Կամավորականներին դուր չի եկել վերադառնալու հրահանգը
Արցախում գտնվող կամավորական ջոկատներն արդեն վերադառնում են դիրքերից, չնայած նրանց մեջ դժգոհողներ կան հետվերադարձի հետ կապված, սակայն հրամանը մնում է հրաման: Hraparak.am-ը զրուցեց մի քանի ազատամարտիկների հետ, նրանց մի մասն արդեն ճանապարհին էր, մի մասն էլ զայրութից չցանկացան խոսել այդ թեմայով: Չէ՞ որ նրանցից շատերը կարծում էին, որ հետ կշպրտեն թշնամու գրանցած առաջխաղացումը:
«Ոչ, ճիշտ չեմ համարում այդ որոշումը, որովհետև թշնամուն հավատալ չի կարելի, բանակություններին էլ հավատալ չի կարելի: Էլի բանակցություններ կար, բա ինչո՞ւ հարձակվեցին»- նշում է «Տիգրան Մեծ» ջոկատի հրամանատար Կորյուն Ղումաշյանն ու իր խոսքերը պատկերավոր բացատրելու համար օրինակ է բերում շակալներին, որոնք մութն ընկնելուն պես հարձակվում են. «Իրանք այդ են, իրենց ո՞նց կարելի է վստահել, վստահել էինք, որ մեր երեխեքի արյունը թափվեց այնտեղ: Ոչ մեկն էլ չի ուզում վերադառնալ, որովհետև այդ երեխաների հետ այնպես միս ու արյուն ենք դարձել, որ ոչ մեկ էլ չի ուզում վերադառնալ այնտեղից»:
Տեղեկացնենք, որ ապրիլյան 4-օրյա թեժ մարտերի ժամանակ Արցախ էին մեկնել մոտ 4 հազար 400 կամավորականներ: Առաջին հերթափոխին մեկնել է 1700 կամավոր, որոնք ստացել են զենք և համազգեստ։ Այժմ տեղի է ունենում զենքի հանձնում-ընդունում:
ՀՀԿ-ական Աշոտ Աղաբաբյանը նույնպես Արցախ էր մեկնել, hraparak.am-ի հետ զրույցում տեղեկացրեց, որ 10 օր առաջ է վերադարձել և թեպետ ադրբեջանցիներին չի հավատում, այնուամենայնիվ վտանգավոր էլ չի համարում կամավորական ջոկատների հետվերադարձը. «Ճիշտը որ ասեմ, եթե կանչում են, ուրեմն դա համարում եմ շատ կարևոր, բոլորն էլ պետք է հանգստանան: Բանակցությունները երբեք պիկին չեն հասնում, բանակցությունները դրանք ժամանակավոր երևույթ են, որովհետև մենք երբեք թուրքին չենք հավատացել և չենք էլ հավատալու և միշտ պատրաստ են: Տղաները եթե հետ են գալիս, ընդամենն ուզում եմ, որ պատրաստ լինեն ամեն դեպքում: Վտանգավոր չէ, որովհետև մեր երիտասարդները, հայ զինվորներն պատրաստակամ են»:
Նշենք, որ նախագահ Սերժ Սարգսյանի վերադարձից հետո հրահանգ է եղել, որ կամավորները վերադառնան՝ իրավիճակն այժմ հարաբերականորեն հանդարտ է, բանակցությունների փուլ է ընթանում։ Hraparak.am-ն այսօր գրել էր, որ մեր աղբյուրների փոխանցմամբ` ազատամարտիկներին հետ կանչելու որոշումը ճիշտ ժամանակին է, որովհետեւ Վահան Բադասյան-գեներալ Մանվել բախումից հետո լարվածություն էր առաջանում ԵԿՄ-ական եւ ղարաբաղյան ջոկատների միջեւ:
Կարծիքներ