Ավելի լավ արձան

Այս օրերին շատ են քննարկում բոլշևիկ Անաստաս Միկոյանի արձանի տեղադրման հարցը։ Նրա կենսագրության իրական մանրամասների վերլուծությունը թողնում ենք պատմաբաններին։ Արձանի տեղադրման ուղղությամբ մեծ աշխատանքներ է կատարում մեր քաղաքապետարանի բազմափորձ և բանիմաց աշխատակազմը, ինչպես նա նախկին և ներկա կոմերիտական կադրերը։ Այնուամենայնիվ, անարդարացի ենք համարում Միկոյանի արձանի տեղադրման գաղափարը և սույն հայտարարությամբ ներկայացնում ենք առավել ազգանվեր մտահղացում։ Ավելի լավ Երևանին հարիր է ավելի լավ արձան։ Ուստի, առաջարկում ենք մի կողմ թողնել Միկոյանի արձանի տեղադրման վիճահարույց գործընթացը և փոխարենը տեղադրել հայ ազգի դարդը լացող, նրա հաղթանակները գովերգող, անկոտրում հայրենասիրության խորհրդանիշ ՀՀԿ տատիի արձանը։

Վստահ ենք, որ մեր բարձրաստիճան այրերը մեծագույն երախտագիտությամբ ներկա կգտնվեն այդ ազգանվեր կերպարի արձանի բացմանը, իսկ վերջինիս կենդանության օրոք տեղադրված կոթողը էլ ավելի կնպաստի մատաղ սերնդի հայրենասիրական դաստիարակությանը։

Ակնկալում ենք, որ ՀՀ թարմ կառավարությունը ՀՀԿ տատիի արձանի կերտման և տեղադրման աշխատանքների իրականացման նպատակով կձևավորի հատուկ միջգերատեսչական հանձնաժողով, որում կարող են ներառված լինել ոլորտի այնպիսի կարկառուն մասնագետներ, ինչպիսիք են Երևանի ներկայիս քաղաքագլուխը, բազմափորձ և տաղանդաշատ քաղաքաշինության նախարարը, և ինչու չէ, նաև նախկին մշակույթի նախարար Թամար Պողոսյանը։

ՀՀԿ տատիի արձանի տեղարումը կխորհրդանշի Հայաստանի լուսավոր ներկան և ավելի պայծառ ապագան։ Այն նաև բարոյական փոխհատուցում կլինի պետականամետ բախտագուշակին կառավարության նորընտիր կազմից դուրս թողնելու անարդար որոշման դիմաց։

«Մեր քաղաքը» հանրային-քաղաքացիական նախաձեռնություն