Աղաջանյանը չկարողացավ ասել՝ Աղդամն իր հայրենի՞քն է, թե՞ ոչ

ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանն այսօր, ԱԺ ճեպազրույցների ժամին կրկնեց նույն մանիպուլյատիվ թեզը, ինչ Նիկոլ Փաշինյանը, որ Արցախը նախկիններն են հանձնել, ոչ թե իրենք, քանի որ նախկիններն էին ժամանակին բանակցում Արցախի 7 շրջանները իբրև թե «հանձնելու» շուրջ։

Ի դեպ, երբ հարցրինք նրան՝ արդյոք կարո՞ղ է Նիկոլ Փաշինյանն ԱԺ ամբիոնից պատգամավորների վրա մատ կամ ուրիշ բան թափ տալ այն պատճառով, որ ընդդիմությունն ասում է՝ Արցախը հանձնել են, Աղաջանյանն ասաց․ «Մենք արդեն հոգնել ենք էդ անհիմն, բովանդակազուրկ և վիրավորական մեղադրանքներից, և այդ մեղադրանքների հեղինակները պետք է պատասխան տան իրենց կողմից հնչած ցանկացած մեղադրանքի համար։ Եվ ձեր կողմից՝ որպես լրագրող, կակնկալեի, որպեսզի նույն հարցը տայիք իրենց, վերջիվերջո, այդ 75 տոկոսի մասին, երբ խոսում են ընդդիմադիրները, արդյոք դրա մեջ մտնո՞ւմ են այն տարածքները, որոնք տարիներ շարունակ հենց իրենց իշխանությունները բանակցությունների սեղանին օգտագործել են որպես սակարկության առարկա»։

Աղաջանյանն այնուհետև սպառնաց, որ երբ ընդդիմությունը հարցերի, պնդումների տեսքով իրենց մեղադրում է դավաճանության, հայրենիքի 75 տոկոսը հանձնելու մեջ, դրան միշտ լինելու է արձագանք, քանի որ ընդդիմությունն իր ցանկացած ասածի համար պետք է պատասխան տա եւ հիմնավորի: «Հակառակ դեպքում կլինեն նմանատիպ ելույթներ և ոչ միայն»,-ասաց նա։

Ճեպազրույցից հետո Hraparak.am-ն այս թեմայով մի քանի հարց ուղղեց Էդուարդ Աղաջանյանին։

-Պարոն Աղաջանյան, Նիկոլ Փաշինյանը շատ ծանր է տանում, բորբոքվում է, երբ իրեն ասում են, որ Արցախի 75 տոկոսը հանձնել է։ Հայաստանում այսօր բազմաթիվ, կարելի է ասել՝ հարյուր հազարավոր քաղաքացիներ, որոնք ձեզ ձայն չեն տվել, այդպես են կարծում, որ ձեր իշխանությունը կամ անձամբ Նիկոլ Փաշինյանը հանձնել է Արցախի 75 տոկոսը։ Հիմա ի՞նչ, պետք է բոլորի վրա մա՞տ թափ տալ և այդպե՞ս խոսել։

-Խոսքը գնում է Ազգային ժողովում քաղաքական կուսակցությունների ներկայացուցիչների, քաղաքական գործիչների հարցերի, հարցուպատասխանների և, ընդհանրապես, քննարկումների ձևաչափի և բովանդակության մասին։ Եվ ՀՀ ցանկացած քաղաքացի իրավունք ունի ունենալու իր կարծիքը, բայց երբ խոսքը գնում է Հայաստանի պատգամավորների մասին, ովքեր հարց տալիս կամ պնդում անելիս պետք է հիմնեն իրենց խոսքը բացառապես փաստերի վրա, նույնիսկ, եթե պնդումները կամ հարցերն ունեն քաղաքական ենթատեքստ, ինչը որ նորմալ է, քանի որ քաղաքականությունն այդպիսի բան է, այնուամենայնիվ, այդ մեղադրանքները, առավելևս, երբ որ գնում է խոսքը հող հանձնելու մասին, ինչը, ըստ էության, դավաճանություն է, նմանատիպ պնդումներ անողները պետք է կարողանան հիմնավորել իրենց ասածը, առավելևս, երբ փաստացի այն, ինչի մասին իրենք վկայոկոչում են, մասնավորապես՝ 75 տոկոսը հանձնելու մասին, իրենք իսկ իրենց իշխանությունների օրոք այդ 75 տոկոսը կամ դրա մի մասը, ըստ էության, սակարկման առարկա են դարձրել միջազգային հանրության մոտ։

-Չե՞ք կարծում, որ Ձեր ասածը մանիպուլյացիա է, քանի որ այդ բոլոր փաստաթղթերը՝ Մադրիդյան սկզբունքներ, «Լավրովի պլան» և այլն, իրենք դրանցով չեն բանակցել, որ պետք է 5000 կամ ավելի զոհ ունենայինք և ոչ մի բանի դիմաց այդ շրջանները տայինք թշնամուն` ներառյալ Հադրութն ու Շուշին։

-Էստեղ ի՞նչ կար մանիպուլյացիայի։ Դուք ասում եք՝ 75 տոկոսը․ 75 տոկոսը՝ ինչի՞։

-Արցախի Հանրապետության։

-Չէ, խոսքը գնում է Արցախ, գումարած՝ 7 շրջաններ, որի 75 տոկոսը, ըստ ընդդիմադիր մեր գործընկերների, հանձնվել է։ 

-Իսկ ինչո՞ւ այն ժամանակ չէիք ասում, որ դավաճանություն է գործում նախորդ իշխանությունը՝ բանակցելով այդ 75 տոկոսի շուրջ։

-Իրենք են ասում, որ դավաճանություն է, իրենք են ասում, որ դա հայրենիք է։

-Բայց բանակցություններ են եղել, և բանակցությունների սեղանին դրված է եղել մի կողմից՝ որոշակի շրջաններ թշնամուն վերադարձնելու հարցը, մյուս կողմից՝ դրա դիմաց Արցախի կարգավիճակի հստակեցման, Արցախի ժողովրդի ինքնորոշման իրավունքի իրացման հարցը։ Իսկ հիմա մենք ոչինչ չունենք, բացի այդ` ունենք նաև զոհեր։

-Հիմա հարց. երբ ձևակերպվում է, որ հայրենիքի 75 տոկոսը հանձնել են, էս ձևակերպումը խնդրահարո՞ւյց է, թե՞ խնդրահարույց չի։

-Ի՞նչ է, Արցախը մեր հայրենի՞քը չէ։

-Յոթ շրջանները մեր հայրենի՞քն էին, թե՞ ոչ, այդ յոթ շրջանները, որոնք նախկինները պատրաստվում էին վերադարձնել։

-Ըստ Ալեն Սիմոնյանի՝ Աղդամը մեր հայրենիքն էր։

-Ես Ձեզ եմ հարցնում։

-Ես էլ Ձեզ եմ հարցնում՝ հիմա Աղդամը մեր հայրենի՞քն է, թե՞ ոչ։

-Երբ որ մեզ մեղադրում են դրանում, իրենք, ենթադրվում է, համարում են, որ դա մեր հայրենիքն է եղել, դրան զուգահեռ՝ 20 տարի շարունակ բանակցելով այդ հայրենիքի մի մասը՝ 75 տոկոսը կամ 60 տոկոսը թշնամուն հանձնելու վերաբերյալ․․․

-Պարոն Աղաջանյան, Ձեր Ազգային ժողովի նախագահը, Աղդամի նուռը ձեռքին, նկարվում էր ու ասում՝ Աղդամը իր հայրենիքն է։ Հիմա Աղդամը իր հայրենի՞քն է։ 

-Ես ավելացնելու բան չունեմ։ Ես կարծում եմ, որ մանիպուլյացիաների․․․

-Մանիպուլյացիա չէ, ես հարցնում եմ՝ Աղդամը մեր հայրենի՞քն էր։ Սերժ Սարգսյանն ասում էր՝ մեր հայրենիքը չէ։ Բայց ձեր թիմակիցն է ասել, որ Աղդամը իր հայրենիքն է։

-Ես կարծում եմ՝ հենց մեր ընդդիմադիր գործընկերներին պետք է էդ հարցն ուղղեք, որի պատասխանը դրական է, ըստ էության, որովհետև իրենք շարունակ ասում են՝ 75 տոկոսը հանձնել են։