Կա վտանգ, որ կարող են արտաքսվել ՀՀ այն քաղաքացիները, որոնք մասնակից են եղել տեղի ունեցած բախումներին․ Զարեհ Սինանյան

Հայաստանի Հանրապետության սփյուռքի գործերի գլխավոր հանձնակատար Զարեհ Սինանյանին «Հրապարակը» մի քանի գրավոր հարց է ուղղել՝ արտերկրում հայ-ադրբեջանական պարբերական բախումների վերաբերյալ։ Սինանյանից փորձել ենք ճշտել, թե որքանո՞վ է ինքը, լինելով սփյուռքի հետ առնչվող թիվ 1 պաշտոնյան Հայաստանում, փորձում նպաստել արտերկրում իրավիճակի կայունացմանն ու հանդարտեցմանը։ Նշենք, որ Սինանյանը այս պահին արձակուրդում է։ 

-Պարո՛ն Սինանյան, Հայ-ադրբեջանական սահմանին ստեղծված լարվածությունից հետո սփյուռքում պարբերաբար բախումներ են եղել հայերի և ադրբեջանցիների միջև, հուլիսի 23-ին և 24-ին ռուսական լրատվամիջոցներն ու Ռուսաստանում բնակվող տարբեր օգտատերեր հայտնեցին, որ ադրբեջանցիները վառում են հայերին պատկանող մեքենաներ, բախումներ ու ծեծկռտուքներ են տեղի ունենում։ Դուք այս շրջանում արձակուրդում եք ։ Խնդրում եմ պատասխանել՝ ի՞նչ գործողություններ եք ձեռնարկել, արդյոք կապ հաստատե՞լ եք ՌԴ իշխանությունների, տեղի հայ համայնքի ներկայացուցիչների, համայնքների ղեկավարների հետ։ 

- ՀՀ վարչապետի՝ հուլիսի 8-ի հրամանով գտնվում եմ արձակուրդում: Այցելում եմ արտերկրում գտնվող ընտանիքիս, քանի որ ընտանիքս և երեխաներս համավարակի սահմանափակումների պատճառով չեն կարողանում գալ Հայաստան:  

Իհարկե, ուշադրությամբ հետևում և տեղյակ եմ սփյուռքի տարբեր համայնքներում ադրբեջանական սադրանքների և ագրեսիվ գործողությունների մասին: Մշտական կապի մեջ եմ համայնքային ղեկավարների, ներկայացուցիչների, Ռուսաստանում ՀՀ դեսպան Վարդան Տողանյանի, պատվո հյուպատոսների հետ: Իրավիճակը վերահսկելի ու կառավարելի պահելու համար հայկական կառույցները, դեսպանատունը ամենժամյա կապի մեջ են իրենց գործընկերների, ուժային ծառայությունների, Ռուսաստանի համապատասխան գերատեսչությունների հետ: 
Եվրոպական երկրներում, ԱՄՆ-ում, Ռուսաստանում և Ուկրաինայում  իրադրությունը հիմնականում վերահսկելի է, եղել են սադրիչ գործողություններ, որոնք այս պահին չեզոքացվել են: Ապագայում չի կարելի բացառել հավելյալ սադրանքներն ու հարձակումները, սակայն դրանք կլինեն բացառություն, ոչ օրինաչափություն: Մոսկվայում հանգուցալուծման է հասել որոշ առևտրական կենտրոններում հայկական ապրանքների մուտքի արգելքի հարցը:

Ուշադրությամբ հետևում եմ Վրաստանի Մառնեուլի շրջանում տեղի ունեցած գործողությունների զարգացումներին:  շտական կապի մեջ եմ տեղի համայնքային ներկայացուցիչների, ՀՀ դեսպանի հետ:  

Տարբեր երկրներում ադրբեջանական կողմի այս գործողությունները կրում են բացահայտորեն դիտավորյալ և ուղղորդվող բնույթ: Տավուշում իր կրած խայտառակ պարտության արդյունքում Ալիևը փորձում է շեղել սեփական ժողովրդի ուշադրությունը՝ նրանց դրդելով հակահայկական գործողությունների: Այս պայմաններում մեր հայրենակիցներին կոչ եմ անում ցուցաբերել զգոնություն, զգուշություն և չտրվել սադրանքների: 

- Որևէ կոչով, խնդրանքով կամ այլ դիմումով դիմե՞լ եք տեղի հայերին՝ իրավիճակը հանդարտեցնելու համար։ 

- Կոչի ձևաչափով չեմ դիմել, ամենօրյա աշխատանքով մշտապես կապի մեջ եմ եղել համայնքների հետ, և արդյունավետորեն լռեցվել են բոլոր սադրիչ գործողությունները:

- Կա՞ վտանգ, որ Ռուսաստանում բնակվող ՀՀ քաղաքացիները կարող են արտաքսվել։ 

- Կա վտանգ, որ կարող են արտաքսվել ՀՀ այն քաղաքացիները, որոնք մասնակից են եղել տեղի ունեցած բախումներին և գտնվում են իրավապահների ուշադրության կենտրոնում:  

Այնուամենայնիվ, համայնքային կառույցներն ու անհատները նրանց համար վարձել են իրավաբաններ, որպեսզի իրավաբանորեն պաշտպանված լինեն:

Այլապես, ՀՀ քաղաքացիների արտաքսման որևէ հարց չկա և ՌԴ միգրացիոն քաղաքականության մեջ որևէ փոփոխություն չկա: 

- Հաշվի առնելով սփյուռքում լարված իրավիճակը՝ հնարավո՞ր է, որ արձակուրդը դադարեցնեք և վերադառնաք աշխատանքի։

- Անհրաժեշտության պարագայում, իհարկե, այո: Սակայն այս պահին որևէ երկրում հայտնվելը կապված է COVID-ի պարտադրած սահմանափակումների հետ, և աշխատանքը ստիպված հեռավար ռեժիմի ձևաչափով է իրականանում, մի բան, որն արդեն արվում է:  Նաև նշեմ, որ ես ինքս գտնվում եմ սփյուռքի հայաշատ համայնքներից մեկում, որտեղ բախումներ են եղել: