Ամբաստանյալին ստիպում են արագացված դատաքննությո՞ւն պահանջել
Երեկ հերթական անգամ սկսվեց եւ հետաձգվեց մի խումբ դատապարտյալների կողմից մարզպետներից ու գյուղապետերից խաբեությամբ գումար շորթելու գործով դատական նիստը: Հիշեցնենք, որ տաքսու վարորդների միջոցով վերջիններից գումար են պահանջել՝ վերադասին հասցնելու համար: Որպես վերադաս՝ զոհերի հետ հեռախոսով զրուցել է ամբաստանյալ Համլետ Ղազարյանը: Նախորդ անգամ նիստը հետաձգվել էր մոտ 5 տասնյակ գյուղապետերի` տուժողների, նիստին չներկայանալու պատճառով: Նրանք երեկ էլ չէին ներկայացել դատարան, թեեւ բոլորն էլ պատշաճ ծանուցվել էին: Նիստին չէին բերել նաեւ ամբաստանյալին՝ դատապարտյալներին տեղափոխող մեքենայի անսարքության պատճառով: Երեկ տեղեկացանք, որ Համլետ Ղազարյանի պաշտպանը` հանրային պաշտպան Արթուր Սահակյանը, արագացված դատավարություն անցկացնելու միջնորդություն է ներկայացրել դատարան: Հիշեցնենք, որ, ամբաստանյալի պնդմամբ, կողմերը ցանկանում են արագացված դատ անցկացնել, որպեսզի գործի հանգամանքները չբացահայտվեն, եւ շատ բան այդպիսով ջրի երես դուրս չգա: Մասնավորապես այն, որ գործում ներգրավված են նաեւ մարզպետներ, ովքեր նույնպես դարձել են խարդախության զոհ, սակայն գործի քննության ընթացքում կարողացել են հասնել նրան, որ իրենց անունները դուրս մնան քրգործից: Իսկ Համլետ Ղազարյանը ցանկանում է իր խաբեության զոհ դարձած մարզպետներին եւս հրավիրել դատարան, որ նրանց դիմակը պատռվի, դատարանում պատմեն, թե ինչու են այդ գումարները տվել իրեն: Ղազարյանի խոսքով, դատավորը, մեղադրողը, անգամ իր պաշտպանը համոզում են արագացված դատ պահանջել` խոստանալով 3 տարվա ազատազրկում:
Դատական նիստին ներկայացած միակ անձը` մեղադրող դատախազ Արմեն Վարդանյանը, չցանկացավ պատասխանել մեր հարցերին: Բոլոր հարցերը վճռից հետո` ասաց: Փորձեցինք պաշտպանից պարզել, թե ինչու է արագացված դատաքննություն պահանջել, երբ իր պաշտպանյալը դեմ է դրան: Փաստաբանն ասաց, որ միջնորդությունը ներկայացվել է, սակայն դեռ որոշում չի կայացվել արագացված դատաքննություն անցկացնելու մասին: «Հաջորդ նիստին ամեն ինչ կպարզվի, եթե իմ պաշտպանյալը չի ցանկանա արագացված դատաքննություն, նա ազատ է` հրաժարվելու իր միջնորդությունից, ոչ ոք նրան հակառակը չի ստիպում»,-ասաց Սահակյանը` ավելացնելով. «Արագացված դատաքննությունը չի ոտնահարում ամբաստանյալի շահերը: Դա իրավունք է, որից կարող է օգտվել եւ չօգտվել ամբաստանյալը»: Նշենք, որ արագացված դատաքննության դեպքում դատարանն ամբաստանյալին չի կարող դատապարտել ավելին, քան նախատեսված պատժի առավելագույնի 2/3-ը: «Այս պարագայում, երբ մեղքը հիմնավորված է, արդարացման գնալու մարտավարություն չկա, արագացված դատաքննությունը նպաստավոր է ամբաստանյալի համար: Սակայն դա իր իրավունքն է, ոչ ոք չի կարող նրան ստիպել»,-ավելացրեց պաշտպանը: Ինչ վերաբերում է մարզպետներին, նա ասաց, որ մարզպետներին խաբելու մեղադրանք չկա գործում: «Իմ պաշտպանյալն ազատ է` դատարանում անել հայտարարություններ, եթե այդպիսի հայտարարություն կանի, սահմանված կարգով ընթացք կտրվի»,-ասաց Սահակյանը: Գործով հաջորդ դատական նիստը կկայանա սեպտեմբերի 10-ին:
Սոնա ՀԱՐՈւԹՅՈւՆՅԱՆ
Կարծիքներ