ԿԽՄԿ-ն մեկնաբանել է Ռուբեն Վարդանյանի հացադուլի հետ կապված իրավիճակը

ԿԽՄԿ-ն մեկնաբանել է Ռուբեն Վարդանյանի հացադուլի հետ կապված իրավիճակը

Կարմիր խաչի միջազգային կոմիտեն չի կարող տեղեկություններ հրապարակել Բաքվում պահվող հայերի առողջական վիճակի մասին. կոմիտեն նման հարցերով զբաղվում է գաղտնի կարգով։ Sputnik Արմենիային այս մասին ասաց Հայաստանում ԿԽՄԿ պատվիրակության հաղորդակցման ծրագրերի ղեկավար Զառա Ամատունին՝ մեկնաբանելով ԼՂ նախկին պետնախարար Ռուբեն Վարդանյանի հացադուլը։

Ավելի վաղ Բաքվի բանտում պահվող բարերար և գործարար, Լեռնային Ղարաբաղի նախկին պետնախարար Ռուբեն Վարդանյանի ընտանիքը հայտարարել էր, որ նա ապրիլի 5–ից հացադուլ է սկսել:

«Կարող եմ տեղեկացնել, որ ապրիլին մենք հերթական անգամ այցելել ենք բոլոր անձանց, այդ թվում՝ նշված անձին։ Անձանց պահման պայմանների, նրանց առողջական վիճակի հարցը կոնֆիդենցիալ է. մենք դրանք քննարկում ենք անմիջապես իրավասու մարմինների և հենց անձանց հետ»,– ասաց Ամատունին։

Ամատունու խոսքով՝ եթե այդ հարցերը հատուկ ուշադրություն են պահանջում, ապա ԿԽՄԿ–ն ավելի հաճախ է անդրադառնում դրանց՝ իշխանությունների հետ երկխոսության շրջանակներում։
Վարդանյանի ընտանիքի հայտարարության մեջ նշվում է, որ հացադուլը սկսվել է Վարդանյանի և նրա փաստաբանի կողմից ժամանակին արդար և թափանցիկ դատաքննություն անցկացնելու բազմաթիվ խնդրանքներից հետո:

Հիշեցնենք` ադրբեջանցի սահմանապահները 2023 թվականի սեպեմբերի վերջին ձերբակալեցին Արցախի նախկին պետնախարար, բարերար Ռուբեն Վարդանյանին, ՊԲ նախկին հրամանատար Լևոն Մնացականյանին, ՊԲ հրամանատարի նախկին տեղակալ Դավիթ Մանուկյանին, Արցախի նախկին արտգործնախարար Դավիթ Բաբայանին, ԼՂ ԱԺ նախագահ Դավիթ Իշխանյանին, Արցախի նախկին նախագահներ Արկադի Ղուկասյանին, Բակո Սահակյանին, Արայիկ Հարությունյանին։ Վերջինին, ի դեպ, Բաքվում ցմահ ազատազրկում է սպառնում։