Պատերազմից հետո Գազայում փլատակների մաքրումը 14 տարի կտևի․ ՄԱԿ
Գազայի հատվածում ռմբակոծություններից ու մարտերի հետևանքով եղած փլատակների մաքրումը կպահանջի առնվազն 14 տարի:Այս մասին հայտնում է Al Jazeera հեռուստաալիքը՝ հղում կատարելով ՄԱԿ-ի հումանիտար հարցերի համակարգման գրասենյակին:
ՄԱԿ-ի գնահատականներով՝ Գազայի հատվածում մարտերը հանգեցրել են շուրջ 37,5 միլիոն տոննա փլատակների գոյացմանն ամբողջ անկլավում։
Դրա մեծ մասը լի է չպայթած ռումբերով և այլ զինամթերքով, իսկ մաքրելու համար կարող է պահանջվել առնվազն 14 տարի: Ամենաշատ տուժած շրջանները գտնվում են Գազայի հյուսիսում, որին հաջորդում են Խան Յունիսը հարավում, Դեյր ալ-Բալահը Գազայի կենտրոնում և Ռաֆահը ամենահարավային անկլավում, որը իսրայելական ուժերը ժամանակին անվանել են «անվտանգ գոտի»:
ՄԱԿ-ի հումանիտար հարցերի համակարգման գրասենյակի վերջին զեկույցում նշվում է նաև, որ Գազայում արագ աճող հոգեկան առողջության ճգնաժամ է։
«Ավելի քան 200 օրվա անողոք բռնությունն ու ավերածությունները ավելի են խորացրել հոգեբանական-սոցիալական կարիքները [Գազայում], հատկապես ավելի քան մեկ միլիոն երեխաների շրջանում, որոնք ՅՈՒՆԻՍԵՖ-ի գնահատմամբ հոգեկան առողջության, հոգեբանական և սոցիալական աջակցության կարիք ունեն», - փաստաթղթից մի հատված մեջբերելով հայտնել է հեռուստաալիքը։
Կարծիքներ