Ողջունելի է, որ իշխանությունները հրաժարվում են տրադիցիոն վեթթինգի գաղափարից

Վերաքննիչ վարչական դատարանի նախագահ Հովսեփ Բեդեւյանը լրատվամիջոցներում եւ սոցկայքերում եղած հրապարակումներից հասկացել է, որ գործող իշխանությունները կարծես թե հրաժարվում են տրադիցիոն վեթթինգի գաղափարից եւ գնում են այն գործիքակազմով, որը նախատեսում է այսօրվա օրենսդրությունը՝ Բարձրագույն դատական խորհուրդ, կոռուպցիայի հանձնաժողով եւ այլն։ Եվ դա Հովսեփ Բեդեւյանը ողջունելի է համարում։ Ի դեպ, նա մեր գործընկեր՝ «Ազատության» լրագրող Աստղիկ Բեդեւյանի եղբայրն է։

- Պարոն Բեդեւյան, Ձեր գործընկերներից շատերը վստահեցնում էին, որ իրենք պատրաստ են վեթթինգի ենթարկվել, որեւէ խնդիր չեն տեսնում, Դուք պատրա՞ստ եք։

- Իհարկե, ես էլ եմ նույնն ասում։

- Այդ դեպքում ո՞րն էր խնդիրը, որ վեթթինգի շուրջ այսպես աղմուկ բարձրացավ։

- Եթե ես լինեի աղմուկ բարձրացնողը, կասեի, բայց երեւի թե իրենց ուղղեք այդ հարցը։

- Դատարանների շրջափակումն օրինականության տեսանկյունից ճի՞շտ քայլ էր, ըստ Ձեզ։

- Ես էդ հարցերին չեմ պատասխանում, դա, իմ կարծիքով, քաղաքական դաշտում է, եւ դատավորները չեն կարող էդ հարցին պատասխանել։

- Բայց դա դատարանների եւ դատավորների դեմ ուղղված քայլ էր։

- Խնդիրն այն է, որ այսօր կարող է կարծիք հայտնես, իսկ վաղը դատական որեւէ գործ լսես, եւ դա արդեն խոչընդոտի քեզ, դրա համար ձեռնպահ ենք մնում կարծիք հայտնելուց։ Այսինքն՝ նույն այդ իրավական գնահատականը դու կարող է վաղը որպես դատավոր տաս, եւ ներկա պահին հնչեցրած կարծիքդ արդեն կկաշկանդի քեզ։

- Մտածում եք՝ վաղը կարող է այդ դեպքով դատական պրոցե՞ս սկսվի, ինչ-որ մեկը դիմի դատարա՞ն։

- Ոչինչ հերքել հնարավոր չէ, իհարկե։ Ես չեմ կարող կանխատեսել, բայց էն, որ կարող է լինի, դրա հավանականությունը դատավորը պետք է կանխատեսի եւ ձեռնպահ մնա կարծիք հայտնելուց։

- Իսկ այն պրոցեսը, որ հիմա ուզում են նախաձեռնել վեթթինգի փոխարեն՝ բարեվարքության կանոնների մշակում եւ այլն, սա կարո՞ղ է արդյունավետ եւ արագ լուծում ապահովել դատական իշխանության հանդեպ անվստահության վերացման հարցում։ Ի վերջո, նման քայլեր նաեւ նախորդներն էին ձեռնարկում։

- Գիտե՞ք ոնց, թեորետիկ, իհարկե, իմ կարծիքով, հնարավոր է, բայց դա կտեսնենք, երբ որ բուն գործողություն տեղի ունենա, եւ էդ ժամանակ նոր հստակ կասենք։

- Այս օրերին ամենաքննարկվող թեմաներից մեկը Վահե Գրիգորյանի հայտարարությունն էր՝ «դատավոր-անդամ» բառախաղով, որով ինքն իրեն հռչակել էր ՍԴ նախագահ։ Դուք սրա վերաբերյալ ի՞նչ կարող եք ասել։

- Վահե Գրիգորյանը, ինչպես գիտեք, նաեւ դատավորների ընդհանուր ժողովին է իր դիմումն ուղղել, մենք որոշել ենք հետեւյալ կերպ, որ պետք է բոլոր դատավորներն ուսումնասիրեն դիմումը, ամփոփեն, ընդհանուր ժողովում քննարկվի, եւ ընդհանուր ժողովի միասնական կարծիքն ասվի կամ չասվի։ Արդեն կորոշենք քննարկման ժամանակ՝ ընդհանրապես անդրադառնա՞նք այդ հարցին, թե՞ ոչ։

- Այնպիսի տպավորություն է, որ կաշկանդվածություն կա շատ դատավորների մոտ որոշ հարցերում, որ ինչ-որ բան ունեն ասելու, բայց չեն կարողանում դա պարզ ասել, իրենց դժգոհությունը կամ անհամաձայնությունն արտահայտել այս կամ այն հարցի շուրջ։

- Միգուցե կա, բայց եթե կոնկրետ իմ մասին է խոսքը, ապա իմ մասին չի կարող լինել էդպիսի բան, բայց որոշ հարցեր հենց դատավորի կարգավիճակից են բխում, որ կարող է էդպիսի բան լինել։

- Դուք քաղաքական իշխանության կողմից դատավորների եւ անձամբ Ձեր հանդեպ ճնշում զգո՞ւմ եք։

- Ոչ, չեմ զգում։

- Բայց պարբերաբար խոսում են, որ դատական իշխանությունը քաղաքականից կախում ունի եւ ճնշումների է ենթարկվում, այդ թվում՝ դատարանների շրջափակման ակցիան են ճնշում համարում, նաեւ վարչապետի տարբեր հայտարարությունները, հայտնի գաղտնալսումն են ճնշում եւ միջամտություն որակում․․․

- Գիտե՞ք ինչ, էդ բոլորը կապում են քրեական գործերի հետ, մեր դատարանը վարչական գործեր է քննում, եւ կոնկրետ վարչական արդարադատության մասով չեմ կարող ոչինչ ասել, որեւէ ճնշում չի եղել, չկա։

- Իսկ Վահե Գրիգորյանի հայտարարությունը, անկախ նրանից՝ դատավորների ընդհանուր ժողովն ինչ կորոշի, Դուք՝ որպես դատավոր, ինչպե՞ս եք գնահատում, նա կարո՞ղ էր ինքնահռչակվել որպես ՍԴ նախագահ։

- Դա, թույլ տվեք, ես չպատասխանեմ, քանի որ ընդհանուր բոլոր դատավորների մոտ նույն պրոցեսն է գնում, երեւի ճիշտ չի լինի ես պատասխանեմ էդ հարցին, էլի։

- Վենետիկի հանձնաժողովի կարծիքին ծանո՞թ եք, մասնավորապես վեթթինգի վերաբերյալ, կարո՞ղ է նաեւ դա ազդեց, որ, ինչպես Դուք նկատեցիք, իշխանությունները սկսեցին հետ կանգնել տրադիցիոն վեթթինգի գաղափարից։

- Միգուցե, չեմ կարող ասել, բայց էն տեքստը, որը հրապարակվեց, ես սոցցանցերից եմ ծանոթացել, միգուցե կարող է ազդել է։