ՊՆ-ում ժամկետային զինծառայողները պակասել են

ՀՀ պաշտպանության նախարարության մամուլի խոսնակ Արծրուն Հովհաննիսյանից հետաքրքրվեցինք, թե արդյոք պաշտպանության նախարարությունում այս պահին կա՞ն ժամկետային զինծառայողներ, եւ քանի՞սն են նրանք։ Հովհաննիսյանն ասաց, որ կան, բայց քանակ չի կարող նշել։ «Մի քանի օր առաջ մենք մրցույթ էինք հայտարարել՝ կապված հատուկ նշանակության վաշտերի հետ, նմանատիպ բնույթի ծառայություններ են»,-ասաց նա՝ նշելով, որ նախկինում ավելի շատ էին այդօրինակ զինծառայողները ՊՆ-ում, հիմա կրճատվել է քանակը։

Ավելի մանրամասնելով՝ Արծրուն Հովհաննիսյանն ասաց, որ մրցույթը կապված է եղել, այսպես կոչված, «կիբեռ» վաշտերի հետ։ «Նման բնույթի ծառայություններ են, հիմա բաներ կան՝ չեմ էլ կարող ասել Ձեզ: Իրենց գիտելիքներից ելնելով՝ քննություն են հանձնում, որպեսզի մասնակցեն»,-ասաց նա՝ ավելացնելով, որ նրանք հիմնականում բուհ ավարտածներ են լինում, որոնք որոշակի գիտելիքներ ունեն այդ բնագավառից, բայց կան նաեւ բացառիկ երեխաներ, որոնք մրցույթներին մասնակցում են առանց դիպլոմների եւ միանգամից հաղթում են։ Կարող են լինել համակարգչի, լեզուների մասնագետ, բայց, ըստ ՊՆ խոսնակի, ոչ այն քանակությամբ, ինչ նախկինում էր։ Հետաքրքրվեցինք նաեւ՝ մայրաքաղաքում գործող մյուս ռազմական օբյեկտներում՝ ռազմական ոստիկանություն, խաղաղապահների գումարտակ եւ այլն, կա՞ն ժամկետային զինծառայողներ։ «Չէ, վաղուց արդեն չկան... մի երկու-երեք տարի է՝ քիչ-քիչ վերացել են, հիմա էլ չկան»,-ասաց Հովհաննիսյանը՝ դա բացատրելով առաջին հերթին հակակոռուպցիոն բարեփոխումների տրամաբանությամբ։

Ռազմական ոստիկանությունից էլ գնդապետ Բաղդասարյանը մեզ ասաց, որ իրենց մոտ ժամկետային զինծառայողներ այլեւս չկան. «Բայց կարող են ընդունիչ-բաշխիչում կարգազանց կամ տեղափոխվող զինվորներ ժամանակավոր պահվեն, մինչեւ նախաքննության ավարտը։ Նրանք հրամանատարության հսկողությամբ ծառայություն են իրականացնում, որոնք նախաքննության ավարտից հետո ուղարկվում են կամ պատիժը կրելու, կամ իրենց զորամասեր։ Կամ զորամասից զորամաս տեղափոխվողներն են գալիս էստեղ, հետո նոր տեղափոխում ենք այլ ծառայության վայր։ Մի քանի կատեգորիաներ կան»։ Բաղդասարյանն ասաց, որ մեկ-երկու տարի է՝ արդեն չկան ժամկետային զինծառայողներ։ Բայց խոսքը վերոնշյալ կատեգորիաների զինծառայողների մասին է։ Իսկ հնարավո՞ր է զորակոչվեն միանգամից իրենց մոտ՝ երկու տարի զինծառայության։

«Այդպիսի զինծառայողներ չունենք հիմա»,-ասաց գնդապետը։ Իսկ առաջ եղե՞լ են նման ծառայողներ։ «Իհարկե, տարիներ առաջ զորակոչվել են զինվորներն ու եկել էստեղ ծառայել են»։ Թե ինչու հիմա այլեւս չկան, գնդապետ Բաղդասարյանն այսպես բացատրեց. «Մենք ժամկետային զինծառայողների խնդիր ունենք առաջնագծերում, եւ այս ռեզերվային զորամասերն ու թիկունքային զորամասերը մեծ մասամբ չեն ապահովում ժամկետային զինծառայողներ... մենք ժամկետային զինծառայողների հաստիքներ էլ չունենք, որ զորակոչվեն։ Մերը միայն պայմանագրայիններ են՝ սպաներ, ենթասպաներ»։ Սակայն, մեր տեղեկություններով, տարիներ շարունակ «էլիտար» մասսան հենց նման կառույցներում է տեղավորել սիրասուն զավակներին, որ հետագայում զինգրքույկ ունենան, եւ կարիերային վերելքի ժամանակ էլ կենսագրության մեջ նշվի՝ ծառայել է ՀՀ զինված ուժերում, եւ Երեւանում լինեն՝ գիշերը գնան տանը քնեն, ցերեկը մի քանի ժամ ասֆալտի վրա զինվորական համազգեստով ֆռֆռան, ապահով լինեն՝ սնայպերի, դիրքեր բարձրանալու վտանգ չլինի։ Եվ ինչքան էլ պնդեցինք, որ նշեն, թե երբվանից ռազմական ոստիկանությունում նման հաստիքներ չունեն, գնդապետը չասաց, միայն նշեց, որ «այս պահին չունեն»։

Նկատենք, որ մայրաքաղաքի զորամասերում եւ ռազմական տարբեր օբյեկտներում ծառայություն անցնելն աննկարագրելի երանություն է Արցախի պաշտպանական շրջաններում ծառայելու համեմատ։ Եվ այդ երանությունից օգտվում են հիմնականում պաշտոնյաների ու մեծահարուստների զավակները։ Եվ նման VIP պայմաններում զինծառայություն անցնելը կոռուպցիոն լուրջ ռիսկեր է պարունակում։

ՀԳ. Մինչ հոդվածը պատրաստում էինք, ստացվեց ՀՀ քննչական կոմիտեի հաղորդագրությունը․ «ՀՀ ՊՆ զինկոմիսարիատի 2-րդ բաժանմունքի պետ, փոխգնդապետ Շ. Ավետիսյանը ձերբակալվել է ՀՀ քրեական օրենսգրքի 311-րդ հոդվածի 4-րդ մասի 2-րդ կետով, այն է՝ առանձնապես խոշոր չափերով կաշառք ստանալու կասկածանքով։ ՀՀ ՊՆ ռազմական ոստիկանությունում հունիսի 1-ին քաղաքացուց հաղորդում է ստացվել առ այն, որ որդու պարտադիր ժամկետային զինվորական ծառայության մեկնելու հարցերով 2016թ. մայիսի սկզբներին գնացել է զինկոմիսարիատ, որտեղ պետը պահանջել է 12 հազար դոլար կաշառք՝ որդուն 3 տարի ժամկետով տարկետման տրամադրումը կազմակերպելու համար։ Հաղորդման հիման վրա հարուցվել է քրեական գործ՝ ՀՀ քրեական օրենսգրքի 311-րդ հոդվածի 4-րդ մասի 2-րդ կետով»։ Գումարի մի մասը՝ մշակված 5 հազար դոլարը, տվել են քաղաքացու ձեռքը եւ դրա հիման վրա էլ ձերբակալել Ավետիսյանին։ Մի կարեւոր հանգամանք․ պարզվել է, որ զորակոչի տարիքի հասած երիտասարդն ունեցել է առողջական խնդիրներ՝ հարթաթաթություն եւ նյարդային խանգարում։

Վահե ՄԱԿԱՐՅԱՆ