Այնքան եմ խոսել, ընդդիմացել, ի՞նչ արդյունքի ենք հասել, ոչ մի. Աելիտա Դոլուխանյան

Բրյուսովի անվան պետական լեզվահասարակագիտական համալսարանում արդեն մի քանի օր է դասապրոցեսը կանգ է առել: Բուհը մտադիր են միավորել Մանկավարժական համալսարանի եւ ֆիզկուլինստիտուտի հետ, ուստի դասադուլ ու բողոքի ցույցեր են սկսվել: Բրյուսովի ռեկտոր Կարինե Հարությունյանի պաշտոնավարման առաջին ժամկետը լրանում է հունվարին: Նա կարող է վերընտրվել երկու անգամ, սակայն ակնհայտ է, որ իշխանությունը նրան չի տեսնում միավորված բուհերի ռեկտորի պաշտոնին: Իսկ Մանկավարժականի դասախոսներն ու ռեկտորը լուռ են: Տպավարություն է, թե այս որոշումը մտահոգել է միայն բրյուսովցիներին:

ՀՀ ԳԱԱ թղթակից անդամ, բանասիրական գիտությունների դոկտոր, պրոֆեսոր, ՀՊՄՀ Հայ հին և միջնադարյան գրականության մեթոդիկայի ամբիոնի վարիչ, գրականագետ Աելիտա Դոլուխանյանը մեզ հետ զրույցում նշեց, որ պայքարելուց և արդյունքի չհասնելուց թևաթափ է եղել: «Այնքան եմ խոսել, ընդդիմացել, ի՞նչ արդյունքի ենք հասել, ոչ մի: Երբ բուհերից փորձում էին հայոց լեզուն և հայ գրականությունն օտարել, անգամ գրավոր դիմել եմ վարչապետ Նիկոլ Փաշինյանին և այն ժամանակվա նախագահ Արմեն Սարգսյանին, սակայն ոչ մի արձագանք չեմ ստացել», - պատմում է պրոֆեսորը:

Ըստ նրա` այս իշխանությունները, եթե մի բան որոշում են, նրանց հետ պահելն իրենց որոշումից գրեթե անհնար է. «Եթե որոշել են` անելու են, խոսենք, չխոսենք, մեկ է», - նշում է Դոլուխանյանը: «Բուհերն այսպես ձևավորվել են Խորհրդային միության տարիներին: Ես երբեք չեմ եղել Խորհրդային միության ջատագովը, սակայն կրթության և գիտության առումով ԽՍՀՄ-ն աշխարհում առաջինն է եղել, իսկ Մանկավարժականը, Բրյուսովը, Ֆիզիկական կուլտուրայի և սպորտի ինստիտուտը, այլ բուհեր ձևավորվել են հենց այդ տարիներին: Միջազգային տվյալների համաձայն` 1970-ականներից մինչև 1985 թվականը Հայաստանը աշխարհում տասներորդ տեղում է եղել: Ի՞նչ է ստացվում` մարդիկ մի բան իմացել են, նման կրթական համակարգ ստեղծելուց առաջ: Ես 27 տարեկանից դասախոսում եմ, սակայն այսօրվա որոշումներն ինձ համար անհասկանալի են: Ես գիտության մարդ եմ»- նշում է գրականագետը:

Մտավախություն չունե՞ք, որ բուհերի միավորումից հետո շատ դասախոսներ գործազուրկ կդառնան, Աելիտա Դոլուխանյանն ասաց. «Ես ծանոթ չեմ այս որոշման հիմքին, ոչնչից տեղյակ չեմ: Իմ հայացքներն ի՞նչ կարող են փոխել: Երբ հայոց լեզվի և հայ գրականության նկատմամբ անտարբերության ալիք բարձրացավ, երբ բուհերում որոշվեց, որ հայագիտությունը պետք է դառնա կամընտրական, ես շատ մեծ և մանրամասն նամակ գրեցի վարչապետ Փաշինյանին և նախկին նախագահ Արմեն Սարգսյանին, սակայն ոչ մի արձագանք չստացա: Սա արդեն հուշում է, որ մտավարականության խոսքն անիմաստ է: Այժմ Հայ բանասիրության ֆակուլտետ ընդունվելու համար դիմորդը հանձնում է միայն Հայոց լեզու գրավոր և անգլերեն քննությունները: Ի՞նչ է ստացվում, որ բանասիրական ընդունվող դիմորդը հայ գրականություն կարող է ընդհանրապես չուսումնասիրել: Խորենացի, Թումանյան, Չարենց ու Բակունց կարդալն այլևս պարտադիր պայման չէ, իսկ ազգն ուժեղ է իր գրականությամբ», - կարծում է Աելիտա Դոլուխանյանը: