Բակո Սահակյանը ԼՂՀ զինուժին շնորհակալություն է հայտնել երկրի սահմաններն անսասան պահելու համար

Արցախի Հանրապետության Նախագահ Բակո Սահակյանն օգոստոսի 11-ին հրավիրել է աշխատանքային խորհրդակցություն՝ նվիրված ներքին և արտաքին քաղաքականությանը վերաբերող մի շարք հարցերի, այս մասին տեղեկացնում է Արցախի Հանրապետության Նախագահի աշխատակազմի տեղեկատվության գլխավոր վարչությունը:

Հատուկ ուշադրություն է դարձվել սահմանում տիրող իրավիճակին, բանակի մարտունակության բարձրացմանը, Արցախի Հանրապետության միջազգային ճանաչման գործընթացին, տնտեսության տարբեր ոլորտներում իրականացվող աշխատանքներին:

Նախագահ Սահակյանը շնորհակալություն է հայտնել պաշտպանության նախարարությանը, ԼՂՀ ՊԲ հրամանատարությանը և ողջ անձնակազմին ու մյուս կառույցների համապատասխան ստորաբաժանումներին` պետության սահմաններն անսասան պահելու, հակառակորդի ներթափանցման փորձերը կասեցնելու, տարածաշրջանում կայունությունն ու խաղաղությունը պահպանելու համար` նշելով, որ նրանց աշխատանքը անձնվիրության, բարձր պրոֆեսիոնալիզմի և հայրենասիրության լավագույն դրսևորումներից է, ինչը հպարտություն է ներշնչում ողջ հայությանը:

Բակո Սահակյանը կոնկրետ հանձնարարականներ է տվել շահագրգիռ մարմինների պատասխանատուներին քննարկված հարցերի և դրանց արդյունավետ իրականացման վերաբերյալ:

Խորհրդակցությանը մասնակցում էին Հայ Առաքելական Եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը, Ազգային ժողովի նախագահ Աշոտ Ղուլյանը, վարչապետ Արա Հարությունյանը, պաշտոնատար այլ անձինք