահայտություն: Այո, մեզ պետք է, որպեսզի ժողովուրդը շատ պարզ հասկանա ու գիտակցի ու կանգնի բոլոր այդ երեւույթների դեմ: Ու այդ ժամանակ մենք պատրաստ ենք ձեռք-ձեռքի տված՝ դուրս գալ բոլոր հարթակներ եւ առաջնորդել ժողովրդին դեպի հաղթանակ:



 



- Լավ, իսկ ի՞նչ միջոցներով եք պայքարելու ընտրակեղծարարությունների դեմ:



 



- Վստահված անձինք, հանձնաժողովներում ներկայացված կուսակցության անդամներ, ներկայացուցիչներ, դիտորդներ, անկախ դիտորդների հետ համագործակցություն, ճիշտ այնպես, ինչպես խորհրդարանական ընտրություններին: Բացի այդ, երեկ հնչեցրել ենք միասնական շտաբ ձեւավորելու կոչ բոլոր այն քաղաքական ուժերի հետ, որոնք ցանկություն ունեն վերահսկելու ընտրությունները: Այդ ժամանակ ահռելի մի զանգված հնարավորություն կունենա դուրս գալ ընտրատեղամասեր: Խորհրդարանական ընտրությունների ժամանակ չկար ձեւավորված ընդհանուր մեխանիզմ, ըստ որի պիտի ուղղորդվեն ու մի կարգով աշխատեն բոլոր ուժերի վստահված անձինք: Հիմա դրան պետք է հասնել:



 



ՀԳ - Երեկ ՀԱԿ խմբակցության քարտուղար Արամ Մանուկյանը դրական արտահայտվեց միասնական շտաբ-2 ձեւավորելու գաղափարին, նշեց նաեւ, որ ՀԱԿ երիտթեւը, որը կմասնակցի ավագանու ընտրություններին, հավանաբար դրական կարձագանքի դրան: Խորհրդարանական ընտրությունների ժամանակ նման շտաբի գոյությունը չարդարացրեց իրեն, եւ շտաբի անդամ ԲՀԿ-ն էլ կեղծիքների դիմեց,-հարցրինք մենք: «Արդարացրեց, արդարացրեց, գուցե մասնակի, բայց արդարացրեց»,- հակադարձեց Մանուկյանը: