Ինչո՞ւ Վահագն Ալեքսանյանը մարդ ծեծելու համար պատասխանատվության չենթարկվեց

Այսօր խորհրդարանի մեր աղբյուրներից տեղեկացել էինք, որ Ազգային ժողովի Պետաիրավական մշտական հանձաժողովի փակ նիստում միջադեպ, ծեծկռտուք է տեղի ունեցել։ Մենք պարզեցինք, որ Միջազգային իրավական հարցերով ներկայացուցիչի մասին օրենքում փոփոխությունների նախագիծը քննարկելու ժամանակ հանձնաժողովի նախագահ Վլադիմիր Վարդանյանը ինչ-որ բանից բորբոքվել է, ձայնը բարձրացրել եւ սկսել գոռգոռալ ընդդիմադիրների վրա, «Հայաստան» դաշինքի անդամ Մհեր Սահակյանը, որը վերջերս է դարձել պատգամավոր,ասել է՝ մի գոռա, ձայնդ մի բարձրացրու, Վարդանյանն էլ պատասխանել է, թե՝ ում վրա ուզեմ գոռալու եմ, ինչ ուզեմ անելու եմ, տեղից վեր է թռել, կանգնել, ոտքի է կանգնել նաեւ Մհեր Սահակյանը, բանավեճը շարունակվել է, Վարդանյանը նետվել է դեպի Մհեր Սահակյանը ու ինչ-որ բան ասել, վերջինս էլ խփել է։ Իրավապահներն անհարդորդ չեն մնացել այս ամենից:

Միջադեպից րոպեներ անց Ազգային ժողով են ներխուժել ՀՀ ոստիկանության աշխատակիցները, ովքեր անհամաչափ բռնի ուժի կիրառմամբ բերման են ենթարկել պատգամավոր Մհեր Սահակյանին։ Այս պահին պատգամավոր Մհեր Սահակյանը գտնվում է Երևան քաղաքի ոստիկանական բաժիններից մեկում և հարցաքննվում է։

Չնայած նրան, որ ամիսներ առաջ էլ ՔՊ-ական Վահագն Ալեքսանյանն էր պատգամավոր ծեծում, ոչ մի ոստիկան դեպքին չմիջամտեց և քրեական վարույթ չհարուցվեց ակնհայտ բռնություն գործադրելու համար, սակայն այժմ ընդդիմադիր պատգամավորին նման ձևով բերման են ենթարկում:

«Հայաստան» խմբակցության պատգամավոր Գեղամ Նազարյանը «Հրապարակի» հետ զրույցում նշեց, որ իշխանական պատգամավորներն են ամեն ինչ սկսել, ապա ոստիկաններին կանչել. «Վլադիմիր Վարդանյանն իր տեղից կանգնեց և սկսեց բարձր ձայնով խոսել: Ոչ մեկը չէր սպասում, որ այդ ամենը կարող է ավարտվել ծեծկռտուքով: Կարծում եմ, որ կարելի էր այդ միջադեպը չհասցնել այդ վիճակին, սակայն Վլադիմիր Վարդանյանը տեղից կանգնեց ու առաջ եկավ դեպի Մհեր Սահակյան և տեղի ունեցավ այն, ինչ տեղի ունեցավ»-, նշեց Նազարյանը:

Նրա խոսքով՝ երբ ՔՊ-ական Վահագն Ալեքսանյանը ծեծկռտուք էր սարքել ԱԺ-ում, ոչինչ չարվեց. «Ակնհայտ կողմնապահություն, ակնհայտ երկակի ստանդարտներ: Ես բռնությանը դեմ եմ, դրան երբեք կողմնակից չեմ եղել, սակայն փաստացի եղել է նման դեպք` իշխանական պատգամավորի կողմից և ոչ մի հետևանք դա չի ունեցել», - խոսքը եզրափակեց Գեղամ Նազարյանը: