Ի՞նչ նպատակով են հանդիպել Քոչարյանին

ՀՀ երկրորդ նախագահ Ռոբերտ Քոչարյանի մեծ քաղաքականություն վերադառնալու մասին կանխատեսումները հանգիստ չեն տալիս որոշ շրջանակների: Բոլորն ուշիուշով հետեւում են Քոչարյանի քայլերին ու ելույթներին: Մեզ հասած տեղեկությունների համաձայն, օրերս Ռոբերտ Քոչարյանը հանդիպել է մի քանի լրատվամիջոցների ներկայացուցիչների հետ, որոնք քաղաքական հայացքներով գտնվում են Քոչարյանի քաղաքական նպատակներին մերձ տարածքում: Ըստ մեր տեղեկությունների, հանդիպմանը ներկա են եղել «Կենտրոն», «Հ2», «Երկիր Մեդիա» հեռուստաընկերությունների ու «Մեդիամաքս» լրատվական գործակալության ներկայացուցիչները: Մենք փորձեցինք մանրամասներ պարզել Ռոբերտ Քոչարյանի մամուլի խոսնակ Վիկտոր Սողոմոնյանից, ով մեր թվարկած լրատվամիջոցների անունները լսելով՝ ծիծաղելով արձագանքեց. «Ամբողջական գիտեք, իհարկե, այդպես է…»:

- Ի՞նչ նպատակով են լրատվամիջոցների ներկայացուցիչները հանդիպել նախկին նախագահին: Եթե հանդիպումը լիներ գործող նախագահի հետ, գուցե հասկանալի լիներ, բայց Ռ. Քոչարյանի դեպքում տարակուսելի է:

- Գիտեք, ես չգիտեմ, թե Ձեզ համար ինչն է անհասկանալի, քանի որ նման հանդիպումներ միշտ եղել են եւ Ռոբերտ Քոչարյանի նախագահության տարիներին, եւ դրանից հետո: Այլ հարց է, որ պաշտոնաթողությունից հետո այդ հանդիպումների պարբերականությունը փոխվել է, այն ավելի մեծ ինտերվալներով է տեղի ունենում, ուղղակի կազմն է հիմա փոքրացել:

- Վերջին անգամ ե՞րբ են հանդիպել:

- Եթե չեմ սխալվում, մի երկու-երկուսուկես տարի առաջ, ուրիշ մարդիկ էլ են եղել, նույն մարդիկ էլ…

- Ուշագրավը հենց կազմն է, ինչո՞ւ են այս լրատվամիջոցներն ընտրվել, եթե պարզապես հանդիպում է, ի՞նչ սկզբունքով է ընտրվել ցանկը:

- Ոչ թե լրատվամիջոցներն են ընտրվել, այլ այն լրագրողները, ովքեր առանձին հանդիպում էին խնդրել Ռոբերտ Քոչարյանի հետ, այսինքն՝ նրանք ցանկություն էին հայտնել հանդիպելու, ուղղակի մենք մեկտեղել ենք եւ մեկ օրվա ընթացքում ենք հանդիպել:

- Քոչարյանին պարզապես տեսնելո՞ւ, թե՞ առաջիկա քաղաքական մարտահրավերները հստակեցնելու, քննարկելու համար:

- Նորից եմ կրկնում՝ տարբեր ժամանակահատվածներում էլ են ցանկություն հայտնել, անցած ամառվանից էլ, ուղղակի մեկտեղել ենք եւ մի օրվա ընթացքում հանդիպել:

- Ուզում եք ասել՝ զուգադիպությո՞ւն է, որ այդ հավաքը համընկել է ԲՀԿ-ի վերջին ակտիվացման հետ: Ամեն դեպքում, լրատվամիջոցների ցանկից տպավորությունն այնպիսին է, որ հանդիպման նպատակն այլ է եղել, օրինակ՝ առաջիկայում Քոչարյանի հրապարակային հանդես գալուն նպաստելը եւ նման հարցեր…

- Հիմա եթե ես ասեմ՝ ոչ, միեւնույն է՝ Դուք մտածելու եք, որ դա զուգադիպություն չէ, եթե ասեմ՝ այո, ճշմարտության առաջ սխալ գործած կլինեմ, դրա համար անպատասխան թողնեմ: Ձեզ ինչպես հարմար է, այնպես էլ կարող եք մեկնաբանել (ծիծաղում է):

Գայանե ՍԱՐԻԲԵԿՅԱՆ