Ինտելեկտուալ ընդդիմություն պատկերացնող, հեքիաթներ սիրող Կարեն Կարապետյանը պատասխանում էր ֆեյսբուքցիներին (ֆոտո,վիդեո)
Այսօր Հայ բարեգործական ընդհանուր միությունում կազմակերպվել էր քննարկում վարչապետ Կարեն Կարապետյանի հետ՝ Հայաստանի երկարաժամկետ սոցիալ-տնտեսական զարգացման թեմայի շրջանակում: Ըստ ձևաչափի վարչապետը պետք է պատասխաներ ֆեյսբուքյան օգտատերերի հարցերին՝ կլոր սեղանի շուրջ: Քննարկմանը ներկա էին մի շարք գործիչներ, գործարար Ռուբեն Վարդանյանը, սփյուռքի նախարար Հրանուշ Հակոբյանը, հոգևորականներ:
1 ժամ տևած հարց ու պատասխանի ժամանակ վարչապետը փորձեց պատասխանել հարցերին՝ մի մասը հումորով, մի մասը՝ «այո» կամ «ոչ» տարբերակով, եծ թվով հարցեր էլ չընթերցվեցին կամ չհնչեցին դահլիճից, որովհետև եթերաժամակ չկար:
Վարչապետը պատասխանեց՝ Սփյուռքին, սիրահայերին վերաբերող հարցերին, ինչպես նաև Ամուլսարի հանքի շահագործմանը և կրթականը վերաբերող հարցերի:
Ֆեյսբուքյան մի օգտատեր հարց էր ուղղել՝ 10, 20, 30 տարի հետոյի Հայաստանը ինչպե՞ս եք պատկերացնում: Վարչապետը պատասխանեց՝ անկախ, անվտանգ, արդար և ինտելեկտուալ: Պատասխանից հետո դահլիճում նստածները ծափահարեցին:
- Ո՞րն է Ձեր երազած ընդդիմությունը:
- Ինտելեկտուալ ընդդիմությունը:
-Արդյոք պատրաստվո՞ւմ եք հանդիպել Ազգային փոքրամասնությունների հետ՝ հասկանալու համար նրանց հուզող հարցերը:
- Այո
-Ես ապրում եմ Բելգիայում, ինչո՞վ կարող եմ աջակցել:
- Լավ լինելով:
Պարզվում է ՀՀ վարչապետը հեքիաթների սիրահար է, համարում է, որ առանց հեքիաթ մանկություն չի կարող լինել, իսկ գրասեղանին դրված երեք գրքերի մասին չխոսեց՝ նշելով, որ դրանք բավականին շատ են և վերջինը, որը կարդացել է մասնագիտական գիրք է եղել:
Ֆեյսբուքյան օգտատերերը բազում հարցեր էին ուղղել վարչապետին, սակայն դրանցից ընդամենը տասը ընթերցվեց, այն էլ մեծամասամբ «այո», «ոչ» պատասխան ունեցավ:
Հարց տալու հնարավորություն ստացան նաև դահլիճում ներկաները, իսկ հիմնականում՝ քաղաքական գործունեությանը վերաբերող հարցեր չկային, չնայած, որ ֆեյսբուքյան օգտատերերն այդ թեմայով բավականին շատ հարցեր էին ուղղել:
Գրքերից՝ հեքիաթներ ու ամանորյա գներ՝ չընթերցելով լուրջ, քաղաքական բնույթի հարցեր՝ այս փաստը զայրացրել է տասնյակ օգտատերերի, նրանք համարում են, որ ասուլիսը բավականին վատ էր կազմակերպված, վարչապետը պետք է պատասխաներ բոլոր հարցերին և հատկապես այն հարցերին, որոնք քաղաքական բովանդակություն ունեին:
Ասուլիսի մի հատվածը՝ տեսանյութում:
Կարծիքներ