Ես լուրջ չեմ ընդունում, բայց ԱԱԾ-ն երեւի լուրջ է ընդունել

ԱԺ նախագահ Գալուստ Սահակյանի կարծիքով՝ պետք չէ Զարուհի Փոստանջյանի հայտարարություններին լուրջ վերաբերվել, բայցեւ կարծում է, որ ԱԱԾ-ն իր լիազորությունների շրջանակում է գործել՝ տարածելով Փոստանջյանի վերաբերյալ «նախազգուշական» հայտարարություն։ Նա նաեւ կարծում է, որ ամեն քաղաքական գործչի արած հայտարարություն չէ, որ քաղաքական հայտարարություն է։ Թեպետ «Ժառանգություն» խմբակցության միակ «ժառանգական» եւ թունդ ընդդիմադիր պատգամավորի ելույթներում նա որեւէ վտանգ եւ մտահոգվելու առիթ չի տեսնում։ Մյուս կողմից էլ՝ համարում է, որ սխալ է քանդել-ջարդելու կոչերով հանդես գալը, դա սպառնալիք է ազգային անվտանգությանը։ Հիշեցնենք, որ Փոստանջյանը կոչ էր արել քանդել ԱԱԾ-ն, որպես НКВД-ի իրավահաջորդ։ «Ես չեմ կարծում, թե դա մեծ քննարկելի կամ էդպես արտառոց երեւույթ է, առավել եւս պատգամավորի, քաղաքական գործչի՝ տվյալ դեպքում անձեռնմխելիության եւ ԱԱԾ-ի հայտարարությունների մեջ երբեք հակասություններ չկան, քանի որ լիազոր մարմինն ինքն է որոշում իր գործելակերպը, իսկ որոշակիորեն պատգամավորի նկատմամբ վերաբերմունքի դրսեւորումը, միեւնույն է, վերջում Ազգային ժողովն է տալիս։ Համենայնդեպս, մենք ԱԱԾ-ից ոչ մի նամակ չենք ստացել, ոչ մի առաջարկ չենք ստացել»,-մեզ հետ զրույցում երեկ ասաց Գալուստ Սահակյանը, ով մասնակցում էր էներգետիկայի նախկին նախարար Արմեն Մովսիսյանի հոգեհանգստին։

- Որպես խորհրդարանի ղեկավար՝ Ձեզ համար ընդունելի՞ է, որ Ձեր ղեկավարած մարմնի անդամի նկատմամբ ԱԱԾ-ն նման նախազգուշացնող հայտարարություն է տարածում։

- Նախեւառաջ, ես ավելի շատ ուշադրություն եմ դարձնում բարեկիրթ խոսքին, ես ինքս էլ Զարուհու հետ շատ եմ խոսել, նույն քննադատությունը կարելի է անել ոչ թե անձնավորված, ոչ թե էսպես մարդու կամ անձանց դարձնելով թիրախ անհատական վերաբերմունքով, այլ քննադատությունը կարելի է քննադատել… Իհարկե, ես չէի ուզենա, որ պատգամավորն այդ վիճակում հայտնվեր, համենայնդեպս, պատգամավորը պիտի առաջինը էթիկայի կանոնները պահպանի։

- Բայց Փոստանջյանի կողմից քաղաքական հայտարարություն է եղել, եւ, որքանով հասկացանք, այնպես չէր, որ ինչ-որ բան քանդելու, ջարդելու կոչ էր՝ բուն իմաստով։

- Հակասահմանադրական հայ­տարարությունները քաղաքական չեն լինում, եւ եթե քաղաքական գործիչն է խոսում, դա չի նշանակում, որ նրա բոլոր հայտարարությունները քաղաքական են։ Շատ անձնատիպ, անձնական, ագրեսիվ եւ զրպարտող, բացի դրանից՝ նաեւ կառույցներ քանդող…

- Դուք իսկապես վստա՞հ եք նրա հայտարարությունից, որ նա ցանկանում է որեւէ կառույց քանդել՝ ֆիզիկական իմաստով։

- Ոչ թե վստահ լինելու կամ անվստահության բան էր, ես կարծում եմ՝ յուրաքանչյուր քաղաքական գործիչ իր ուժերի ներածի չափով պիտի նաեւ արտաբերումներ կատարի, խոսք ասի։ Բնականաբար, ինչ էլ հայտարարի Զարուհին, որեւէ մեկը չի հավատում, որ Զարուհին ինչ-որ մի բան կքանդի։ Բայց երբ կոչ է անում, ոտքի է կանգնեցնում մյուսներին, էստեղ, իհարկե, խնդիր կա։ Համենայնդեպս, այդ հայտարարությունը, չեմ կարծում, իր հետեւանքներն ունի այս պահին, պարզապես կարծում եմ՝ դա նաեւ խնդիր է, որ պետք է մարդիկ զուսպ պահեն իրենց։ Չի կարելի պետության հիմքերին խփել, ինչ-որ անձնային նկատառումներով կոչեր անել։

- Սա խոսքի ազատության սահմանափակում չէ՞ ԱԱԾ-ի կողմից։

- Խոսքի ազատությունը եւ մարդու իրավունքներն այնքանով են սահմանափակվում, երբ որեւէ մեկի իրավունքները չեն սահմանափակվում իր գործունեությամբ։

- Հիմա ԱԱԾ-ի ո՞ր իրավունքը սահմանափակվեց նրա ելույթներով, կամ ո՞ր մասնաշենքը քանդվեց։

- ԱԱԾ-ն այդ կոչը դիտարկում է ազգային անվտանգության խնդիր եւ շատ ճիշտ էլ իր դրսեւորումն իրականացնում է։ Պարզապես, ես խնդիրը տեսնում եմ հետեւյալում, որ այն գործողությունները, որը կարող է վերաբերել պատգամավորին, անմիջապես որեւէ լիազոր մարմին չի կարող իրականացնել։

- Իսկ իշխանափոխության կոչերը նո՞ւյնպես ազգային անվտանգությանն ուղղված սպառնալիք են։

- Նայած այդ իշխանափոխության կոչերն ինչ բովանդակություն ունեն։ Իհարկե, կարելի է ասել, որ այս իշխանությունները վատն են, պիտի փոխվեն, պիտի ժողովուրդը ոտքի կանգնի, բայց երբ ասում են՝ սպանենք, կոտորենք, դավաճաններ են, չգիտեմ ինչեր են, էստեղ արդեն… իհարկե, ես դա լուրջ չեմ ընդունում, որովհետեւ Զարուհուն ճանաչում եմ, բայց անվտանգությունը երեւի լուրջ է ընդունել։

- Այսինքն՝ պե՞տք չէր լուրջ ընդունել։

- Նու, չեմ ուզում դա վերլուծել, համենայնդեպս, հանգամանքն այնպիսին չէ, որ էսպես հասարակական քննարկման իրավիճակի հասցնեն։

- Հնարավո՞ր է հորդորեք ԱԱԾ-ի Ձեր գործընկերներին, որ պետք չէ լուրջ ընդունել նրա հայտարարությունները եւ չարժե նման գեղարվեստական ոճով, պատկերավոր ու սպառնալից արձագանքել նրա ելույթներին։

- Չէ, ես կողմնակից եմ, որ պիտի համապատասխան լիազոր մարմինը շատ լուրջ ընդունի, այ, մնացած բոլոր խնդիրներն ավելի շատ կապված են Ազգային ժողովի հետ, քան որեւէ լիազոր մարմնի։

Վահե ՄԱԿԱՐՅԱՆ