Պատգամավորին բանտ կնստեցնեն՝ երթեւեկության կանոնները խախտելու համար

Մեծ Բրիտանիայում Համայնքների պալատի պատգամավոր Ֆիոնա Օնասանյուին երեք ամիս բանտ կնստի այն բանի համար, որ մեքենայով երթեւեկելիս գերազանցել է թույլատրված արագությունը եւ ստել է իրավապահներին։ Միաժամանակ նաեւ նա հեռացվել է Լեյբորիստների կուսակցությունից, որի կազմում էլ ընտրվել էր որպես պատգամավոր 2017 թվականին։ Այս մասին հայտնում է BBC-ն։ Ըստ հրապարակման, նույն 2017-ի հուլիսին ոստիկանական տեսախցիկները ֆիքսել էին, որ պատգամավոր Օնասանյուի մեքենան ընթանում է 66 կմ/ժ արագությամբ՝ թույլատրված 50 կմ/ժ-ի փոխարեն։ Այն ժամանակ պատգամավորը հայտարարել էր, որ թեեւ մեքենան իրեն է պատկանում, սակայն ղեկին եղել է եղբայրը։ Սրան ի հակառակ, մեղադրող կողմը ապացույցներ էր ներկայացրել, որ պատգամավորը եւ եղել էր ղեկին եւ տեքստային հաղորդագրություններ է փոխանակել ընթանալիս, ինչը արգելված է ճանապարհային երթեւեկության կանոններով։ Այսպիսով, սկսած 1991 թվականից, Օնասանյուն առաջինն է, ով որպես պատգամավոր բանտ կնստի։