«Իմ քայլի» պատգամավորներին Արցախից հետ են կանչում, որ մասնակցեն նիստին

Արցախ մեկնած պատգամավորները ճանապարհի կեսից հետ են գալիս, որ կարողանան մասնակցել ԱԺ նիստի հերթական փորձին: Հիշեցնենք, որ այսօր առավոտյան ԱԺ արտահերթ նիստը չկայացավ, քանի որ «Իմ քայլը» խմբակցության պատգամավորների մեծ մասը մեկնել էր Արցախ, և դահլիճում բավարար թվով պատգամավոր չկար, որ քվորում ապահովվեր:

«Իմ քայլի» պատգամավորներից Սիսակ Գաբրիելյանն ասաց, որ ով տեղ չի հասել, մի մասը հետ կգա, որ հասցնեն նիստին: Նրա խոսքով՝ ինքն էլ պիտի մեկներ, բայց չի մեկնել: Տարօրինակ է, որ «Իմ քայլը» խմբակցության այցն է սա Արցախ, և նրանք չեն իմացել, որ այսօր նիստ կա կամ իմացել, չեն կարողացել այնպես կազմակերպել, որ նիստը չտապալվի:

Արցախ մեկնածների խմբի մեջ է նաև «Իմ քայլը» խմբակցության ղեկավար Լիլիթ Մակունցը: ԱԺ նախագահ Արարատ Միրզոյանը, սակայն, այստեղ է: Հավանաբար նա է զանգել պատգամավորներին հետ կանչել, որ չորս ժամ անց նորից գումարվող նիստը չտապալվի: