Ռուս խաղաղապահներն ավարտել են Մարտունիում տարածքների ականազերծման աշխատանքները

Ռուսաստանի պաշտպանության նախարարության հակաականային միջազգային կենտրոնի մասնագետներն ավարտել են Լեռնային Ղարաբաղի Մարտունի բնակավայրի տարածքի ականազերծման աշխատանքները: Այս մասին հայտնում է ՌԴ ՊՆ-ն:

«2020թ. նոյեմբերի 23-ից ռուսական խաղաղապահ ուժերի ինժեներական ստորաբաժանումների իրականացրած գործողությունների արդյունքում չպայթած զինամթերքից մաքրվել է 1358,3 հա տարածք, ավելի քան 425 կմ ճանապարհ, 1292 շենք-շինություն, այդ թվում` սոցիալական կարեւորություն ունեցող 29 օբյեկտ, հայտնաբերվել եւ վնասազերծվել է շուրջ 24,3 հազար պայթյունավտանգ առարկա»,-ասվում է հաղորդագրության մեջ:

Բնակավայրերի ականազերծման եւ ծայրամասերի մաքրման ընթացքում ռուս խաղաղապահները կիրառում են «Ուրան-6» ժամանակակից ռոբոտատեխնիկական համալիրներ, որոնք թույլ են տալիս զինծառայողների անվտանգությունն ապահովել պայթյունավտանգ աշխատանքների կատարման ժամանակ եւ տեղանքի մաքրման տեմպը պահպանել եղանակային բոլոր պայմաններում:

Հայտնաբերված պայթյունավտանգ առարկաներն ու զինամթերքը դուրս են բերվում եւ ոչնչացվում հատուկ սարքավորված տարածքում: Զինամթերքը, որը հնարավոր չէ տարհանել, ոչնչացվում է տեղում՝ անվտանգության բոլոր անհրաժեշտ միջոցների պահպանմամբ: