Եթե քո երկրում կան օկուպացված տարածքներ, ինչպե՞ս կարող ես պաշտպանված լինել

«Հրապարակի» զրուցակիցը «Մարդկային զարգացման միջազգային կենտրոնի» ղեկավար Թևան Պողոսյանն է:

- Այսօր Անվտանգության խորհրդի քարտուղար Արմեն Գրիգորյանը հայտարարել է, թե Արցախում գտնվող ՀՀ ԶՈՒ ստորաբաժանումները պետք է վերադառնան Հայաստան: Սեպտեմբերից այլեւս Արցախի Հանրապետությունում Հայաստանից զորակոչված ժամկետային զինծառայողներ չեն լինի: Ի՞նչ է սա նշանակում:

- Ամեն ինչ այնքան պարզ է, որ անգամ այս ամենը մեկնաբանելն ավելորդ եմ համարում: Ամեն օր Հայաստանի և Արցախի գլխին մի նոր վտանգ է կախված: Կա՞ մեկը, որ դա չի հասկանում: Անգամ շարքային քաղաքացու համար հասկանալի է, որ նոյեմբերի 9-ից հետո պարտված իշխանությունները շարունակում են պարտություններով ապրել: Հայաստանն այլևս Արցախի անվտանգության երաշխավորը չէ, իսկ ինչ վերաբերում է զինվորին, ապա Արցախում այսուհետ ծառայելու են միայն արցախցիներ և ժամկետային զինծառայողներ: Նման ձևով փորձում են Հայաստանից պատասխանել Ալիևին: Ալիևը մի քանի օր առաջ հայտարարեց, որ ադրբեջանական կողմին հավատացրել են, թե Արցախից պետք է դուրս գան ՀՀ ԶՈՒ ստորաբաժանումները:

- Ստացվում է, որ Հայաստանի գործող իշխանությունները հլու-հնազանդ ենթարկվո՞ւմ են Ադրբեջանին:

- Ինչի նո՞ր են ենթարկվում, նո՞ր եք նկատում: Ո՞նց կարող է ադրբեջանական զորքը մտնել Հայաստան, իսկ Հայաստանի իշխանությունները գործողություններ չձեռնարկեն: Երկու տարի է նույն բանն ենք կրկնում: Մարդիկ ամեն ինչ հրաշալի հասկանում են: Քաղաքացին ինչը՞ չգիտի, ի՞նչ կա, որ իր համար պարզ չէ:

- Փաստացի Արցախն այսօր անպաշտպան է: Ո՞րն է Արցախի ճակատագիրը:

- Ինչու, Հայաստանը պաշտպանվա՞ծ է: Այսօրվա դրությամբ բազմաթիվ օկուպացված տարածքներ կան Հայաստանում: Եթե քո երկրում կան օկուպացված տարածքներ, դու ինչպե՞ս կարող ես պաշտպանված լինել: Սյունիքից ամեն օր նոր լուրեր ենք ստանում: Երբ Խաչիկ գյուղից կարող են քաղաքացուն առևանգել, տանել մեկ շաբաթ պահել, դա ինչի՞ մասին է վկայում: Ի՞նչ է սա, եթե ոչ անպաշտպան լինել: Հայաստանից եկեք խոսենք....

- Լավ, իսկ Հայաստանին ի՞նչ ապագա է սպասվում:

- Ալիևն արդեն նկարագրել է և իր պատկերացմամբ անելու է ամեն բան, որպեսզի թե Սյունիքը, թե Գեղարքունիքը վերցնի, խոսում է նաև Երևանի մասին: Թշնամին արդեն նկարագրել է, թե ինչ է պատրաստվում անել, իսկ դու ի՞նչ ես առաջարկել թշնամուն, կամ ինչպե՞ս ես հակադրվել: Խոսել ինչ-որ խաղաղության մասին առանց երաշխիքների, ո՞րն է իմաստը: Իշխանությունները մեզ չեն ներկայացնում անվտանգության որևէ երաշխիք: Գործող իշխանությունները խոսում են ընդդիմադիրների մանդատների մասին, հայտարարում, թե նրանց մանդատներին ձեռք չեն տա, որպեսզի հասարակությունը տեսնի, թե նրանք ինչ տեսակ գործիչներ են: Քաղաքացին այսօր խնդիր ունի հասկանալու, թե արդյոք իշխանությունն իր խոստացած ապագան երաշխավորե՞լ է:

- Իսկ գուցե Հայաստանում ապրող քաղաքացիներին Արցախի ճակատագիրը չի՞ հետաքրքրում:

- Արցախի ճակատագիր ասելով, պետք է հասկանալ, Հայաստանի ճակատագիր: Մոնթեն ասել է, որ եթե Արցախը կորցնենք, կշրջենք հայոց պետականության վերջին էջը: