Ես անձնապես որեւէ մեկին չեմ պիտակավորել

Գագիկ Ծառուկյանի հայտնի ելույթից հետո, երբ նա հայտարարեց, որ կառավարության 100 տոկոսը պետք է փոխվի, իշխանական թիմը հրահանգված անցավ հարձակման ԲՀԿ-ի եւ Ծառուկյանի դեմ։ Մամուլում գրվեց, որ «Իմ քայլը» խմբակցությունն այդ ելույթից հետո նիստ է արել, եւ իմքայլականները վարչապետի կողմից հրահանգ են ստացել՝ քարը քարին չթողնել ու ամենասուր ձեւով քննադատել Ծառուկյանին։ ԱԺ «Իմ քայլը» խմբակցության պատգամավոր, նախկինում լրագրող Սիսակ Գաբրիելյանը երեկ մեզ հետ զրույցում ասաց, որ ինքը խմբակցության նիստերին մասնակցել է՝ նման որոշում չի կայացվել։ Երկու անգամ էլ թեման կորոնավիրուսն է եղել։

- Այդ դեպքում ինչո՞ւ ձեր խմբակցության անդամների կողմից նման արշավ սկսվեց Ծառուկյանի դեմ։

- Գիտե՞ք ինչ կա, ի՞նչ պարտադիր է որոշում լինի, այսինքն, եթե որեւէ ընդդիմադիր խմբակցության անդամ սկսում է խոսել, բնականաբար, դրան պետք է լինի նաեւ քաղաքական պատասխան։

- Այսինքն՝ ինքնաբո՞ւխ է եղել իմքայլականների հարձակումը Ծառուկյանի վրա։

- Եթե չկա որոշում, ուրեմն ինքնաբուխ է։ Էստեղ՝ ԱԺ-ում էլ, նիստերի ժամանակ երբեմն լինում է, երբ ընդդիմադիր խմբակցության որեւէ անդամ ելույթ է ունենում, էդ ելույթին լինում է մյուս պատգամավորների կողմից ինչ-որ պատասխան։

- Ինչո՞ւ եք այդպես ծանր տանում ձեր հանդեպ քննադատությունը։

- Չեմ կարծում, ինչի՞ց է ենթադրելի, որ ծանր ենք տանում։

- Ձեր արձագանքներից՝ միահամուռ կերպով ամենավերջին պիտակավորումներով եք հակադարձում։

- Չէ, պիտակավորմանը ես, անկեղծ ասած, դեմ եմ։ Ես երբեւէ չեմ պիտակավորում եւ կարծում եմ՝ ճիշտ էլ չէ, սխալ է։

- Այսինքն՝ Ձեզ չի՞ ուրախացրել այն, որ վարչապետին պատկանող լրատվամիջոցում հրապարակվել է Ծառուկյանի՝ 40 տարի առաջ գործած հանցանքի պատմությունը։

- Ես մանրամասները, անկեղծ ասած, չեմ էլ կարդացել, խոսակցական մակարդակով լսել եմ, որ ինչ-որ քրեական գործ է եղել, ժամանակին դատապարտվել է, բայց կոնկրետ մի բան է, որ դատական փաստաթղթից հրապարակում անես․․․ երբ որ ասում եք՝ պիտակավորում, ես նկատի ունեմ՝ անձնական վիրավորանքը։

- Հիմա Ձեզ ուրախացրե՞լ է, որ «ՀԺ»-ում հրապարակվել է 40 տարվա վաղեմության այդ դրվագը։

- Այսինքն՝ ինչո՞ւ պիտի ուրախացնի, ի՞նչն է էդտեղ ուրախացնող։

- Այդ դեպքում ինչո՞ւ կոչով չեք դիմում Ձեր այն գործընկերներին, որոնք մեծ ոգեւորությամբ տարածում էին այդ նյութը եւ մեկնաբանություններ գրում, թե «տեսեք՝ ինչ մարդ է եղել Ծառուկյանը»։

- Ես չեմ տեսել, որ ասեն՝ այ, տեսեք․․․ ենթադրում եմ, որ կարան եղած լինեն ինչ-որ մեկնաբանություններ։ Անձամբ ես՝ ոչ, էդ մասով չեմ խոսել, չեմ տարածել նման նյութ։

- Բարոյապես եւ էթիկապես ճի՞շտ եք համարում, առավել եւս այդ լրատվամիջոցում նման դրվագ հրապարակելը, այն էլ՝ հեղափոխությունից 2 տարի անց։

- Գիտե՞ք ինչ կա, էդ լրատվամիջոցին չեմ ուզենա մեկնաբանել, որովհետեւ նույն հաջողությամբ ձեր լրատվամիջոցն էլ այլ պաշտոնյայի դատական ակտ էր հրապարակել։

- Ճիշտ է, եւ մեզ քննադատեցին դրա համար, ասացին՝ մենք էթիկայի սահմաններ ու կարմիր գծեր ենք հատել, մտել ենք մարդու անձնական կյանքը, հիմա վարչապետին պատկանող լրատվամիջոցն է՞լ է մտել մարդու անձնական կյանքը։

- Ես Ձեզ ասում եմ՝ ես չեմ տարածում նման նյութ եւ անձնական վիրավորանք պարունակող գրառումներ չեմ անում։ Կարծում եմ՝  ամբողջական պատասխան տալիս եմ Ձեր հարցին։

- Դուք նաեւ լրագրող եք եղել եւ իրավական կրթություն ունեք, ինքներդ Ձեզ թույլ կտայի՞ք նման բան հրապարակել։

- Կախված է՝ ինչ իրավիճակ կլինի, չես կարող ասել։

- Այսինքն, եթե քաղաքական հրահանգ լինի, կարելի՞ է։

- Չէ, քաղաքական հրահանգի համար չեմ ասում, բոլորս էլ հասկանում ենք, չէ՞, լրագրող եք, Դուք էլ գիտեք՝ կարող է ինչ-որ իրադարձություն լինի, որ Դուք էլ վերլուծում եք, որ․․․

- Իսկ ի՞նչ իրադարձություն է եղել, որ անհրաժեշտ է եղել 40 տարվա բռնաբարության փաստը երեւան հանել։

- Ես ի՞նչ իմանամ, խմբագրությանը հարցրեք, ես ինչպե՞ս պատասխանեմ իրենց փոխարեն։

- Բայց Դուք կարող էիք արձագանքել, ասել՝ ճիշտ չէ, հարգելի գործընկերներ, ասել, որ այս ամենը հենց վարչապետի դեմ է ուղղվում։

- Նորից եմ ասում՝ ես իրենց գործունեության մեջ չեմ մտնում, այնպես, ինչպես չեմ մտել այդ թվում ձեր հրապարակման մեջ՝ կապված Սուրեն Պապիկյանի հետ, ես էդ մասով էլ բան չեմ արել, դա ձեր քաղաքականությունն ու ձեր որոշելիքն է, գտել եք՝ կարելի է, հրապարակել եք։

- Բայց սա ակնհայտ քաղաքական նպատակ ունի՝ Ծառուկյանը քննադատեց ձեզ, դուք էլ հիշեցնում եք նրա անցյալը։

- Անկեղծ ասած՝ չեմ հետեւել, Դուք հետեւե՞լ եք, առաջինը հրապարակել է հենց ա՞յդ կայքը (armtimes.com-ը)։
Ես չեմ հետեւել, չգիտեմ․․․ նախ պետք է հասկանալ՝ էդ փաստաթուղթը որտեղից, հասանելի է ինքը, հասանելի չէ։

- Ի դեպ, Ձեզ՝ որպես իրավաբանի, չի՞ հետաքրքրում, թե որտեղից այդ արխիվային փաստաթուղթը, հատկապես, որ արխիվի տնօրենն ասել է՝ իրենք նման փաստաթուղթ չեն տրամադրել։ Ստացվում է՝ իշխանությունը չարաշահում է իր լիազորություններն ու գաղտնի փաստաթղթեր է հրապարակում։

- Եթե գնանք այդ տրամաբանությամբ, որ այլ տեղ չի եղել, միայն արխիվում է եղել, էդտեղ կարանք ինչ-որ մի բան գտնենք։ Բայց մենք վստա՞հ ենք, որ էդ փաստաթուղթը որեւէ տեղ չի եղել՝ բացի արխիվից։ Օրինակ եմ ասում՝ գուցե, չգիտեմ, տուժողների շրջապատի կողմից է տրամադրվել…

- Դուք էլ էիք Ձեր հարցազրույցներից մեկում քննադատաբար արտահայտվել Ծառուկյանի հասցեին, որոշ ձեւակերպումներ թույլ տվել։

- Չէ, իմ միակ ձեւակերպումը, որ, կարծում եմ, գուցե համընկել է․․․ ես ամբողջ հարցազրույցում ընդամենը արտաբերել եմ մի հատ «համապատասխանաբար» բառ, որը մեր հասարակությունը գուցե ընկալում է տվյալ անձնավորության խոսքում պարբերաբար կրկնվող բառ։ Բայց ես դա նկատի չեմ ունեցել, ինչի համար, եթե էդպես է ընկալվել իր կողմից, չեմ զրուցել իր հետ, ես ներողություն եմ խնդրում։ Ես նկատի եմ ունեցել, որ մենք տվել ենք 5 տարվա խոստում, եւ հիմա, համապատասխան, առաջին տարում ենք։ Ես չեմ սիրում անձնավորել, շեշտել մարդու անձնային, ֆիզիկական հատկությունները։

- Երբ ձեր խմբակցության անդամները մասնակցում էին Ծառուկյանի դստեր հարսանիքին, վարչապետի դուստրն էլ սելֆի էր անում ռեստորանի սանհանգույցից, այդ ժամանակ չէի՞ն մտածում, որ Ծառուկյանը նախկինում դատապարտվել է եւ մի օր էլ կարող է ձեզ քննադատել։

- Ես նորից եմ ասում՝ ես խնդիր չեմ տեսնում, որ քննադատում են։ Քննադատում են, բնականաբար, դրան էլ հակադարձ քննադատություն պետք է լինի։

- Եվ այդ հակադարձ քննադատությունը երբեմն իջնում է անձնական վիրավորանքների մակարդակի եւ ցածր նիշի։

- Համաձայն եմ Ձեզ հետ, ավելին ասեմ՝ որպես իրավաբան, մարդու որոշակի դատվածությունը համարվում է մարված որոշակի ժամանակահատվածից հետո, ենթադրենք, եթե անգամ ես 15 տարի առաջ գողության համար դատապարտվել եմ, տվյալ պահին համարվում է, որ ես դատվածություն չունեմ։

- Այ, դա ինչո՞ւ չեք ասում Ձեր գործընկերներին, որ սխալ է, մի՛ արեք։

- Նախ, մեր հարցազրույցի ամբողջ ընթացքում ես չասացի, որ ես նման բան չեմ ասում կամ քննարկումներ չեմ ունենում, պարզապես այդ հատվածը թողեցի առանց մեկնաբանության։ Ասացի, որ ես անձնապես որեւէ մեկին չեմ պիտակավորել եւ կարծում եմ՝ իմ տիրապետումը կպահեմ իմ քաղաքական գործունեության ընթացքում։

ՀԳ․ Ինչ վերաբերում է Սուրեն Պապիկյանի մասին մեր հրապարակմանը, որը վկայակոչում է Գաբրիելյանը, ապա, նախ՝ պետական պաշտոնյայի կյանքն ու կենսագրությունը չեն կարող անձնական տվյալ համարվել եւ գաղտնի պահվել հանրությունից, իսկ Պապիկյանն իր դատվածության փաստը թաքցրել էր հանրությունից։ Ապա՝ հրապարակել էինք ոչ թե արարքի մանրամասները, այլ ընդամենը դատվածության փաստը եւ Քրօր. հոդվածը։