Մի ոստիկանը բավականին ծանր վիճակում է. Միքայել Մանուկյան

«Մի ոստիկանը բավականին ծանր վիճակում է, վերակենդանացման բաժանմունքում դեռևս, ուներ հրազենային վնասվածք որովայնի հատվածում, երեկ կատարվել է վիրահատություն հաստ աղիքի վրա, առավոտյան անջատել ենք արհեստական շնչառական սարքից և ունենք որոշ դրական տեղաշարժեր».- քիչ առաջ լրագրողների հետ զրույցում հայտնեց Էրեբունի բժշկական կենտրոնի գործադիր տնօրեն Միքայել Մանուկյանը: Նրա տեղեկացմամբ՝ միայն մեկ ոստիկան հրազենային վնասվածք ունի:

«ՊՊԾ տարածքից այո, երկու հիվանդ են երեկ երեկոյան տեղափոխել, մի հիվանդը՝ Լամբարյանը, վիրահատվել է, ոտքի բեկորային վնասումներ ուներ, վիրահատությունը հարթ է անցել, նույնպես արհեստական շնչառության սարքից անջատվել է, որոշ դրական դինամիկա է նկատվում: Մյուսին տեղափոխել են կալանավորների հիվանդանոց, վիճակը բավարար էր».-ասաց Միքայել Մանուկյանը:

Մելքումյան Արթուրը երեկ գտնվում էր վերակենդանացման բաժանմունքում, ուներ երկու ազդրի մանր բեկորային վնասվածքներ:

Վերջինս նշեց նաև, որ այս պահին իրենց մոտ է գնվում 9 հիվանդ՝ 2 քաղաքացի, 6 ոստիկան և «Սասնա ծռեր» խմբավորման մեկ անդամ. «Մյուս ոստիկաններն ունեն վնասումներ, բայց դա բեկորային վնասումներ է սրունքներին, արմունկներին, որոնք մշակվել են, սալջարդեր են, հիմա այդ ոստիկանները գտնվում են հիվանդասենյակում: 2 քաղաքացի ունենք տվյալ պահին, մի քաղաքացու մոտ կա ուղեղի ցնցում, առավոտյան տեսել եմ, վիճակը լավ է, չի բացառվում, որ այսօր դուրս գրվի: Մի քաղաքացին ծնոտի կոտրվածք ունի, երեկ վիրահատել ենք, էլի վիճակը բավարար ենք գնահատում, այսօր կտեղափոխվի հիվանդասենյակ»:

Հիշեցնենք, որ երեկ «Սասնա ծռեր» խմբավորման կողմից գրավված ոստիկանության ՊՊԾ գնդում վիճակը լարված է եղել: Խմբավորման երկու անդամներ հրազենային վնասվածքներ են ստացել, որից հետո տեղափոխվել են հիվանդանոց: