Ով կհաջորդի Քարիմովին, արդյոք սկսվել են գահակալական պայքարն ու ինտրիգները Ուզբեկստանում
![Ով կհաջորդի Քարիմովին, արդյոք սկսվել են գահակալական պայքարն ու ինտրիգները Ուզբեկստանում](https://hraparak.am/uploads/images/fccaeb5dc1462b72794adab5bffa7ef4.jpg)
Հակասական տեղեկությունները Ուզբեկստանի նախագահի ողջ կամ մեռած լինելու հետ կապված մի կողմից, եւ պաշտոնական տեղեկատվության սակավությունը մյուս կողմից բավական լուրջ հիմքեր են տալիս, որ միջինասիական այս երկրում լիովին հնարավոր է սկսվեն ներքին գահակալական կռիվներ եւ ինտրիգներ:
Հիշեցնենք, որ Ուզբեկստանի առաջին եւ միակ նախագահը դեռ օգոստոսի 27-ին, ըստ ունեցած տեղեկությունների՝ ուղեղի կաթված էր ստացել եւ տեղափոխվել հիվանդանոց: Ապա արդեն Քարիմովի դուստրը` Լոլան հայտարարեց պաշտոնապես որ հոր մոտ առկա է ուղեղի արյունազեղում:
Օգոստոսի 29-ին «Ֆերգանա» լրատվական գործակալության հաղորդումից հայտնի դարձավ, որ տեղական ժամանակով կեսօորից անց ժամը երեքին Քարիմովը մահացել է: Պաշտոնական Տաշքենդը հերքեց մահվան լուրը: «Ֆերգանա» գործակալությունը պահանջեց ցուցադրել Քարիմովին կամ հրապարակել վերջինիս բժշկական եզրակացությունը: REGNUM-ն էլ հայտնեց, որ օգոստոսի 29-ին ձերբակալվել է երկրի փոխվարչապետ Ռուստամ Ազիմովը:
Մինչ այս, ռուսական РИА Новости-ն եւ «Ինտերֆաքսը» հանդես եկան Քարիմովի մահվան մասին լուրերի հերքմամբ՝ հայտարարելով, որ Քարիմովը չի մահացել, գտնվում է հիվանդանոցում, եւ վիճակը կայուն է, թեեւ՝ ծանր:
Ազիմովը երկրի փոխվարչապետն է 2000 թվականից եւ ղեկավարում է կառավարության տնտեսական բլոկը: Ըստ տեղեկությունների՝ նրան տնային կալանքի տակ են առել: Այս ձերբակալությունը քաղաքագետներին հիմք է տվել մտածելու, որ Տաշքենդում սկսվել են գահակալական կռիվները, քանի որ Ազիմովը համարվում էր Քարիմովի գահաժառանգներից մեկը:
78-ամյա Քարմովը հետխորհրդային տարածքի ամենից երկարակյաց ղեկավարներից է: Վերջինիս իրավահաջորդի կամ գահաժառանգի մասին խոսակցությունները, սակայն վաղուց էին շրջանառվում՝ կապված Քարիմովի առողջական վիճակի վատացման հետ, թեեւ պաշտոնապես չէր հաստատվում, որ զառամյալ նախագահն ունի առողջական խնդիրներ: Կարելի է ասել՝ Քարիմովի հոսպիտալացման լուրը նույնիսկ անակնկալ էր Տաշքենդի համար:
Քարիմովն ունի երեք զավակ` մեկ որդի առաջին ամուսնությունից եւ երկու դուստր ներկայիս կնոջից: Ավագ դուստրը` Գյուլնարան սկսած 2008-ից համարվում էր հոր գահաժառանգը: 2010-2012 թթ վերջինս ներկայացնում էր Ուզբեկստանը Իսպանիայում, սակայն 2013-ին սկսվում են նրա խնդիրները հոր հետ եւ նա հեռացվում է քաղաքականությունից, եւ, ըստ լուրերի, պահվում տնային կալանքի տակ: Այն ժամանակ լուրեր պտտվեցին, թե Գյուլանարան հեղաշրջում էր կազմակերպել, որը բացահայտվել էր:
Գյուլնարայի գահավիժումից հետո որպես գահաժառանգ սկսեց ընկալվել կրտսեր դուստրը` Լոլան: Վերջինս եւս իր քաղաքական կարիերան սկսեց դիվանագիտությամբ: Լոլան հանդիսանում է Ուզբեկստանի մշտական ներկայացուցիչը ՅՈՒՆԷՍԿՕ-ում: 2013-ին հարցազրույց տալով ВВС-ին` վերջինս հայտարարեց, որ արդեն տասներկու տարի կապ չունի քրոջ` Գյուլանարայի հետ: Հենց Լոլան հայտնեց հոր առողջական վիճակի վատացման եւ հիվանդության մասին:
Հնարավոր գահաժառանգների ցանկը, սակայն, չի սահմանափակվում միայն Քարիմովներով: Որպես հնարավոր իրավահաջորդ նկատվում են նաեւ երկրի ներկայիս վարչապետ Շավկատ Միրզյաեւը եւ Ուզբեկստանի ԱԱԾ ղեկավար Ռուստամ Ինոյատովը: Քաղաքագետները խաղադրույքը կատարում Միրզյաեւի վրա, քանի որ Ինոյատովն արդեն ծեր է` 72 տարեկան եւ ունի առողջական խնդիրներ, մինչդեռ վարչապետն ունի բոլոր հնարավորություններն ու ռեսուրսները իշխանությունը վերցնելու: Ուբեկստանում խոսում են, որ Միրզյաեւն ու Ինոյատովն իրականում գաղտնի դաշնակիցներ են եւ կարող են սկզբի համար իրար մեջ բաժանել Ուզբեկստանի հարստությունները:
Թե ով կկարողանա վերցնել իշխանությունը, ասելը այս պահին բարդ է, սակայն պարզ է, որ պայքարն հանուն իշխանության, կսրվի անպայման:
REGNUM գործակալություն
Թարգմանությունը` Արման Գրիգորյանի
Կարծիքներ