Ոչ մեկը չի կարող նախագահին փոխել․ Հովիկ Աբրահամյան

Այսօր ԱԺ հարցուպատասխանից հետո մի քանի լրագրողներով վարչապետ Հովիկ Աբրահամյանից հետաքրքրվեցինք՝ արդյոք անհանգստացա՞ծ չէ այն փաստով, որ ոչ իշխանական եռյակը իշխանափոխություն է պահանջում։ 

«Բայց դա ուղղակի ինձ է վերաբերում»,- ասաց վարչապետն ու հարցը կարծես ավելի հստակ ընկալելուց հետո շարունակեց․ «Հանրահավաքի՞ համար։ Բա ժողովրդավար երկիր ենք, պետք է հանրահավաքներ էլ լինեն»։

Այնուհետև Աբրահամյանն ասաց, որ իշխանափոխության համար ինքը որևէ հիմք չի տեսնում, և իշխանափոխությունը միայն ասելով չէ, պետք է դրա համար հիմքեր լինեն՝ ավելացնելով, որ ինչ վերաբերում է այդ 12+1 կետերին, ապա դրանց իրենք գրավոր պատասխանել են։

Ըստ վարչապետի՝ կառավարությունն այսօր ակտիվորեն աշխատում է և պետք է էլ ավելի ակտիվ և արդյունավետ աշխատի։

«Ես որևէ ճգնաժամ չեմ տեսնում, հակառակը՝ ես տեսնում եմ ավելի ընդգրկուն համագործակցություն քաղաքացիական հասարակության, քաղաքական ուժերի և խորհրդարանական խմբակցությունների հետ։ Ես նրանց այսօր էլ եմ կոչ արել, որ միասին աշխատենք։ Եթե իրենց նպատակն է մեր ժողովրդի, մեր երկրի առջև ծառացած ներքին ու արտաքին մարտահրավերներին տալ լուծում, ապա ես դա տեսնում եմ միայն միասնական ձևով»,- ասաց Հովիկ Աբրահամյանը։

Hraparak.am-ի դիտարկմանը, թե ոչ թե իրեն են ցանկանում փոխել, այլ երկրի նախագահին, Աբրահամյանն ասաց․ «Ոչ մեկը չի կարող նախագահին փոխել»։

Վահե ՄԱԿԱՐՅԱՆ