Մեզ պետք է հարգեն անընդհատ, չեմ սիրում մարտի 8-ը
«Հրապարակի» զրուցակիցն է ՀՀ վաստակավոր արտիստ Ջուլիետա Ստեփանյանը:
- Տիկին Ջուլիետա, սիրո՞ւմ եք մարտի 8-ը:
- Չէ, ընդհանրապես չեմ սիրում: Միակ տոնն է, որ բոլորովին չեմ սիրում: Կարծում եմ, որ այն ճիշտ տոն չէ: Մեզ պետք է հարգեն անընդհատ, ոչ թե միայն մարտի 8-ին:
- Իսկ ինչը՞ կարող է փչացնել կնոջ երջանկությունը:
- Տրամադրությունը: Մարդու հոգին պետք է խաղաղ լինի, հանգիստ լինի, որ տրամադրությունն էլ բարձր լինի:
- Ինչպիսի՞ն է այսօրվա հայ կնոջ կերպարը:
- Հայ կինը միշտ էլ տանջվող, բանող, ընտանիքին նվիրված է եղել: Մշտապես զավակների, թոռների հետ, նրանց կողքին: Կարծում եմ, այսօր երիտասարդները փոխվել են: Ուրիշների մասին, որպեսզի չխոսեմ իմ աղջիկների մասին, ասեմ՝ ճիշտ է նրանք ևս շատ հոգատար են, բայց այսօրվա կնոջ պահանջները մի փոքր այլ են: Հայ կինը պետք է ոչ թե տանջված լինի, այլ` սիրող և սիրվող: Կնոջը պիտի սիրեն: Եթե կինն իրեն սիրված է զգում, նշանակում է` սիրում է բոլորին: Այսօրվա հայ կնոջ մեջ պարտադրողականության ինչ-որ բան կա: Այսօրվա հայ կինը կարծում է, որ պարտադիր չէ ամեն ինչ անելը, աշխատանքը պետք է արվի հավասար` թե կնոջ, թե տղամարդու կողմից: Անգամ մտածում է, որ իր փոխարեն էլ ինչ-որ բաներ պետք է անեն: Շատ են տարբեվում: Արտաքինը նույնպես շատ է փոխվել:
- Ժամանակակից կնոջ արտաքինում կա՞ մի բան, որ Ձեզ դուր չի գալիս:
- Հաստացրած շուրթերը: Երբ խոսում եմ ու զգում եմ, որ դիմացինիս շուրթերն իրենը չէ, տհաճ է:
- Ինչը՞ կարող է կնոջը չարացնել:
- Անտարբերությունը: Անտարբերությունը շատ է չարացնում կնոջը: Բամբասանքը նույնպես չարացնում է կնոջը:
- Կինը ուժեղ է, եթե…
- Կինն ուժեղ է, երբ ճիշտ է մտածում: Կինն ուժեղ է հատկապես, երբ սիրված է: Եթե կինն ընտանիքում սիրված եղավ` ամուսնու և երեխաների կողմից, ապա անպայման ուժեղ է դառնում:
Կարծիքներ