Կոնֆե՞տ եք ուզում, թե՞ չրեղեն. շուտով կհրապարակվի «Փեթակում» հայտնաբերված խախտումների ցանկը

«Սուրմալու» առեւտրի կենտրոնում տեղի ունեցած ողբերգական դեպքերից հետո այն դեռ չի բացվել: Տարածքը մաքրում են, խանութները կարգի են բերում, բայց առեւտուր չկա, իսկ պայթած շինության դարպասները դեռ փակ են: Քննչական կոմիտեն օրեր առաջ հայտնել էր, որ այնտեղ քննչական գործողություններ են իրականացվում, եւ ճանապարհը բացել դեռ չեն կարող: 
Խաթարվել է նաեւ հարակից «Փեթակ» առեւտրի կենտրոնի բնականոն աշխատանքը: Մի քանի օր առաջ այստեղ աշխատող առեւտրականները գործադուլ էին անում, իսկ նախօրեին բողոքի ակցիա էին կազմակերպել կառավարության շենքի մոտ, գանգատվում էին տեսախցիկների առաջ, որ պայթյունից հետո Քրիստափորի փողոցի «Փեթակ» տանող հատվածը փակ է, աղբը մաքրված չէ, որ շինարարական աղբի հետեւանքով հակասանիտարական վիճակ է ստեղծվել։ «Մենք մնացել ենք առանց գործ»,- ասում էին նրանք լրագրողներին: «Փեթակի» համարյա բոլոր առեւտրականները վարկերի տակ են, տոկոսներ են տալիս բանկերին, եւ պարապուրդի ամեն օրը նրանց բիզնեսի վրա կրկնակի թանկ է նստում:   

Բայց այս ակցիան քննադատողներ էլ գտնվեցին, ընդ որում՝ բավականին հայտնի: Նախկին փոխոստիկանապետ Ռոբերտ Մելքոնյանը, օրինակ, իր ՖԲ էջում տուժող առեւտրականների մասին գրել էր. «Չեմ հասկանում, թե ինչու են բողոքում եւ ինչի համար: Հավանաբար նրա համար, որ իրենց ընտրած իշխանությունն է, որ իրենք ժամանակին փողոցներ էին փակում՝ «Երեւան» տոնավաճառի վաճառականների եւ մյուսների հետ միասին, իսկ հետո ծպտուն անգամ չէին հանում: Մեղադրեք ձեզ եւ նույն վճռականությամբ արեք այն, ինչ անում էիք չորս տարի առաջ: Կարո՞ղ եք… Եվ հետաքրքիր է, որ պատերազմ եղավ, տասնյակ հազարավոր զոհեր, վիրավորներ, խեղանդամվածներ, գերիներ, անհայտ կորածներ, խայտառակ կապիտուլյացիա, տարածքային, նյութական, բարոյական կորուստներ, եւ այս մարդիկ ձայն չհանեցին, չընդվզեցին, չբողոքեցին, չմտահոգվեցին, որ Հայաստանի անվտանգությունն ու պաշտպանությունը խղճուկ կարգավիճակում են, ու թուրքերն արդեն մեր տան դռներն են թակում...»:

Ինչո՞ւ է փակ «Փեթակը»: Առեւտրականները պատմում են, որ «Փեթակը» դիտավորյալ են փակ պահում, որ քաղաքացիները գնան «Երեւան» տոնավաճառ, որը, ինչպես հայտնի է, պատկանում է Սուքիասյանների «Սիլ կոնցեռնին»: Չի բացառվում, սակայն, որ սրանք զուտ խոսակցություններ են, որ ակտիվանում են ամեն անգամ, երբ քաղաքում իշխանամերձ որեւէ օլիգարխի պատկանող մի նոր առեւտրի խոշոր օբյեկտ է բացվում: Մի 5-6 տարի առաջ էլ, երբ բացվեց «Առինջ մոլը», «Փեթակի» առեւտրականները խոսում էին, որ իրենց տանելու են Ծառուկյանի նոր բացված շուկան:
Մյուս վարկածն այն է, որ «Փեթակն» ուզում են փակել, քանի որ այնտեղ հրդեհավտանգ իրավիճակ է: Դեռ օգոստոսի 23-ին «Փեթակում» ստուգումներ էր սկսել քաղաքաշինության, տեխնիկական եւ հրդեհային անվտանգության տեսչական մարմինը: 

Անցյալ տարի առեւտրի կենտրոնում հայտնաբերվել էին հրդեհային ահազանգման, ծխահեռացման, ներքին հակահրդեհային ջրամատակարարման ցանցի, արտաքին հրդեհաշիջման համակարգերի խնդիրներ, եւ հիմա, աչքի առաջ ունենալով «Սուրմալուի» դառը փորձը, տեսչականը նորից այցելել է «Փեթակ»: Հայտարարվում էր, որ ստուգումները կտեւեն մինչեւ օգոստոսի 25-ը, այսինքն՝ ընդամենը մի քանի օր էին լինելու, բայց տեսուչներն այս օրերին էլ դեռ այնտեղ են: 

Ի՞նչ արդյունքներ ունեք, ի՞նչ գործողութուններ են իրականացվում այս պահին, եւ արդյո՞ք «Փեթակի» փակ լինելու հանգամանքը տեսչականի գործողությունների հետ է կապված: «Հրապարակի» հարցերին պատասխանելով՝ քաղաքաշինության, տեխնիկական եւ հրդեհային անվտանգության տեսչական մարմնի մամուլի քարտուղար Ելենա Զոհրաբյանն ասաց. «Ստուգումներն իրականացրել ենք: Դրանք ավարտվել են, այս պահին վարույթ է իրականացվում հայտնաբերված խախտումների մասով: Ստուգումից հետո վարչությունն ամփոփել է արդյունքները, զեկուցագրով ներկայացրել է իրավաբանական վարչություն, հիմա վարույթի փուլում է, որից հետո կհրապարակվի, թե ինչ ենք հայտնաբերել: «Փեթակը» փակ չէ, դա ստուգումների հետ կապ չունի, որովհետեւ ամփոփման ու վարույթի շրջանակներում է գործը: Քանի որ Քրիստափորի փողոցի երթեւեկությունը միակողմանի է դարձել, տնտեսվարողները դրա դեմ են դուրս եկել»: 
Խոսնակն ասաց, որ տեսչական մարմինը նաեւ ստուգումներ է իրականացնում «Սուրմալու» առեւտրի կենտրոնում, որոնք դեռ չեն ավարտվել:  

Մեր տեղեկություններով, որոնք ստացանք ԱԻՆ հրդեհային տեսչությանը մոտ աղբյուրից, դեռեւս 2019 թվականին, երբ քաղաքաշինության, տեխնիկական եւ հրդեհային անվտանգության տեսչական մարմինը դեռ ձեւավորման փուլում էր, օբյեկտների հրդեհային անվտանգության հարցերով զբաղվող այս մարմինն ուսումնասիրություններ է կատարել Երեւանի բոլոր առեւտրի կենտրոններում, եզրակացություններ կազմել դրանց վիճակի վերաբերյալ եւ ուղարկել է կառավարություն: Ըստ այդ փաստաթղթերի՝ հրդեհային անվտանգության տեսանկյունից ամենալավ վիճակում եղել են մոլերը՝ «Երեւան մոլը», «Դալման», «Ռիոն»: Ամենախայտառակ խախտումները հայտնաբերել են «Փեթակում» եւ «Սուրմալու» առեւտրի կենտրոնում: 

Անցել է երեք տարի, սակայն կառավարությունը թերությունները վերացնելու ուղղությամբ մատը մատին չի խփել եւ միայն «Սուրմալու»-ի պայթյունից հետո է սկսել տենդագին ստուգում ստուգման հետեւից իրականացնել՝ ամեն պատրվակով փակ պահելով վտանգավոր օբյեկտները: 
«Փեթակը» միշտ լրագրողների համար ամենաանթափանց օբյեկտներից է եղել, կարծես ոչ թե «բիրիքնոց» լինի, այլ ռազմավարական օբյեկտ: Համացանցում նշված հեռախոսահամարները չեն պատասխանում: ՖԲ-ում էջ ունեցող տաղավար գտանք ու խնդրեցինք համար տրամադրել տնօրենից: Մեզ չաշխատող, անջատված համարներ տվեցին, իսկ երբ հարցրինք, թե ինչու են փակվել, պատասխանեցին. «Կոնֆե՞տ եք ուզում, թե՞ չրեղեն»: Այս անգամ էլ քաղաքակիրթ առեւտրի նորմերից դուրս գտնվող այս հիմնարկի գործերը փակ են, իսկ տնօրինությունը լրագրողների զանգերին՝ անհաղորդ: 

Ինչպես հայտնի է, «Փեթակ» առեւտրի կենտրոնը պատկանում է Գրիգորյանների ընտանիքին՝ ծագումով Ղարաբաղի Ասկերանի շրջանից: Մինչեւ 2018-ը «Փեթակը» նախագահականից հովանավորություն է ունեցել, քանի որ Սերժ Սարգսյանի օրոք «Փեթակի» տերերից Վարուժան Գրիգորյանը նախագահական նստավայրի գործերի կառավարիչն է եղել: Երրորդ վարկածն էլ այն է, որ նոր իշխանությունը չի ուզում այլեւս աշխատել Գրիգորյանների հետ: