Վերջին 30 տարում էսպիսի փորձ չի արվել՝ վերականգնելու, ժողովրդական աստառը հանելու
Այսօր Գյումրու ավագանու արտահերթ նիստին որոշում կայացվեց Սուրբ Զատիկը Հանրապետության երկրորդ քաղաքում տոնել ինքնատիպ՝ Հրաշափառ Հարությունը վերածելով համաժողովրդական տոնի: Ավագանու ՔՊ խմբակցությունը դեմ քվեարկեց նախագծին, իսկ մնացած խմբակցությունների բոլոր անդամները կողմ արտահայտվելով՝ որոշում ընդունեցին՝ ապրիլի 17-ին՝ ժամը 11: 00-ին, մեր համերկրացիներին հրավիրել Գյումրի՝ Յոթ Վերք եկեղեցուց մեկնարկելու Սուրբ Զատկի արարողությունը: Սուրբ Պատարագին հաջորդելու են հավկիթախաղն ու ժողովրդական համերգը, որը կանցկացվի Վարդանանց հրապարակում:
Hraparak.am-ի զրուցակիցը Շիրակի թեմի առաջնորդ Միքայել Արքեպիսկոպոս Աջապահյանն է․
-Սրբազան, ի՞նչ կասեք Գյումրու ավագանու որոշման մասին, քաղաքապետարանն այն Ձեզ հետ նախապես քննարկե՞լ էր:
-Այո, հրապարակում մեծ ժողովրդական տոնախմբություն է լինելու, վերածվելու է համաժողովրդականի: Ես ինքս եմ առաջարկել: Ես 20 տարի շարունակ ասել եմ, որ ջանք թափենք, եկեղեցական տոները վերածենք ազգագրականի: Եկեղեցական բոլոր տոներն էլ ժողովրդական են եղել: Սուրբ պատարագից հետո, ոչ թե առաջ, սկսվել է ժողովրդական տոնախմբությունը: Վերջին 30 տարում էսպիսի փորձ չի արվել՝ վերականգնելու, ժողովրդական աստառը հանելու: Սովետն արգելեց, բայց հիմա ժամանակն է ազգագրական աստառը մեջտեղ հանելու:Վերջին տարիներին միայն մեռելոցի ենք վերածել, հասկանալի է՝ մարդկանց գերեզմաններից չես կարող կտրել: Հիմա նոր քաղաքապետը կարծես թե փորձեր է անում վերականգնելու մեր արժեքները, ողջունում եմ: Սուրբ Զատիկի պատարագից հետո Վարդանանց հրապարակում մեծ հավկիթախաղ է կազմակերպվելու, միավորվելու են բոլորը, տոնելու մեր Տիրոջ Սուրբ Հարությունը:
-Ասացին՝ Երուսաղեմի տո՞մս է խաղարկվելու․․․
-ԷԷԷ, թող լինի, հաղթողը Երուսաղեմ ուխտագնացության կմեկնի․․․
-Ի դեպ, իշխող «Քաղաքացիական պայմանագիր» կուսակցության ավագանու անդամները նախագծին դեմ քվեարկեցին: Ի՞նչ կասեք:
-Ես իրենց չգիտեմ, չեմ ճանաչում, ոչ էլ հետաքրքիր է՝ դեմ են, թե կողմ, իրենց որոշումն է:
Կարծիքներ