Ստամբուլյան կոնվենցիան ուսումնասիրել եմ, բայց իմ դիրքորոշումը հիմա չեմ հայտնի

Ստամբուլյան կոնվենցիայի վավերացման հարցում ԱԺ իշխանական «Իմ քայլը» խմբակցությունում երկփեղկված վիճակ է։ Պատգամավորների մի մասը, հիմնականում ավանդապաշտ եւ «հայու գենին» հարող հատվածը դեմ է, որ կոնվենցիան վավերացվի։ Նրանք կարծում են, որ ՀՀԿ-ի օրոք ստորագրված այս կոնվենցիան կարող է փչացնել մեր ավանդական արժեքները, աղճատել հայկական ավանդական ընտանիքի մոդելը, քարուքանդ անել «հայու գենը»։ Իսկ նրանք, ովքեր կարծում են, որ ԼԳԲՏ ներկայացուցիչները, օրինակ, այդքան էլ վատ բան չեն մեր հասարակությունում, որ համասեռամոլները եւս ապրելու, աշխատելու, կարիերա անելու, իսկ երբեմն էլ ամուսնանալու իրավունք ունեն, եւ դրանից «հայու գենն» առանձնապես չի տուժի, ինչպես եվրոպական շատ երկրներում է, կողմ են կոնվենցիայի վավերացմանը։

Իսկ ի՞նչ դիրքորոշում ունի 88 հոգանոց «Իմ քայլը» խմբակցության «վարիչ» Լիլիթ Մակունցն այս հարցում, եւ արդյոք ամբողջ խմբակցությամբ եկե՞լ են մեկ ընդհանուր դիրքորոշման, թե՞ դեռ տարակարծությունների հարթման փուլում են։

«Ստամբուլյան կոնվենցիայի հետ կապված՝ խմբակցությունը ընդհանուր քննարկում չի ունեցել, մենք կսպասենք մինչեւ Սահմանադրական դատարանից որոշում լինի՝ հասկանալու, թե արդյոք կոնվենցիան համապատասխանո՞ւմ է Սահմանադրությանը, չի՞ համապատասխանում, եւ այնուհետեւ, երբ կհայտնվի մեր տիրույթում, մենք՝ որպես խմբակցություն, կքննարկենք, այդ թվում՝ ես»,- հարցը նրբորեն ՍԴ դաշտ տեղափոխեց Լիլիթ Մակունցը, որը վերջին շրջանում շատ զգուշավոր է դարձել իր խոսքում՝ թերեւս չփորձելով կրկնել այն սխալները, որոնք թույլ են տալիս իր շատ գործընկերներ։

- Քաղաքական որոշում կա՞ թիմի կողմից, որ պետք է վավերացնել Ստամբուլյան կոնվենցիան։

- Ոչ, մենք նման որոշում չենք կայացրել։ Արդարադատության նախարարությունն ուղարկել է Վենետիկի հանձնաժողով կոնվենցիան, կվերադառնա, կգնա Սահմանադրական դատարան, այնուհետեւ կտեսնենք։

- Դուք վստահո՞ւմ եք այն Սահմանադրական դատարանին, որն այսօր կա՝ ներկայիս կազմով, նախագահով, եւ որը պետք է քննի այդ հարցը։

- Ես չէի ուզենա այդ տիրույթ մտնել, որովհետեւ ես ընդամենը խոսում եմ այն ընթացակարգից, որը պահանջում է այս գործընթացը։ Եվ գործընթացը ենթադրում է, որ այն պետք է հայտնվի Սահմանադրական դատարանում՝ անկախ ամեն ինչից։

- Տեղեկություններ եղան մամուլում, որ ձեր խմբակցությունում քննարկում է եղել՝ արդարադատության նախարարի մասնակցությամբ, եւ խմբակցության մի շարք անդամներ, որոնք արմատական դիրքորոշում ունեն, դեմ են արտահայտվել կոնվենցիային, բավականին սուր բանավեճ է տեղի ունեցել։

- Այո, խմբակցության մի շարք պատգամավորների, նաեւ Ռուստամ Բադասյանի հետ եղել է կոնսուլտացիոն հանդիպում, որտեղ պատգամավորներն ուղղել են իրենց հուզող հարցերը, նաեւ պարոն Բադասյանը ներկայացրել է իր տեսակետները։ Շատ տարբեր կարծիքներ են եղել, տարբեր հարցեր են եղել՝ հիմնականում հասկանալու, պարզաբանելու, նաեւ որոշակի հարցեր են եղել, որոնք մտահոգություններ են ենթադրել…

- Խմբակցությունում շա՞տ են մարդիկ, որոնք ավելի հակված են «հայու գենի» ու ավանդական արժեհամակարգի պահպանմանը եւ կարծում են, որ Ստամբուլյան կոնվենցիան խաթարում է դա։

- Ես նշեցի, որ խմբակցությունն ամբողջությամբ չի մասնակցել, եւ մոտավորապես խմբակցության կեսն է ներկա եղել Ռուստամ Բադասյանի հետ հանդիպմանը, որովհետեւ արձակուրդի փուլ էր, այնպես որ՝ չեմ կարող ասել։ Իսկ հարցերի բովանդակությունից ենթադրել, թե որ պատգամավորն ինչպիսի դիրքորոշում ունի, այդպիսի նպատակ չենք դրել մեր առջեւ։

- Իսկ Դուք՝ անձամբ, ինչպիսի՞ դիրքորոշում ունեք, Ստամբուլյան կոնվենցիան կարո՞ղ է խաթարել մեր ավանդական արժեհամակարգը, «հայու գենը»։

- Հարգելի՛ Վահե, ես ունեմ իմ դիրքորոշումը, Ստամբուլյան կոնվենցիան ուսումնասիրել եմ, ուսումնասիրել եմ նաեւ կից բացատրական զեկույցը, բայց իմ դիրքորոշումը չեմ հայտնի, քանի դեռ այն չի հայտնվել Ազգային ժողովի օրակարգում։

- Քաղաքական առումով մեղադրում են նախկին իշխանություններին, որ իրենք՝ ինչ-որ երկրների պարտադրանքով, ստորագրել են համաձայնագիրը, ասել է թե՝ իրենք են այս ճաշը եփել, բայց մյուս կողմից էլ ասում են՝ պարտադիր չէ այն վավերացնելը, քանզի շատ երկրներ ստորագրել ու առկախել են վավերացումը։ Ինչո՞ւ գործող իշխանությունը որոշեց այն վավերացնել։

- Գիտե՞ք, ոչ միայն այդ հարցի հետ կապված, նաեւ տարբեր հարցերում գնում է այդ թեզը՝ այլ երկրների կողմից ինչ-որ պարտադրանքի մասով, ուզում եմ ասել, որ որեւէ կերպ մենք կաշկանդված եւ պարտադրված չենք որեւէ որոշում կայացնելու՝ անկախ նրանից, թե առանձին պետություններ ինչպիսի մոտեցում ունեն այս կամ այն հարցի հետ կապված։ Այո, գաղտնիք չէ, որ շատ հարցեր կան, որոնց հետ կապված՝ որոշումներ կայացվել են դեռ նախկինում, բայց մենք՝ որպես իրավահաջորդ, պետք է առերեսվենք այդ որոշումների հետ եւ կայացնենք մեր որոշումը։

- Իսկ ինչո՞ւ որոշվեց հենց սեպտեմբերին այդ հարցը մտցնել օրակարգ։

- Ես նման որոշման մասին տեղյակ չեմ, չգիտեմ՝ սեպտեմբեր ամիսը որտեղից է շրջանառվում եւ որտեղից է եկել ասպարեզ։ Գործընթացը, որի մասին խոսեցի, շատ արագ տեղի չի կարող ունենալ, որովհետեւ դեռ Վենետիկի հանձնաժողովից վերադառնալու համար նույնիսկ չգիտեմ՝ ինչքան ժամանակ կտեւի, հետո պետք է գա Սահմանադրական դատարան․․․
 

- Ի դեպ, ՍԴ-ի վերաբերյալ այդ «կաշառքի» եւ «շանտաժի» նախագծի մասով ի՞նչ կասեք, որ ուզում են այնպես անել, որ ՍԴ ներկայիս անդամները ժամանակից շուտ հրաժարական տան, գնան թոշակի, որ հետո նոր կազմ ձեւավորեն։
 

- Եկեք այդ հարցի հանգամանալից պատասխանը թողնենք պետաիրավական հանձնաժողովին։