15 տարի առաջվա դեպքի պատճառով դատավորին լիազորություններից զրկելն առնվազն անհասկանալի է

Հայաստանի Վետերան դատավորների ՀԿ-ն հայտարարություն է տարածել դատաիրավական համակարգում առկա հրատապ խնդիրների վերաբերյալ:

Հայտարարության մեջ ասված է.

«Վերջին ժամանակներս ՀՀ արդարադատության նախարարության և Բարձրագույն Դատական Խորհրդի կողմից կարգապահական վարույթներով իրականացվող քաղաքականության հետևանքով հանրության մեջ անվստահության մթնոլորտ է ձևավորվում դատական իշխանության անկախության նկատմամբ, որը մտահոգում է ինչպես հանրությանը, այնպես էլ իրավական հանրությանը։

ՀՀ Արդարադատության նախարարությանը և ՀՀ Բարձրագույն Դատական Խորհրդին կոչ ենք անում․

- Տուրք չտալ պատեհապաշտությանը,

- Խստագույնս գործել ՀՀ Սահմանադրությամբ, գործող օրենքներով և այլ իրավական ակտերի պահանջներով, առավելագույնս ապահովելով Դատական իշխանության անկախությունը և ձեռնպահ մնալ ցանկացած միջամտությունից, որը կարող է խաթարել վերջինիս բնականոն գործունեությանը, քանի որ Դատական իշխանության անկախությունը Հայաստանի Հանրապետության որպես  իրավական պետության ստեղծման, զարգացման և հզորացման հիմնասյուներից մեկն է։

-Անհապաղ անհրաժեշտ միջոցներ ձեռնարկել միջազգային կառույցների կողմից  արձանագրված ՀՀ Դատական իշխանության գործունեության ոլորտում  դատարանների և դատավորների անկախությանը խոչնդոտող ամեն տեսակի խախտումները և թերությունները վերացնելու համար։

-Զերծ մնալ ՀՀ Սահմանադրությամբ ամրագրված իշխանությունների բաժանման և հավասարակշռման սկզբունքները ոտնահարելուց»։

Մենք մի քանի հարց են ուղղել Վետերան դատավորների միության նախագահ Գագիկ Սարգսյանին:

- Պարոն Սարգսյան, ինչո՞ւ եք կարծում, որ դատավորներն այսօր անկախ չեն: Փաշինյանը բազմիցս հայտարարել է, որ Հայաստանը ժողովրդավարության բաստիոն է: Եթե Հայաստանը ժողովրդավարության բաստիոն է, ենթադրվում է, որ առաջին հերթին իրավական համակարգը, դատարաններն անկախ են եւ ծառայում են միայն օրենքին:

- Կարգապահական վարույթներն են այդ մասին փաստում, եթե ուշադրություն դարձնեք, ապա ամեն ինչ ակնհայտ երևում է:

- Կոնկրետ ո՞ր գործի շրջանակներում եք եկել այդ եզրակացությանը:

- Տարբեր:

- Փաստաբանները բողոքի ակցիա են իրականացնում: Ի՞նչ կարծիք ունեք այդ մասին: Գուցե դուք և՞ս միանաք այդ ակցիաներին:

- Փաստաբանները գործադուլ են անում, իսկ մենք թոշակառու մարդիկ են: Ի՞նչ իմաստ կունենա մեր մասնակցությունը: Գործադուլն է ակցիայի իմաստը: Կասեն` պարապ մարդիկ են, գնացել, կանգնել են այնտեղ:

- Առաջներում հիշո՞ւմ եք նման դեպքեր, երբ ԲԴԽ-ն նման աննախադեպ քանակի վարույթներ հարուցեր եւ այսքան դատավորների լիազորություններից զրկեր, մանավանդ` կարծիք արտահայտելու համար:

- Ոչ, նման բան չի եղել: Արդարադատության նախարարությունը միշտ էլ միջնորդություններ ներկայացրել է, սակայն դատավորի գործունեությունը դադարեցնելու միջնորդությունը մերժվել է, կամ նկատողություն է արվել ուղղակի, կամ էլ այլ բան, սակայն ոչ լիազորություններից զրկել:

- Իսկ ի՞նչն է պատճաոռը, որ զրկում են դատավորներին լիազորություններից:

- Մանրամասներ չեմ կարող ասել: Սակայն կարող եմ ասել, որ ցանկացած պրոցես առանց քննարկման առաջ են տանում, չկա քննարկում, կարծիքներ չեն արտահայտվում:

- Իրավիճակը փոխելու ելք տեսնո՞ւմ եք:

- Իշխանությունից է կախված, ուրիշ որևէ մեկը չի կարող ինչ-որ բան անել:

- Իսկ փաստաբանների ակցիան ի՞նչ կարող է փոխել:

- Որևէ մեկը չի կարող փոխել որևէ բան, եթե պետությունը չունի փոխվելու ցանկություն:

- Ի՞նչ է ցանկանում պետությունը` դատավորներին իր ձեռքին խաղալի՞ք դարձնել:

- Բոլոր ժամանակներում էլ պետությունը փորձել է դատական իշխանությանը դարձնել իր ձեռքի խաղալիքը: Գրեթե բոլոր երկրներում էլ այդպես է: Եվրոպայում էլ` Լեհաստանում էլ է նույն բանը կատարվում, Իսրայելում ևս: Փորձում են դատական անկախությունը վերացնել: Այսօր Հայաստանում այդ ցանկությունը շատ մեծ է:

- Ինչո՞ւ:

- 15 տարի առաջվա դեպքի պատճառով այսօր դատավորին իր լիազորություններից զրկում են: Սա առնվազն անհասկանալի է: Իշխանությունների ձեռքերն ազատ են այս առումով: Մարդուն չեն կարող պատժել նման հին գործի շրջանակներում: