Փեսաները մեկնել էին արտագնա աշխատանքի. մանրամասներ ավտովթարից տուժածների մասին

Այսօր վաղ առավոտյան Տուլայի տարածաշրջանի Ուզլովսկիյ շրջանի Իլինկա գյուղի մոտակայքում տեղի ունեցած ավոտվթարի ուղևորներից մեկը՝ 68-ամյա Սպարտակ Նալբանդյանը, Տավուշի մարզի Գանձաքար գյուղից է: Գյուղապետ Շահեն Շահինյանը Hraparak.am-ի հետ զրույցում տեղեկացրեց, որ Սպարտակ Շահինյանը Ռուսաստանում բնակվող երկու որդի ունի և սովորաբար գնում է այնտեղ աշխատելու: Այստեղ՝ Հայասատանում նրան սպասողը կինն էր:

Ուղևորներից 39-ամյա Խուրչուրյան Արմանն ու 55-ամյա Անուշավան Երեմյանը համագյուղացիներ են, ավելին՝ մեր տեղեկություններով նույն ընտանիքի փեսաներ են: Նրանք նույնպես մեկնել էին Ռուսաստան` արտագնա աշխատանքի: Երկու ուղևորները Շիրակի մարզ Սառնաղբյուր գյուղից էին:

Մենք ճշտեցինք նաև, որ 30-ամյա Սաֆարյան Կարենը Երեվանի Մալաթիա-Սեբաստիայի բնակիչ է, 34-ամյա Թովմասյան Ռազմիկը Արարատի մարզի Արտաշատ քաղաքի բնակիչ է:

Հիշեցնենք, որ այսօր՝ նոյեմբերի 3-ին, ժամը 04.44-ին, ՌԴ ԱԻՆ ԱՃԿԿ-ից տեղեկատվություն է ստացվել, որ ժամը 03.08-ին Մ-4 դաշնային ավտոճանապարհի 220-րդ կմ-ում՝ Տուլայի տարածաշրջանի Ուզլովսկիյ շրջանի Իլինկա գյուղի մոտակայքում Մոսկվա-Երևան երթուղու «Կինգ Դելյուքս» ՍՊԸ տրանսպորտային ընկերությանը պատկանող «Higer» մակնիշի 510 OP 61 պետհամարանիշով ավտոբուսը դեռևս չբացահայտված հանգամանքներում դուրս է եկել երթևեկելի մասից և շրջվել:

Ժամը 10.00-ի դրությամբ պարզվել է, որ ՃՏՊ-ի հետևանքով զոհվել է 7, տուժել՝ 43 ՀՀ քաղաքացի, որոնցից 33-ը՝ հոսպիտալացվել են տարածաշրջանային ԲԿ-ներ, մասնավորապես Ուզլովայա ԲԿ: 

Մոսկվայում վթարի ենթարկված ավտոբուսը պատկանում է Աբովյանի քաղաքապետի նախկին թեկնածու Արթուր Հարությունյանի «Քինգ դե լյուքս» ընկերությանը: