Մոռացել է, թե ինչի համար են հավաքվել․ Ալիևի հին ձայնապնակը

«Երեք տարի առաջ մենք հասանք մեր հիմնական նպատակին՝ վերականգնեցինք 30 տարի խախտված տարածքային ամբողջականությունը։ Մենք դարձել ենք օկուպացիայի և էթնիկ զտումների զոհ։ Դա մեծ ողբերգություն էր մեր ժողովրդի համար և մեծ հումանիտար աղետ։ Մենք երկար տարիներ փորձում ենք հակամարտությունը կարգավորել խաղաղ ճանապարհով և օկուպացիային վերջ տալ խաղաղ ճանապարհով»։

Ինչպես հաղորդում է ԱՊԱ-ն, այս մասին 74-րդ միջազգային տիեզերագնացության կոնգրեսի բացման արարողության շրջանակում իր ելույթի ժամանակ ասել է Ադրբեջանի նախագահ Իլհամ Ալիեւը։

Թեպետ կոնգրեսի թեման տրամագծորեն այլ է և բացառապես գիտական բնույթի, Ալիևը հին սովորույթի համաձայն հերթական հարթակն օգտագործել է իր մտաքաղաքական անհեթեթությունները ներկայացնելու և հայերին մեղադրելու համար։

Նա կրկին դատարկաբանել է, թե «Ղարաբաղյան Երկրորդ պատերազմից հետո Ադրբեջանի ավելի քան 300 քաղաքացի դարձել է ականային ահաբեկչության զոհ»։

Ալիևը բողոքել է նաև միջազգային հանրությունից՝ նշելով, որ միջազգային կազմակերպությունները, որոնք պետք է վերջ դնեին հակամարտությանը, այս ուղղությամբ որևէ արդյունքի չեն հասել։ 

«ՄԱԿ-ի չորս բանաձեւերը պահանջում էին հայկական զինված ուժերի ամբողջական, անհապաղ և անվերապահ դուրսբերում մեր տարածքից։ Սակայն այս բանաձեւերը թղթի վրա մնացին 27 տարի։ Մեր նահատակների կյանքի գնով մենք ապահովեցինք այդ բանաձեւերի իրականացումը»,- հավելել է նա։