Գագիկ Հայկազուն. Անկախությունը էն չի, որ մեկն ինչ ուզենա անի, իսկ մյուսը՝ ոչ

«Այո, իրենց (նկատի ունի ազատամարտիկներին - Հ.) շնորհիվ շատերը շատ բաների են հասել: Ձեր ասած վիճակում են իմ շատ ու շատ ընկերներ ու մտերիմներ, որը շատ ողբալի է եւ որը չպիտի լինի: Այո, երկու խնդիրներն էլ կան: Եթե կան ազատամարտիկներ, ովքեր այսօր կարողանում են ընտանիք պահել, բարոյականի կարիք ունեն, բայց ավելի վատ է, երբ եւ բարոյականի կարիք ունի, եւ ֆինանսականի: Առաջին հերթին նրանց պետք է տեր կանգնել:



Պաշտպանության նախարարությունը բավականին ծախսեր է անում, օգնում, բայց դա քիչ է: Սա շատ նման է երկրաշարժի հետեւանքների վերացմանը, 20 տարի է անցել, այսքան ծախս են անում, կառուցում են, բայց դեռ տնակներում ապրող մարդիկ կան: Այսինքն, փաստը այն է, որ շատերն այսօր օգնության կարիք ունեն: Գիտե՞ք թե ինչ վատ է, երբ զոհվածի երեխան պետությունից չի ստանում բարոյականը, ֆինանսականը մի կողմ թողնենք: Երբ ասում է՝ հայրս մահացավ, բայց մեզ ոչ ոք բանի տեղ չի դնում: Դա շատ վատ բան է: Եթե այսօր մեղադրելու բան ունենք վերեւում, ղեկավարներին, մեծահարուստներին, առաջինը այդ է: Այդ վիճակը չպետք է լինի: Այսօր մարդիկ կան, մի քանի տասնյակ մեքենաներ ունեն: Դրանցից մեկի գումարը բավական էր, որ այս տղաներն իրենց լավ զգան:



Այսօր մեղադրում ենք, բայց ովքե՞ր են նրանք: Մեր կողքի հարեւանը, բարեկամը...Պետք է պետականության հասկացողությունը մտնի նրանց մեջ՝ սկսած ամենացածրում կանգնածից, մինչեւ իշխանության ամենաբարձր օղակը: Պետականության զգացումը պետք է ընկալվի: Անկախությունը էն չի, որ մեկը շա՜տ լավ զգա, ինչ ուզենա անի, իսկ մյուսը՝ ոչ: Պիտի հասկանան դա: Գուցե դրա համար ժամանակ է պետք: Կարծում եմ մի կես սերունդ կանցնի ու կհասկացվի»,- ազատամարտիկ, «Հայեր միացեք», «Գետաշեն», «Հպարտ գնացեք» համաժողովրդական սիրո արժանացած եւ այլ երգերի հեղինակ, գուսան Հայկազունը (Գագիկ Նազարյան), ով  անկախության հռչակման 19-րդ տարեդարձի առթիվ նախագահ Սերժ Սարգսյանի կողմից արժանացել է Մշակույթի վաստակավոր գործչի կոչման,  Անկախության օրվա հետ կապված պատասխանում է մեր հարցերին:  Գուսան Հայկազունի հետ մեր հարցազրույցն ամբողջությամբ կարդացեք «Հրապարակի» վաղվա համարում: