Սյունիքում վարակված միս ու կաթ չկա
hraparak
20 Հունիս 2011 | 07:30
0
Չնայած այս տարի հանրապետություն պատվաստանյութեր ուշ ներկրվելու պատճառով Սյունիքում ուշացել են պետպատվերի շրջանակներում անասունների պարտադիր պատվաստումները, այնուամենայնիվ մարզում անասունների ու ընտանի թռչունների շրջանում ներկա համաճարակային իրավիճակը կայուն է:Սննդամթերքի անվտանգության պետական ծառայության Սյունիքի մարզային կենտրոնի գլխավոր մասնագետ Էդգար Թոխսանցը հերքեց շրջանառվող այն խոսակցությունները, թե մարզին սահմանակից ազատագրված տարածքներում պահվող անասունների շրջանում տարածված են մի շարք հիվանդություններ: Ավելին՝ այնտեղից միսն ու կաթնամթերքը ներկրվում են Սյունիք:
«Ազատագրված տարածքներում հնարավոր է պարազիտային որոշ հիվանդությունների առկայություն, որոնք մեծ վտանգավորություն չեն ներկայացնում, եւ դրանց դեմ պայքարը պետպատվերի շրջանակներում չէ: Յուրաքանչյուր անասնապահ այդ խնդիրը պետք է լուծի ինքը»,- ասաց Է. Թոխսանցը:
Սյունիքում պետպատվերի շրջանակներում անասունների եւ թռչունների ամենամյա պատվաստումներն ընթացքի մեջ են: Առաջնահերթ պատվաստում են վտանգավոր հիվանդությունների դեմ: Պարտադիր այս տարի կպատվաստվեն նաեւ խոզերը՝ աֆրիկյան ժանտախտի, եւ ընտանի թռչունները՝ կեղծ ժանտախտի դեմ:
Ի դեպ, անցած տարի այդ պատվաստանյութերը չկային, ու մարզի որոշ համայնքներում աֆրիկյան ժանտախտ ու թռչունների կեղծ ժանտախտ էր բռնկվել: Այդ իսկ պատճառով նվազել է ընտանի թռչունների թիվը:
Ավելացնենք, որ վերջին մեկ տարում Սյունիքում 1620-ով ավելացել է խոշոր եղջերավոր անասունների եւ 2180-ով՝ մանր եղջերավոր անասունների թիվը:
Կարծիքներ