«Կինոյի տաճարի» բացումը՝ նվիրված Սերգեյ Փարաջանովի 95-ամյակին

Կրթության, գիտության, մշակույթի և սպորտի նախարարության աջակցությամբ և Հայաստանի ազգային կինոկենտրոնի նախաձեռնությամբ, այսօր «Այրարատ» (Ռոսիա) կինոթատրոնի նախասրահում տեղի ունեցավ «Կինոյի տաճար» ցուցահանդեսի պաշտոնական բացումը՝ նվիրված Սերգեյ Փարաջանովի ծննդյան 95-ամյակին։

Ցուցահանդեսում ներառված են Վարպետի «Նռան գույնը» ֆիլմի հիմնական մոնտաժից դուրս մնացած, վերականգնված ու մոռացությունից փրկված կադրերը, որոնք ինստալացիայի միջոցով ներկայացվեցին հանրությանը:
Ցուցահանդեսին զուգահեռ կինոսրահում ցուցադրվեց Ռուբեն Գևորգյանցի «Աշխարհումս» վավերագրական ֆիլմը։ Փարաջանովի կյանքի եզակի դրվագներով, լուռ զրույցով ժապավենն, որն անընդմեջ պտտվում էր էկրանին։ Վարպետի մասին պատմող այս վավերագրություն-էսսեն Ռուբեն Գևորգյանցը նկարել է 1979 և 1989 թվականներին։ Փարաջանովին վերաբերող ամեն մի շարժ այն տարիներին վերահսկվում էր պետական մարմինների կողմից, արգելված էր ցանկացած նախաձեռնություն, ուստի այս ֆիլմի նկարահանումները կատարվել են գաղտնի և տևել են շատ երկար։ Կինոէսսեն պատմում է Փարաջանովի բանտից ազատվելուց հետո թբիլիսյան առաջին օրերի մասին:

Նշենք, որ 2019 թ․Ռոտերդամի փառատոնի առանցքային ծրագրերից մեկը՝ «Կինոյի տաճարը», նվիրված էր աշխարհահռչակ ռեժիսոր Սերգեյ Փարաջանովին։ Վարպետի «Նռան գույնը» ֆիլմի հիմնական մոնտաժից դուրս մնացած, վերականգնված ու թվայնացված կադրերը ինստալացիայի միջոցով ներկայացվել են միջազգային հանրությանը։ 

Ցուցահանդեսի մուտքն ազատ է, մինչև հուլիսի 12-ը, ցանկացողները կարող են ժամը 12:00-20:00-ն այցելել ու տեսնել Փարաջանովի ֆիլմի անհայտ ու մոռացված կադրերի (ինստալացիա) ցուցադրությունը։