Ստոմատոլոգիական տուրիզմ
Վերջին տարիներին Հայաստանում բժշկական տուրիզմի զարգացման հետաքրքիր տենդենցներ կան, որոնք ապագայի հետ կապված՝ խոստումնալից են։ Հատկապես շոշափելի են ատամնաբուժության հետ կապված զարգացումները։ Բժշկական տուրիզմի ուղղությամբ ՀՀ կառավարության 5-ամյա ծրագրով նախատեսված միջոցառումների շրջանակում առողջապահության նախարարությունը երեկ հավաք էր կազմակերպել՝ հրավիրելով ստոմատոլոգիական ծառայություններ մատուցող կազմակերպությունների եւ մասնագիտական ասոցիացիաների ղեկավարներին, ոլորտի պատասխանատուներին:
Նախարարության բժշկական օգնության քաղաքականության վարչության պետի պաշտոնակատար Դավիթ Մելիք-Նուբարյանն ընդգծել է, որ ծառայությունը Հայաստանում ամուր հիմքերի վրա է` հարուստ ավանդույթներով, եւ երկիրը մեծ պոտենցիալ ունի՝ միջազգային շուկայում մրցունակ դառնալու: Ուսումնասիրությունները վկայում են, որ հայկական ծագումով զբոսաշրջիկների Հայաստան այցերի գրեթե 12%-ը կատարվել է բուժման նպատակով: Դրանց մեջ պատկառելի թիվ են կազմել ատամնաբույժներին դիմելու համար հատուկ Հայաստան ժամանածները։ Եվ այդ տենդենցները հաշվի առնելով՝ առողջապահության ու տնտեսական զարգացման եւ ներդրումների նախարարությունները միջոցառումներ են մշակել` ուղղված ստոմատոլոգիական կազմակերպությունների վերաբերյալ միջազգային հարթակներում տեղեկատվության տարածմանը: Ըստ այդմ՝ ծառայություններ մատուցող կազմակերպությունները պետք է ընդգրկվեն այդ տեղեկատվական առցանց հարթակում, ինչը կօգնի նոր հիվանդներ ունենալուն եւ միջազգային ասպարեզ դուրս գալուն։
Կարծիքներ