Մեծ Բրիտանիան չգիտի, որ մեր թշնամին Ադրբեջանն է, ոչ թե Ռուսաստանը 

Մեծ Բրիտանիայի պաշտպանության փոխնախարար Ջեյմս Հիպին օրերս հայտարարել էր, թե Լոնդոնը պատրաստ է աջակցել Հայաստանին «Ռուսաստանից բխող սպառնալիքների» դեպքում: Նա նաեւ ողջունել էր ՀՀ իշխանությունների հայտարարությունը՝ Հայաստանի մասնակցությունը ՀԱՊԿ-ին սառեցնելու մասին։ Պաշտոնական Լոնդոնը Երեւանի այս որոշումը գնահատել է որպես «Հայաստանի ինքնիշխան իրավունքի իրականացում»։

Այս հայտարարությունն, իհարկե, արվել է ՀՀ շահերին հակադրվող Փաշինյանի ու նրա թիմակիցների թողտվությամբ եւ վերջիններիս խրախուսելու համար: Փաշինյանը գաղտնի ու կասկածելի հանդիպումներ է ունենում Մեծ Բրիտանիայի գաղտնի հետախուզական ծառայության ղեկավար Ռիչարդ Մուրի հետ: Իսկ այս պաշտոնյան ակնհայտ ադրբեջանաթուրքամետ է, Մեծ Թուրանի աջակիցն ու ջատագովը: Այլեւս անհերքելի է, որ ՀՀ իշխանությունը կասկածելի քայլեր են կատարում Հայաստանի եւ նրա քաղաքացու թիկունքում, առանց հաշվի առնելու երկրի ու քաղաքացու շահը: 
Պատմության մեջ Մեծ Բրիտանիան երբեւէ չի եղել ՀՀ դաշնակիցը, չի եղել բարեկամը` ինչպես ասենք` Ֆրանսիան: Երբեւէ հայաստանանպաստ քայլ, հայտարարություն չի արել: Պատմական ասույթ է դարձել, որ բրիտանական նավերը մեր սարերը չեն բարձրանա: Այդ ինչո՞ւ հանկարծ Բրիտանիայի պաշտպանական ոլորտի պաշտոնյան որոշեց, որ Հայաստանին պետք է պաշտպանել Ռուսաստանից:

Մեծ Բրիտանիան, ինչպես եվրոպական մյուս երկրները, չեն «հալվում» Հայաստանին աջակցելու ցանկությունից: Նրանց պետք է թուլացնել Ռուսաստանը, հակառուսական ճակատ ստեղծել Հայաստանում ու հիմա` Ուկրաինայից հետո, որոշել են որպես գործիք օգտագործել Հայաստանը: Այդ դերում լավ են գործածվում նաեւ ՀՀ իշխանությունները: Մինչդեռ դրան դեմ է հայաստանյան հասարակությունը: 

Որքան էլ իշխանական քարոզ է գնում, որ տարածաշրջանից դուրս մղվի Ռուսաստանը եւ այստեղ բերեն Եվրոպայի պաշտոնական ներկայացուցիչ Թուրքիային` իր կրտսեր եղբայր Ադրբեջանով, հայաստանյան հասարակությունը դեմ է այդ հակապետական ու հակազգային քայլերին: Ուստի, բրիտանացի պաշտոնյաներին պետք է եւս մեկ անգամ հիշեցնել, որ Հայաստանի թշնամին ոչ թե Ռուսաստանն է, այլ Ադրբեջանն ու Թուրքիան: Ու, ինչպես կձեւակերպեր առաջին ազգընտիրը. տղա եք, նրանցից պաշտպանեք: Թե չէ եկել, մտնում եք մեր ու մեր դաշնակցի «մատի ու մատանու» արանքը, որ ի՞նչ անեք: