Վիեննայից առաջ Ադրբեջանը կրակի դադարեցման պայման է դնում
Քիչ առաջ Ադրբեջանի արտաքին գործերի գերատեսչությունը հայտնեց կրակի դադարեցման պայմանների մասին։ Խոսնակ Հիքմեդ Հաջիևն ասել է «ՌԻԱ նովոստի» գործակալությանը, որ «Հայաստանը պետք է ՄԱԿ-ի ռեզոլյուցիաներին համապատասխան ազատի օկուպացված տարածքները և ապահովի Ադրբեջանի լիարժեք սուվերենությունն ու տարածքային ամբողջականությունը»։ Քաղաքագետ Ռուբեն Մեհրաբյանն այս և նմանատիպ հայտարարությունները դիտարկում է ԼՂ իրադրության սրվելու կապակցությամբ վաղը Վիեննայում կայանալիք Մինսկի խմբի քննարկումների կոնտեքստում։ «Սա նշանակում է, որ իրենք «թանկացնում» են իրենց վաղվա Մինսկի խմբի համանախագահների հանդիպումից առաջ։ Այս պահին դժվար է կանխատեսել, թե որքան կտևի կոնֆլիկտը։ Համատեղ հանդիպումից հետո ամեն ինչ պարզ կդառնա։ Իսկ այս պահին հարցը լուծում է ոչ թե դիվանագիտությունն ու քաղաքականությունը, այլ հայ հետևակը, դիրքապահը, հայ զինվորը», - ասում է քաղաքագետը։
- Հակասություն չե՞ք տեսնում Ադրբեջանի այս հայտարարությունների և կրակը միակողմանիորեն դադարեցնելու պնդումների մեջ։
-Ոչ թե հակասություն է, այլ դա պրոպագանդիստական բլեֆ է, որը կոչված է քողարկելու հակառակ Ադրբեջանի հակառակ մոտիվները։ Քանի որ փաստ է, որ Ադրբեջանն է նախաձեռնել լարվածությունը և սա անդառնալի քաղաքական կորուստներ է պատճառել Ադրբեջանին, նրանք նման բլեֆներով փորձում են կորսվածը հետ բերել, մեղքը բարդել հայկական կողմի վրա, բայց դա նրանց մոտ չի ստացվում։
- Ինչպե՞ս հասկանալ, թե ում կողմն է հաջողությունը, երբ պատերազմական իրավիճակի սկզբունքներին համաձայն, երկու կողմերն էլ վստահեցնում են, որ մեծ հաջողություններ ունեն։
- Վերլուծելով ռազմաճակատում ստեղծված իրավիճակից։ Քանի որ հայկական կողմը պաշտպանվում է, իսկ նրանք հարձակվում են, որպեսզի իրավիճակ փոխեն ու նրանց մոտ դա չի ստացվում, հետևապես, հաջողությունը հայկական կողմում է։
Սյուզան Սիմոնյան
Կարծիքներ