Չարաբաստիկ երկրորդ փուլ

Հուլիսի 26-ին, հայաստանյան երկու ֆուտբոլային ակումբներ՝  «Շիրակը» եւ «Գանձասարը», ՈՒԵՖԱ-ի Եվրոպայի լիգայի որակավորման 2-րդ փուլի շրջանակներում պատասխան խաղերում հյուրընկալեցին իսրայելական «Բնեյ Յեհուդային» եւ շվեյցարական «Սերվետին»։ Գյումրիում տեղի «Շիրակն»  ընդունում էր «Բնեյ Յեհուդային», որից առաջին խաղում պարտություն էր կրել 0։2 հաշվով։ Այդպիսով, իհարկե իսրայելական թիմի խնդիրն այս երկրորդ պատասխան խաղում շատ ավելի դյուրին էր, քան «Շիրակինը»։ Իսրայելցիներին մնում էր միայն Գյումրիում գնդակ գլորել եւ իրենց դաշտում ձեռք բերած առվելությունը պահպանելով՝ անցնել հաջորդ փուլ։ Կարելի է ասել, նրանք բավական լավ իրականացրին վերը նշված խնդիրը, անգամ գերակատարեցին նաեւ Գյումրիում` դառնալով գոլի հեղինակ։ Հանդիպման 31-րդ րոպեին հայտնվելով «Շիրակի» տուգանային հրապարակում եւ օգտվելով «Շիրակի» պաշտպանների ակնհայտ սխալներից, իսրայելական թիմի խաղացողներին հաջողվեց բացել խաղի հաշիվը։



Ընդհանրապես շատ բարդ է, կարելի է ասել՝ անհնար է մասնագիտորեն մեկնաբանել եւ քննարկել նման կարգի խաղերը, ինչպիսին տեղի էր ունենում հուլիսի 26-ին, Գյումրիում, քանզի նման ակումբների միջեւ կայացած հանդիպումներում շատ քիչ են ժամանակակից ֆուտբոլին բնորոշ էլեմենտներ, այնուամենայնիվ  կարելի է նշել, որ այս խաղում գյումրեցիները շատ ավելի անկաշկանդ ու ակտիվ էին գործում, քան Իսրայելում։ Ամեն դեպքում, «Շիրակի» ֆուտբոլիստներին այստեղ էլ չհաջողվեց գրավել մրցակցի դարպասը, եւ գյումրեցները զիջեցին 0։1 հաշվով, ընդհանուր երկխաղանի  դիմակայության արդյունքում՝ 0։3։ «Գանձասարն» էլ իր հերթին պարտվեց շվեյցարական «Սերվետին»(1:3) եւ նույնպես, ինչպես եւ «Շիրակը», լքեց Եվրոպայի լիգան երկրորդ որակավորման փուլից։



Ինչպես արդեն գիտենք, օրեր առաջ «Ուլիսն» էլ իր հերթին Չեմպիոնների լիգայում էր ավարտել իր մասնակցությունը նույն երկրորդ որակավորման փուլից։ Այսպիսով, բոլոր հայկական ակումբները, որոնք ընդգրկված էին միջազգային մրցաշարերում, ավարտեցին իրենց մրցելույթները նույն երկրորդ որակավորման փուլից. «Գանձասարը» եւ «Շիրակը»՝ Եվրոպայի լիգայում, իսկ գործող չեմպիոն «Ուլիսը»՝ Չեմպիոնների լիգայում։



Կարեն ՍԻՄՈՆՅԱՆ