ՀՀ արտգործնախարարը՝ Կուբայում

Ուրբաթ՝ հունվարի 10-ին, Հայաստանի արտգործնախարար Էդվարդ Նալբանդյանը այցելել է Կուբա, փոխանցում է արտգործնախարարության տեղեկատվության վարչությունը։

Մայրաքաղաք Հավանայում Հայաստանի արտգործնախարարին ընդունել է Կուբայի նախարարների խորհրդի փոխնախագահ Ռիկարդո Կաբրիսա Ռուիզը, ով նշել է, որ Կուբայում ամենայն ջերմությամբ են վերաբերվում Հայաստանին և վստահություն հայտնել, որ առավել քան տաս տարվա ընդմիջումից հետո առաջին բարձրաստիճան այցելությունը նոր թափ կհաղորդի ինչպես երկկողմ հարաբերություններին, այնպես էլ բազմակողմ ձևաչափով համագործակցությանը։

Նալբանդյանն իր հերթին ընդգծել է, որ իր այցելությունը միտված է ամրապնդելու Կուբայի հետ հաստատված բարեկամական հարաբերությունները, բացահայտելու փոխգործակցության նոր ուղիներ։