Հոգնել ենք ամեն անգամ նույն բանը պահանջելուց

«Հրապարակի» զրուցակիցը Երեւանի ավագանու «Ազգային առաջընթաց» խմբակցության անդամ Իզաբելլա Աբգարյանն է:

- Հայկ Մարությանը հիմնադրեց սեփական` «Նոր ուժ» անվանումով կուսակցությունը, որի շարքերում Դուք չկաք: Ինչո՞ւ, ի՞նչն է պատճառը:

- Իմ աշխատանքի` մասնագիտական բնույթը ենթադրում է լինել անկուսակցական: Դասավանդումից բացի, ես նաեւ Միջազգային լրագրողական կազմակերպության ներկայացուցիչ եմ Հայաստանում` գլխավոր քարտուղարն եմ, կյանքիս այս փուլում կուսակցական լինելն ընդունելի չէ: Ես երբեք կուսակցության անդամ, որպես այդպիսին, չեմ եղել: Ավելի շատ հանդես եմ եկել քաղաքացիական նախաձեռնությունների հետ, կուսակցական լինելն ինձ համար նախընտրելի չէ:

- Բայց կիսո՞ւմ եք Մարությանի նորաստեղծ կուսակցության գաղափարները:

- Ամեն դեպքում, ես լինելու եմ իրենց կողքին եւ որքան կարողանամ, օգնելու եմ իրենց: Ֆորմալ առումով ես ուղղակի կուսակցական լինել չեմ կարող այս պահին:

- Իսկ կուսակցության շարքերում ովքե՞ր են, քանի՞ հայտ կա եւ այլն:

- Դե, կուսակցությունը, որպես այդպիսին, հիմնադրվելու է մայիսի 1-ին: Դեռ չկա, որպես այդպիսին, կուսակցությունը, հայտերն էլ կտեսնենք հենց մայիսին: Համագումար կլինի, եւ ամեն ինչ պարզ կլինի: Կարգն այդպիսին է:

- Վերջին ընտրություններից առաջ իշխանությունները Հայկ Մարությանին ներկայացնում էին որպես ռուսամետ գործիչ, բայց ոմանք Մարությանին արեւմտյան ուղղության մեջ են տեսնում: Ձեր տպավորությամբ` «Նոր ուժ»-ն ի՞նչ արտաքին ուղղվածություն ունի:

- Դե, եթե Մարությանին մի մասը ռուսամետ է համարում, իսկ մյուս մասը` Զելենսկի, ինքնին փաստում է այն մասին, որ Հայկ Մարությանը հայամետ է: Որքանով տեղյակ եմ` կուսակցությունն ունի ավելի շատ սոցիալական եւ ժողովրդավարություն ապահովող ծրագրեր: Այսօրվա Հայաստանը շատ հեռու է սոցիալական պետություն լինելուց: Կարծում եմ` կուսակցությունը շատ ճիշտ որոշում է կատարել՝ ընտրելով հենց սոցիալական եւ ժողովրդավարական ուղղվածությունը: Որքան էլ որ իշխանությունները պնդեն, որ Հայաստանը ժողովրդավար երկիր է, միեւնույն է՝ մենք շատ խնդիրներ ունենք ու հեռու ենք իրապես ժողովրդավարությունից:

- «Մայր Հայաստանն» Ավինյանի դեմ դատակայն հայց էր ներկայացրել՝ հայտարարելով, որ նա ապօրինաբար է քաղաքապետ ընտրվել: Ինչո՞ւ այս հարցում չեք միանում նրանց:

- Մենք էլ ծառերի հատման դեմ ենք հայց ներկայացրել, որպեսզի կասեցնեն այս պրոցեսը, սակայն գործերը շատ դանդաղ են տեղից շարժվում: Մինչեւ նիստերը լինեն, Երեւանում ծառ չի մնա, սա էլ համակարգային խնդիր է, ասում են` խիստ ծանրաբեռնված է, դա է պատճառը: Ինչ վերաբերում է «Մայր Հայաստանի» հայցին, որ քվորում չի եղել երդմնակալության արարողության ժամանակ, ապա մենք էլ ենք կարծում, որ այդ նիստն ապօրինի է: Որեւէ ընդդիմադիր խմբակցություն չի մասնակցել: Բայց օրենքների մասով չեմ կարող հստակ գնահատական տալ, չգիտեմ ինչ կարող է լինել, ինձ թվում է` այստեղ օրենքը կանոնակարգված չէ, ինչից էլ օգտվել է իշխող ուժը: Ինչ վերաբերում է Ավինյանին պաշտոնից հեռացնելուն, ապա նրան հեռացնելու մեկ տարբերակ կա` պետք է հրաժարական ներկայացնի, իսկ մենք հոգնում ենք ամեն անգամ նույն բանը պահանջելուց:

- Այսինքն` դատական պրոցեսն անիմա՞ստ եք համարում:

- Դե, տարբեր գործերով պրոցեսներ են գնում, մենք էլ ենք դիմել` ծառերի համար, բայց հստակ չէ, թե դատարանն ինչ որոշում կկայացնի: Ավինյանն ունի 1 տարի ժամկետով իմունիտետ: