Իջևանի նախկին քաղաքապետին վարկաբեկող տեանյութերը համացանցից հեռացրել են
Իջևանի նախկին քաղաքապետ Վարուժան Ներսիսյանին դեռ չի հաջողվել պարզել, թե ովքեր են իրեն վարկաբեկող տեսանյութերի տարածման հեղինակաները։ Ներսիսյանը Hraparak.am-ի հետ զրույցում կարծիք հայտնեց, որ տեսանյութերը համացանցից հեռացրել են։ «Այլևս հույս չունեմ, որ կբացահայտվի, թե այդ տեսանյութերի հեղինակներն ովքեր են եղել, տեսանյութերը հանված են, այժմ անհնար է պարզել, թե ով է այդ ամենի հեղինակը»,-ասաց նախկին քաղաքապետը։
Հիշեցնենք, որ Իջեւանում, երբ մեկնարկել էր նախընտրական քարոզարշավը, համացանցում անհայտ անձանց կողմից մոնտաժված եւ Ներսիսյանին վարկաբեկող բովանդակությամբ տեսանյութեր էին տարածվում: Դեռեւս նախորդ ընտրություններում համացանցում մեկ-երկու նման տեսանյութեր էին տարածվել, սակայն այս ընտրությունների նախապատրաստական շրջանում դրանց թիվը բազմապատկվել էր: Սեպտեմբերի 13-ին Իջևանի քաղաքապետի պաշտոնի համար առաջադրվել էին երկու հոգի՝ նախկին քաղաքապետ Վարուժան Ներիսյանը և գործող քաղաքապետ Վարդան Ղալումյանը: Ձայների մեծամասնությամբ հաղթող է ճանաչվել Վարդան Ղալումյանը։
Ներսիսյանը վստահ է, որ այդ տեսանյութերը իրենց բացասական ազդեցությունն ունեցան և քաղաքացիները իրեն ձայն չտվեցին։ Ինչ վերաբերում է իր դեմ հարուցված քրեական գործին, որը վերաբերում էր քաղաքապետի պաշտոնը զբաղեցնելու տարիներին պաշտոնական լիազորություններն անցնելուն եւ պաշտոնեական կեղծիքին, նա ասաց հետեւյալը. «Իմ դեմ հարուցված քրեական գործի նախաքննության մասին որեւէ տեղեկություն չունեմ: Ընդամենը քննիչը զանգել է, ես ասել եմ, որ գրավոր գրեք, որպեսզի գամ և ինչպես կարգն է այդ հարցաքննությունը անցկացվի, բայց մինչև հիմա որևէ տեղեկատավություն, գրություն և որևէ այլ ինֆորմացիա չունեմ»։
Կարծիքներ