Եթե էսօր հրեշտակներ իջնեն վերևից, մենք կզիջենք մեր իշխանությունը

Հարցազրույզ ԱԺ ՀՀԿ-ական պատգամավոր Լեռնիկ Ալեքսանյանի հետ

- Պարոն Ալեքսանյան, փաստորեն, ՀՀԿ-ն մտադիր է պատերազմ հայտարարել իրեն քննադատողներին, Դուք ի՞նչ զգացողություններ ունեցաք Սերժ Սարգսյանի հայտնի ելույթից հետո:

- Նախ ես կարծում եմ, որ մեր կողմից պատերազմ չի հայտարարվել, մենք ընդամենը պատասխանել ենք քաղաքական իրավիճակից ելնելով: Ելույթը եւ վերաբերմունքը նույնիսկ ուշացած էին, սկսած այն ժամանակվանից, որ ՀՀԿ-ԲՀԿ կոալիցիան քանդվեց, այլընտրանքային «Բարգավաճը» ՀՀԿ-ի հասցեին քննադատություններ ու վարկաբեկիչ բաներ էր տարածում: Դա իր զարգացումն ստացավ, եւ ՀՀԿ-ականներն իրոք դիմում էին նախագահին, ասում էին՝ նույնիսկ արմատական ընդդիմադիրներն այդ բառապաշարով մեզ չեն քննադատում, անձնական, վարկաբեկիչ: Ու իրոք, նախագահը բանով էր մոտենում, որ պետք չի նույնատիպ պատասխաններ, որպեսզի ցնցումներ չառաջանան, որովհետեւ քաղաքական երկրորդ ուժն է, կոնսոլիդացնելու, միասնական պահելու հարցում: Մեկ-երկու-երեք… Եթե նկատեք, ՀՀ նախագահն այդ ոճով որեւէ մեկին չի պատասխանել, զսպվածության կոչ եւ այլն եղել են, բայց ոչ անձնական վիրավորանքներ:

- Այսինքն, այս դեպքում վախ կա՞ ԲՀԿ-ից:

- Ես կասեմ, որ այդ ելույթն ավելի շատ ուղղված էր հասարակությանը, իսկ քաղաքական կողմն այն է, որ այսօր, երբ կան արտաքին մարտահրավերներ եւ տնտեսական խնդիրներ՝ սկսած շրջանառության հարկից, ժողովուրդն իրոք, շերտ-շերտ, ամեն մեկն իր շահերից ելնելով՝ դժգոհություններ, ու ԲՀԿ-ն այս պարագայում իրոք անհասկանալի քաղաքականություն էր վարում: Գոնե մեզ հասկանալի չէր հենց «Շրջանառության հարկի մասին» օրենքը, գուցե կային սխալներ, բայց որ դա ուղղված էր փոքր եւ միջին բիզնեսի պաշտպանությանը եւ մեծին ստվերից հանելուն, բայց վերցնել ու ասել, որ դա ճիշտ չի, եւ դա քաղաքականացնել… եթե դա աներ արմատական ընդդիմությունը, ինձ համար հասկանալի կլիներ, դրա համար էլ տեղի ունեցավ այդ նիստը:

- Բայց չէ՞ որ Սերժ Սարգսյանի ելույթն ավելի խոցելի է, եւ քաղաքական դաշտը մաքրելու գործընթացը պետք է նախեւառաջ ձեզնից սկսեիք:

- Առաջին հայացքից է թվում խոցելի, կրկնում եմ՝ դա ուղերձ էր ավելի շատ հասարակությանը, այն ուժը, որն այսօր քննադատում է մի բան, գոնե ինքը պետք է դրա բարոյական իրավունքն ունենա:

- Դուք իսկապե՞ս կարծում եք, թե ՀՀԿ-ի կենսագրությունն այնքան անբասիր է, որ կարող եք ձեզ նման բան թույլ տալ:

- ՀՀԿ-ում էլ կան նման մարդիկ, բայց նրանք հայտ չեն ներկայացնում երկիր ղեկավարելու, հայտ չեն ներկայացնում հեղափոխության:

- Այդ մարդիկ մեր կյանքն են ինչ-որ առումներով տնօրինում, ընդունում օրենքներ…

- Էդ որ իրենք անվանական վարկաբեկիչ խոսքեր են ասում ՀՀ նախագահի նկատմամբ, մեր կուսակցության նկատմամբ, դա ընդունելի՞ ա, իհարկե ոչ:

- Փաստորեն, վերադարձել ենք 37 թիվ, ու իշխանությունը չի հանդուրժում ոչ մի քննադատություն:

- Իսկ ո՞վ ասեց չենք հանդուրժելու, քննադատությունն ամիսներ շարունակ է եղել, հանրահավաքներ ա եղել, եթե չհանդուրժեինք, հանրահավաքների ժամանակ հայհոյանքներ են հնչել ՀՀ նախագահի հասցեին: Բայց հիմա խնդիրն այն է, որ իրոք պետության անվտանգության հետ կապված խնդիրներ կան, նույնիսկ արմատական ընդդիմությունն անհնազանդության կոչեր չի արել: Եվ էս պահին գրգռել հասարակությանը հեղափոխության պահերով... Թե չէ, դուք լսե՞լ եք, որ նախագահն իր ընդդիմադիրների մասին նման վիրավորական բառեր ասի:

- Իսկ «դատարկ դհոլ» ո՞ւմ էր ասում, որը հիմա հանգրվանել է ձեր շարքերում:

- «Դատարկ դհոլը» դա անվանարկում չի, հայհոյանք չի... Դուք ասում եք նաեւ՝ թող մեզնից սկսեն, ես պիտի ասեմ, այո, 1990-ականներից սխալ է տեղի ունեցել, այս բեւեռացումը ես սխալ եմ համարում, այդ ֆեոդալացումը:

- Հետեւաբար ճի՞շտ չի լինի նախ պայքարել ձեր կուսակցության «մարտնչող տգետների», հետո նոր մյուսների դեմ:

- Մեզանից մենք վաղուց ենք սկսել, օրինակ, շատ մարդիկ այսօր քաղաքականությունից հեռացել են ու աստիճանաբար հեռանում են: Չե՞ք տեսնում, որ այդ անունները շատ են քչացել, վաղն էլ ավելի քիչ կլինեն: Եվ պատգամավոր լինելը դեռ մեծ քաղաքականության հայտ չէ: Օրինակ՝ անուն եմ տալիս, Գրիգորյան Մանվելի մասին ինչ ասես չեն ասում, որն էդքան էլ պարտավոր չի, որ շատ գրագետ լինի: Ինքը ոչ էլ քաղաքական հայտ է ներկայացնում, ժամանակի ընթացքում ինքը կռվել է, ու էսօր վարկաբեկել նրա, մյուսի անունը, ճիշտ չէ:

- Դուք օրենսդիր մարմնում մեծամասնություն եք:

- Կարող է Գրիգորյան Մանվելը գրագիտություն չունենա, բայց, իմ խորին համոզմամբ, մեկ-երկու դեպք է եղել, որ կանխել է քաղաքացիական պատերազմ: Այնպես որ, մեծ գրագիտություն պետք չի ունենալ, որ հասկանալ՝ ցնցումների համար մեկը մեկին վարկաբեկել, հատկապես միջազգային օղակներում, չի կարելի:

- Պարոն Ալեքսանյան, չե՞ք կարծում, որ ԲՀԿ-ականների նկատմամբ ռեպրեսիվ գործողություններով դուք ավելի շուտ եք երկիրը ցնցումների հասցնելու:

- Բա հո ձեռքերներս ծալած չե՞նք նստելու, որ ստեղ մեյդաններ (մայդաններ՝ հեղ.) սարքեն, ցույցեր անեն, երբեմն անմեղ դժգոհություններ: Էսօր բոլոր դեպքերում ժողովրդավարությունը մի քայլ առաջ ա, քաղաքացիական հասարակության ծիլերը երեւում ա, որոնք առանց իշխանությունների, առանց ընդդիմության դժգոհություն են հայտնում, խնդիրներ լուծում: Եվ էսօր դրանց ամբողջին միավորեն հանուն իշխանափոխության, ես դա սխալ եմ համարում: Իսկ իշխանությունները պարտավոր են էդ ցնցումները կանխարգելեն:

- Ընդդիմությունն առաջարկում է հեռանալ իշխանությունից, գնացեք, ու ցնցումներ էլ չեն լինի, եթե այդքան մտահոգ եք պետության անվտանգության համար:

- Հիմա ես վիրավորվում եմ, դուք նայեք՝ ՀՀԿ-ի կազմը հենց խորհրդարանում, էն հին ՀՀԿ-ականները, ովքեր 90-ականներից իշխանություն ունեն, տեսեք՝ նրա՞նք են օլիգարխը, եւ ուսումնասիրեք նաեւ մնացած կուսակցությունները: ԲՀԿ-ն իրա որակներով եթե չասեմ վատն ա, լավը չի կարա լինի մեզնից:

- ՀՀԿ-ի կորիզից, օրինակ, Գալուստ Սահակյանը հայտնի է «հանճարեղ» արտահայտություններով, իսկ Հովիկ Աբրահամյանն էլ հայտարարում է, թե քաղաքականությամբ զբաղվելու համար խելք պետք չէ:

- Հովիկ Աբրահամյանը լրիվ ուրիշ ենթատեքստով է ասել, կոնտեքստից կտրում եւ բերում ինձ բան եք անում: Քաղաքականությամբ զբաղվելու համար փորձ է պետք, խելք է պետք:
Եթե էսօր հրեշտակներ իջնեն վերեւից, մենք կզիջենք մեր իշխանությունը, բայց մենք տեսնում ենք, ով ուզում է իշխանության գալ, մեզնից լավը չի, եթե չասեմ՝ վատն է: Իսկ ո՞ւմ զիջենք էս դեպքում, մարդկանց, որ նույն բա՞նն անեն: Եթե իրենք ունեն փայտիկ, բանաձեւ, ֆորմուլա կամ ծրագրային փաստաթուղթ, որ կարող են կամ ուզում են անել, ու մենք չենք աջակցում իրանց, ու պիտի գան իշխանության, որ անեն, էն ժամանակ գուցե հասկանամ, բայց իրենք չունեն: Էն ուժը, որը ծնվել է էս իշխանություններում, նրանց հետ ճանապարհ է գնացել, որի անցած ուղին ավելի լավը չէ, քան իշխանության… Նայեք ինչ է ստացվում, այն լավ բաները, որ պատերազմ ենք հաղթել, բանակ ստեղծել, երբեք չկա մեր անունը, որ Սերժ Սարգսյանն է դրան նպաստել, ՀՀԿ-ն որեւէ բան չի արել, ամագ չունի՝ Նավասարդյանից սկսած, Անդրանիկ Մարգարյան, այսքանը մի կողմ ենք դնում ու այս ամբողջ կեղտը բերում-բարդում ենք ՀՀԿ-ի վրա, այն դեպքում, երբ իրենք էլ են դրա մեջ եղել: Էսօր բերել, քավության նոխազ դարձնել մեզ, ասել՝ դուք վատն եք, մենք լավը, ճիշտ է, մեր մեջ էլ օլիգարխներ կան, բայց գոնե երկիրը ղեկավարելու, իրենց հրեշտակի տեղ դնելու հայտ չեն ներկայացրել: