Վազգեն Մանուկյանը շատ լավ գիտի՝ ինչպես դա անել, թե ինչու չեն անում, չգիտեմ

Քաղտեխնոլոգ Կարեն Քոչարյանին հարցրինք՝ արդյո՞ք ընդդիմությունը փողոցային պայքարի այս ալիքը կարողանում է արդյունավետ օգտագործել եւ անում է ամեն բան՝ իշխանափոխության հասնելու համար։ Եթե ոչ, ապա ի՞նչն են սխալ անում, եւ ի՞նչ պետք է անել՝ հաջողության հասնելու համար։

- Այս օրերին Դուք էլ եք լինում հանրահավաքներին, ի՞նչ է անում ժողովրդական շարժման ղեկավարումն իր վրա վերցրած ընդդիմությունը, ինչո՞ւ մարդկանց հոսքը չի ավելանում։

- Ուղղակի չի կարելի կրկնել նույն բանը, որը գիտես՝ հաստատ օգուտ չի բերում։ Կրկնում են այն, ինչ արել են, չկա միայն «Զարթնիր, լաո» երգը, մնացած ամեն բան տեղում է։

- Ի՞նչ փոփոխություն է պետք մտցնել շարժման օրակարգում, արդյոք որեւէ ձեւաչափ առաջարկե՞լ եք Դուք։

- Խորհուրդներ տվել եմ, բայց հրապարակավ այդ մասին չեմ խոսի։ Բոլորը երեք տարի է՝ սպասում են կրիտիկական զանգվածի։ Ո՞րն է այդ զանգվածը, եւ ի՞նչ պետք է անեն, որ այդ զանգվածը հավաքվի։ Եթե այս հարցերին պատասխանեն այն անձինք, ովքեր զբաղված են այս գործի ղեկավարմամբ, մնացածը ես կասեմ։

- Ազգային կոմիտե ստեղծվեց, այդ կոմիտեն երիտասարդությանը կարո՞ղ է տանել իր հետեւից։

- Յուրաքանչյուր բան կարող է արդյունավետ լինել, եթե դու այն հետեւողական ես անում, կիսատ չես թողնում։ Օրինակ, Վազգեն Մանուկյանը շատ լավ գիտի՝ ինչ է նշանակում ստեղծել կոմիտե, որը հետո պետք է ունենա ենթակոմիտեներ՝ կազմակերպություններում, արտադրություններում, բուհերում։ Արդյո՞ք նրանք այդ ցանցը ստեղծել են։ Երբ 1988-ին ստեղծվեց «Ղարաբաղ» կոմիտեն, ցանկացած ձեռնարկություն ուներ իր «Ղարաբաղ» կոմիտեն։ Վազգեն Մանուկյանը շատ լավ գիտի, թե ինչպես դա անի։ Թե ինչու չեն անում, չգիտեմ։

- Նկատե՞լ եք, որ վերջին օրերի հանրահավաքներին եւ բողոքի ակցիաներին մասնակցում են քաղաքացիներ, որոնք նախկինում չեն մասնակցել փողոցային պայքարին։

- Այս անգամվա էներգետիկան շատ ավելի լավն էր, քան երբեւէ, որովհետեւ կային երիտասարդներ։

- Այդ էներգետիկան երեկ է՞լ կար։

- 2 օր առաջ կար, երեկ չեմ եղել, չեմ նկատել։

- Ինչո՞ւ է ոստիկանությունը հիմնականում բերման ենթարկում երիտասարդությանը։

- Ոստիկանությունը միշտ է փորձել դա անել, բայց եթե նկատել եք՝ ոստիկանության ուժերը սահմանափակ են։ Ոստիկանությունը գործում է միայն այն դեպքում, երբ մարդկանց քանակը 20-50 հոգի է։ Դուք տեսե՞լ եք երեկոյան հանրահավաքների ժամանակ կարմիր բերետավոր, գոնե մեկ անգամ նկատե՞լ եք նրանց։

- Ընդդիմությունն ասում է՝ ցերեկը մարդիկ քիչ են, չենք կարողանում ոստիկանական պատը ճեղքել։

- Նորից եմ ասում՝ երբ շատ է լինում մարդկանց թիվը, կարմիր բերետավոր տեսնո՞ւմ եք հրապարակում։

- Հանրապետության հրապարակում կանգնած քաղաքացիները կասկածներ ունեն, որ ընդդիմությունը միտումնավոր պրոցեսը տանում է տապալման։ Դուք է՞լ եք այդպես մտածում։

- Չեմ կարող նման բան ասել, չեմ կարծում, որ միտումնավոր է, պարզապես ընդդիմության մեջ վաղուց ամբիցիաների խնդիր կա, եւ դա շարունակվում է։

- Քաղաքացիները լիդեր են ուզում տեսնել։

- Լիդեր հենց այնպես չի լինում, լիդերը պետք է ապացուցի, որ ինքը լիդեր է։ Փաշինյանին էլ ոչ ոք չէր տեսնում, անգամ 2018 թվականին չէին տեսնում, մինչեւ ընթացքում ապացուցեց, որ կարող է լիդեր լինել։ Չեմ կարծում, որ երբ Լեւոն Տեր-Պետրոսյանն աշխատում էր Մատենադարանում, նրան որեւէ մեկը լիդեր էր տեսնում։

- Երբ հանրահավաքի կազմակերպիչները սկսում են ելույթ ունենալ, մարդիկ սկսում են հեռանալ հրապարակից, ինչո՞ւ։

- Ես էլ եմ հեռանում։

- Ելույթի փոխարեն ի՞նչ պետք է անեն։

- Գործողություններ՝ երբ մարդ կա, գործողությունը չեն անում 20 հոգով, անում են 20 հազարով։