Գումարները տվել են, բայց 120 նաիրիտցիներ դեռ դժգոհ են
Նաիրիտցիների վերջին գումարները երեկ տվեցին, ինչի համար նրանք շնորհակալ են հայրենի կառավարությանը։ Բայց անորոշ է մոտ 120 քաղաքացու հարցը։ Նրանք ավելի վաղ դատական կարգով էին պահանջել և ստացել իրենց աշխատավարերը և չվճարված աշխատավարձերի տուգանքները։ Տուգանքներից հրաժարվելու պարտավորագիր նրանք, մյուսների նման չէին ստորագրել, և հիմա չեն կարողանում հետ ստանալ դատական ակտերով սահմանված գումարները։ «Նաիրիտի» նախկին աշխատակից Թամար Միրազիզյանը նրանցից մեկն է։ Դատարանը սահմանել է հոգուտ նրա 400 հազար դրամ բռնագանձել «Նաիրիտ» գործարանից, որպես չվճարված աշխատավարձի տուգանք, որը սակայն նա, ինչպես և մյուս քաղաքացիները, չի ստացել։ Այս կատարողականը գտնվում է ԴԱՀԿ-ում։ «ԴԱՀԿ-ում ինձ պատասխանում են, որ այդ պարտքը պետք է ուզենք «Նաիրիտ գործարան» ՓԲԸ-ից, որովհետև ՀԷՑ-ը վարույթ է հարուցել Նաիրիտ գործարան ՓԲԸ-ի դեմ սնանկ ճանաչելու պահանջով։ Իսկ մյուսների աշխատավարձը վճարել է «Նաիրիտ»-երկուսը, և մենք այդ գումարի հետ գործ չունենք։ Բայց որքան կտևի սնանկության վերաբերյալ վարույթը, ով է վճարելու մեր գումրաները և երբ, հայտնի չէ»։ Այժմ այս 120 քաղաքացիներն են որոշել գնալ կառավարության շենքի մոտ և պահանջել իրենց գումարները, քանի որ արդեն համոզվել են, որ միայն այս ճանապարհով կարող են պարզույթուն մտցնել իրենց հարցերում։
Կարծիքներ