Մեր աշխատանքից ես չեմ կարող գոհ լինել, բայց չեմ կարծում, որ այն անարդյունավետ է

Հարցազրույց ՀՅԴ ԳՄ ներկայացուցիչ, ԱԺ փոխնախագահ Իշխան Սաղաթելյանի հետ

- 2 օր առաջ ավարտվեց ՀՅԴ 34-րդ ընդհանուր ժողովը, ընտրվեց բյուրոյի նոր կազմը։ ՀՅԴ քաղաքական օրակարգում նոր փոփոխություններ ամրագրվեցի՞ն։

- Ժողովը շատ մանրամասն քննարկել է կուսակցության անցնող 3 տարվա գործունեությունը եւ որոշումներ է ընդունել առաջիկա քառամյակի համար՝ տարբեր հարցերի շուրջ։ Բավականին բուռն եւ ծավալուն՝ Դաշնակցության ընդհանուր ժողովին համահունչ, մեծ օրակարգով ժողով է տեղի ունեցել, մեր առաջնահերթությունները շարունակում են մնալ նույնը, դա Հայաստան-Արցախ-Սփյուռք եռամիասնությունն է, Հայաստանի անվտանգությունն է, Արցախի հարցն է։ Էս բոլոր հարցերի շուրջ ընդունել ենք համապատասխան որոշումներ, ճշտել կուսակցության ռազմավարությունը։

- Քննարկումները ո՞ր հարցերի շուրջ են ծավալվել, եւ բախումներ, տարակարծություններ եղե՞լ են։

- Դաշնակցության ընդհանուր ժողովներում մշտապես կարծիքների բախումներ տեղի ունենում են։ Դա շատ բնական է։ Դրա հակառակը տարօրինակ կլիներ։

- Եղա՞ն բախումներ տարբեր թեւերի միջեւ։

- Դաշնակցության մեջ թեւեր պետք չէ փնտրել, մենք գաղափարական որեւէ տարաձայնություն չունենք, մեր բանավեճը, քննարկումները մարտավարության ու դետալների մեջ են։ Տարբերվող կարծիքներ, բնականաբար, եղել են։

- Առաջնահերթությունն օր առաջ այս իշխանություններից ազատվե՞լն է մնում։ Դա ամրագրվե՞լ է։

- Այո։ Մենք գնահատում ենք երկրում ստեղծված իրավիճակը, էս իշխանությունների գործունեության հետեւանքները, եւ գլխավոր հարցերից մեկն էս իշխանության օր առաջ հեռանալն է։

- Իսկ մոտեցումների տարբերություններ կայի՞ն։ Կայի՞ն մարդիկ, որոնք ասում են, որ պետք չէ սպասել եղանակների տաքանալուն, կամ՝  որոնք կարծում են, որ խորհրդարանում ձեր գործունեությունն արդյունավետ չէ։

- Հիմա ճիշտ չէ՝ ես մեր ընկերների առանձին, անհատական ելույթների մասին խոսեմ, թե ով ինչ ասաց, բայց ընդհանուր տրամադրությունն այն է, որ պետք է մեր ընդհանուր օրակարգերում լինել ավելի վճռական ու գործնական։

- Մինչեւ վերջին օրը գաղտնի են պահվել ժողովի օրը, տեղը։ Իմա՞ստը։

- Ժողովի վայրը նախօրոք հայտարարելու անհրաժեշտություն չի լինում, բայց ժողովից հետո հայտարարում ենք՝ որտեղ ենք արել։ Չեմ կարծում, թե գաղտնի պայմաններում է տեղի ունեցել․ ժողովին հարյուրից ավելի մարդ էր մասնակցում։

- Բյուրոյի ներկայացուցիչ վերընտրվեց կանադահայ Հակոբ Տեր-Խաչատուրյանը։ Լուրեր կային, որ Հրանտ Մարգարյանն է հավակնում, բայց չառաջադրվեց։ Ինչո՞ւ Մարգարյանը դուրս մղվեց։

- Դուրս մղվելու խնդիր չի եղել, ժողովն ընտրել է բյուրոյի նոր կազմ՝ պահպանելով նախորդ բյուրոյի հիմնական կորիզը։ Այսինքն՝ նախորդ կազմը բաղկացած էր 13 հոգուց, հիմա կազմելու է 11 հոգի, այդ կազմից 8 հոգին վերընտրվել է։

- Ասում են՝ Սաղաթելյանի թեւը հաղթեց Մարգարյանին, «իշխանական» թեւը պահպանեց իր դիրքերը։

- ՀՅԴ-ի մեջ թեւեր չկան, ու այդ բոլոր խոսակցությունները՝ Իշխան Սաղաթելյան-Հրանտ Մարգարյան կոնֆլիկտ, կանխատեսումներ, չգիտեմ ինչ, ես պարտավորված չեմ ամեն մի բամբասանք մեկնաբանելու, էդպիսի խնդիր էլ չկա։

- Ասում եք՝ բամբասանք է, բայց իրականում կան տարաձայնություններ, կարող են նաեւ թեւեր առաջանալ՝ ամեն մեկն իր թիմն ունենա կուսակցությունում։

- Խոսքիս հենց սկզբում ասացի՝ գաղափարական տարաձայնություններ չկան։

- Ասում էին, թե Հրանտ Մարգարյանն ավելի ռադիկալ է տրամադրված։

- Արդեն պատասխանեցի էդ հարցին։

- Լավ, ելնելով ժողովի որոշումներից՝ գործողությունների առումով ի՞նչ է հետեւելու դրան։

- Ես կարծում եմ, որ ժողովը կարեւոր առիթ էր ամբողջ կառույցի տեսակետները բյուրեղացնելու, հստակեցնելու, նոր մարտավարությամբ, նոր ռազմավարությամբ հանդես գալու իմաստով։ Այս առումով, կարծում եմ, առաջիկա մեր պայքարում ավելի ակտիվ դրսեւորումներ կլինեն։

- Այն մարդիկ, որոնք հույս են կապում ՀՅԴ-ի հետ, ինչպե՞ս են համոզվելու, որ դա զուտ հռչակում չէ՝ հետեւելու են գործողություններ։

- Այս մասին շատ բան չասեմ՝ գործով, մեր ամենօրյա աշխատանքով կերեւա։

- Խորհրդարանո՞ւմ, թե՞ խորհրդարանից դուրս։

- Ե՛վ խորհրդարանում, ե՛ւ խորհրդարանից դուրս։ Մշտապես մեր մոտեցումը եղել է դա, որ երբեք միայն խորհրդարանում խնդիրները չեն լուծվելու, խորհրդարանից դուրս եւս անհրաժեշտ է մեծ ծավալի աշխատանք, ու ոչ միայն Հայաստանում, այլեւ Սփյուռքում եւ Արցախում։ Էս տրամաբանությամբ նայեք, մենք էս ուղղությամբ ենք գնում, ու սա է անհրաժեշտ։

- Սփյուռքում գո՞հ են ՀՅԴ ԳՄ աշխատանքից, ԱԺ-ում ձեր աշխատանքից։ Կարծեմ՝ 2018-ին Սփյուռքի ձեր կառույցները դեմ էին, որ Նիկոլ Փաշինյանի հետ թեկուզ ժամանակավոր կոալիցիա կազմեիք։

 - Մեր էստեղի աշխատանքից ես չեմ կարող գոհ լինել, այսինքն՝ մեզ պես մտածող մարդիկ չեն կարող բավարարված եւ գոհ լինել մեր աշխատանքներից այնքան ժամանակ, քանի դեռ երկիրը պարտության մեջ է, ու երկիրը պարտության բերած իշխանությունը գտնվում է իշխանության ղեկին։ Հետեւաբար, էդ իմաստով ես՝ ինքս, բացարձակ գոհ չեմ։ Բայց ես չեմ կարծում, որ մեր արած աշխատանքն այլեւս անարդյունավետ է եւ օգուտ չի տալիս։ Հետեւաբար, պետք է ավելի լայն ծավալով անցնել գործի։

- Ե՞րբ, պարոն Սաղաթելյան։

- Էս պահից սկսած, այսինքն՝ մշտապես։ Ինչ-որ ժամկետներ հայտարարելու խնդիր չկա,  ամենօրյա աշխատանքով, առաջիկայում՝ ավելի ակտիվացնելով։

- Փողոց դուրս գալու պլաններ ու ժամկետ ունե՞ք։

- Ժամկետի համար ձեռնպահ կմնամ կոնկրետ օր ասելու, բայց պլաններ, իհարկե, կան։

- Եղանակային պայմանները, աշխարհաքաղաքական իրողությունները կապ ունե՞ն փողոց դուրս գալու հետ։

- Առաջիկայում մենք պլաններ ունենք, այդ մասին խոսել ենք, հիմա էլ նույն կարծիքին եմ, որ դիմադրության շարժումը պետք է դառնա իրականություն, ես գտնում եմ, որ ճիշտ ճանապարհը հենց դա է։