«Հրապարակ». 2003 թվականից այս կողմ ԿԸՀ-ն ընտրությունների արդյունքների վրա չի կարող ազդել

Երեկ ՔՊ-ական պատգամավորից ԿԸՀ նախագահ դարձած Վահագն Հովակիմյանի գլխավորությամբ կայացավ ԿԸՀ անդրանիկ նիստը, որի ընթացքում ընտրվեցին ԿԸՀ նոր փոխնախագահ եւ քարտուղար։ Փոխնախագահ դարձավ նախկինների կադր Նունե Հովհաննիսյանը, քարտուղար` նորից ԿԸՀ նախկին անդամ Արմեն Սմբատյանը: Վերջինս չթաքցրեց իր նեղվածությունը մեր հոդվածներից, որտեղ գրել էինք, որ նախկինում ՀՀԿ-ին են ծառայել, հիմա էլ ՔՊ-ին կծառայեն, եւ ընդգծեց․ «Մեզ վրա կա մեծ բեռ՝ ապացուցելու, որ ԿԸՀ-ն ծառայում է ոչ թե իշխանությանը, այլ՝ ժողովրդին»։ Նիստից հետո մի քանի հարց ուղղեցինք նորընտիր նախագահ Վահագն Հովակիմյանին, ով զբաղեցրեց իրենց կողմից այդքան քննադատված «թվանկարիչ» Տիգրան Մուկուչյանի կաբինետը։

- Դուք Տիգրան Մուկուչյանի՝ անցած տարիների գործունեությունն ինչպե՞ս եք գնահատում։

- Ես անկեղծ եմ հիմա ասում՝ պարոն Մուկուչյանը պրոֆեսիոնալ է, նա Հայաստանում վարչական իրավունքի լավագույն մասնագետներից է, նաեւ մեր նախկին աշխատանքային շփումները, որ ունեցել ենք, եղել են փոխադարձ հարգանքով ու մասնագիտական հարթության մեջ։

- Բայց այդ հարգանքը ձեր քաղաքական թիմի ու անձամբ Նիկոլ Փաշինյանի կողմից այդքան էլ չի նկատվել։ Հիշում ենք՝ երբ Փաշինյանն ընդդիմադիր պատգամավոր էր, ինչ ձեւակերպումներ էր տալիս Մուկուչյանի հասցեին՝ «թվանկարիչ», «մանիպուլյատոր» եւ այլն։

- Պարոն Մակարյան, ես հասկանում եմ, որ Դուք՝ որպես լրագրող, կարող եք անընդհատ հնչեցնել քաղաքական բնույթի հարցեր, ես զերծ մնամ էդ հարցերին պատասխանելուց, եւ Դուք հայտնվեք շահադիտական վիճակում, չէ՞։ Ես ամբողջ կյանքում աշխատում եմ ապրել օրենքով, ու կապ չունի՝ ինչ գործունեություն եմ ծավալում։ Էս դեպքում ես ստանձնել եմ սահմանադրական պարտականություններ, Սահմանադրությամբ այդպես է նախատեսված, որ ես պիտի չզբաղվեմ քաղաքական գործունեությամբ, չլինեմ կուսակցական եւ պահպանեմ քաղաքական չեզոքություն։ Դուք կարող եք հնչեցել, որովհետեւ դա Ձեր ազատությունն է, բայց ես չեմ կարողանալու, չէ՞, իրավունք չունեմ այդ հարցին պատասխանել, Դուք էլ ասեք՝ ոչ մի բան չասաց, չկարողացավ պատասխանել։

- Բայց նախկինում Դուք բացասական գնահատականներ եք տվել Մուկուչյանի գործունեությանը, այսօր ասում եք՝ պրոֆեսիոնալ է։

- Իմ գնահատականները, փառք Աստծու, քանի որ ես թերթում եմ աշխատել, տպվում են։ Բերեք էդ հոդվածները, որոնց մեջ Ձեր ասած էդ գնահատականները կան։

- Ձեր քաղաքական առաջնորդն է այդ գնահատականները տվել։

- Նորից՝ ձեր քաղաքական առաջնորդը։ Ես ներկայացնում եմ Կենտրոնական ընտրական հանձնաժողով սահմանադրական մարմինը, ընտրվել եմ Ազգային ժողովի կողմից այդ մարմնի ղեկավար։ Ես այլեւս զբաղեցնում եմ ապաքաղաքական պաշտոն եւ չեմ կարող Ձեր հարցին հիմա համարժեք պատասխան տալ։

- Լավ, խնդրում եմ ասեք` ԿԸՀ-ն ընտրությունների արդյունքների վրա ազդելու հնարավորություն ունի՞։

- Ես ասեմ, որ ԿԸՀ-ն առնվազն, եթե օրենսդրության փոփոխություններով նայենք, բավականին շատ երկար ժամանակ է՝ չի կարող ազդել ընտրությունների արդյունքների վրա։

- Որքա՞ն ժամանակ է։

- Կարող եմ ասել՝ 2003 թվականից այս կողմ ԿԸՀ-ն արդյունքների վրա չի կարող ազդել։ Բայց Կենտրոնական ընտրական հանձնաժողովը դրսում տեղի ունեցող գործընթացների վրա՝ իրավական գնահատական տալու տեսանկյունից, էդտեղ ինքն ունի լիազորություններ։ Այսինքն՝ որեւէ մեկը, ասենք, քարոզչություն է խախտել․․․

- Դրանք կարող են էական ազդեցություն չունենալ, ես նկատի ունեմ՝ վերջնական թիվը, որ գալիս է ԿԸՀ, կարո՞ղ է ԿԸՀ նախագահը թվային մանիպուլյացիայի դիմել։

- Ոչ։

- Այսինքն՝ առնվազն 2003 թվականից հետո բոլոր ընտրություններն էլ բաց ու թափանցիկ են անցել։

- Չէ, դա եմ ասում, որ տեղամասերում տեղի ունեցող գործընթացները, քարոզչության ընթացքում տեղի ունեցող գործընթացները, դա համապետական ընտրությունների մասին եմ ասում, որովհետեւ ՏԻՄ-երում ԿԸՀ-ն, կարելի է ասել, վերահսկողի դերակատարություն ունի, բայց անմիջականորեն չի միջամտում, այստեղ ԿԸՀ-ն ընդամենը իրավական գնահատական տալու լիազորություն ունի, որը, ասում եմ, երբ որ, օրինակ, շատ են խախտումները, ինքը պիտի էդտեղից հետեւություն անի։

- Այսինքն՝ պարոն Մուկուչյանը բաց եւ թափանցի՞կ է աշխատել այս տարիներին, օրենքի խախտում թույլ չի՞ տվել։

- Օրենքի խախտում՝ ոչ։ Բայց որ, ասենք, դրսում եղել է օրենքի խախտում, եւ ես կարող էի իր իրավական գնահատականի հետ համաձայն չլինել, դա փաստ է։

- Բայց մշտապես մեղադրել են «խեղճ» Մուկուչյանին ու ԿԸՀ անդամներին, որ իրենք վերջում մանիպուլյացիաների են դիմել, իշխանության օգտին «թվեր նկարել»։

- Չէ, իրականում հենց էդ որակումներ տալը՝ «թվեր նկարել» եւ այլն, ինստիտուտներ է փչացնում, նկատի ունեմ՝ հանրային ընկալման մեջ։

- Փաստորեն, ձեր քաղաքական թիմը փչացրել է ԿԸՀ-ն՝ որպես ինստիտուտ, որովհետեւ Նիկոլ Փաշինյանն էր «թվանկարչության» մեջ մեղադրում Տիգրան Մուկուչյանին։

- Էլի նորից եկաք մի հարցադրման, որն ի սկզբանե ասացի, որ չեմ կարող․․․

- Ի դեպ, հիմա էլ ասում են, որ քաղաքականացված անձին ԿԸՀ նախագահ նշանակելն է ավելի շատ փչացնում այս ինստիտուտը։

- Ես կրկնում եմ՝ անձերին պիտի ընտրեն կենսագրությամբ, ու երբեւիցե որեւէ պաշտոնյայի ընտրելու հարցում պիտի դերակատարություն չունենա անցյալում իր կուսակցական լինելը կամ, ասենք, լրագրող լինելը, ՀԿ անդամ լինելը։

- Ձեռքներդ դրեք Ձեր խղճին ու ասեք՝ եթե նախորդ իշխանության օրոք այսպես լիներ` Ձեզ նման մեկը, որեւէ քաղաքական անձ, կուսակցական դառնար ԿԸՀ նախագահ, նորից նո՞ւյնը կասեիք։

- Այո։ Ես նույնիսկ ավելին կարող եմ ասել՝ նույն էդ թեման, երբ որ եղել է, օրինակ, Հրայր Թովմասյանի հետ կապված, ինձ համար խնդիր չի եղել, որ Հրայր Թովմասյանը նախկինում կուսակցական է եղել, ինձ համար հետագայում զուտ խնդիր է եղել, որ նա, լինելով Սահմանադրական դատարանի նախագահ, իրեն թույլ է տվել քաղաքական հայտարարություն անել։ Այսինքն՝ նախկին իր մասնագիտությունը, գործունեությունը երբեք չի եղել քննադատության առարկա։ Այ, եթե ինքը գա ու իր պաշտոնական դիրքն օգտագործելով՝ իր նախկին կուսակից ընկերների շահերը սպասարկի, այ, էստեղ արդեն անմիջական օրենքի հետ էլ ենք լրջագույն խնդիրներ ունենալու։

- Դուք մտավախություն չունե՞ք, որ այն գնահատականները, որ այս տարիներին հնչեցնում էին Մուկուչյանի հասցեին, վաղը Ձեր հասցեին են հնչեցնելու՝ ասելով, որ Դուք այս իշխանության մարդն եք, նրա շահերն եք սպասարկելու, ասելու են` «թիվ եք նկարում», այսօրվա «թվանկարիչն» էլ Դուք եք։

- Էսպես ասեմ՝ ես ամեն ինչ կանեմ, որպեսզի ընտրական համակարգի պատիվը բարձր պահեմ, բայց ես Ձեր ասած հնարավորությունը չեմ բացառում, որովհետեւ, նույնիսկ դեռ չընտրված, արդեն ինչ ասես՝ ասել եք իմ հասցեին թե՛ Դուք, թե՛ հասարակական սեկտորի ներկայացուցիչները։ Ես իմ կողմից, կրկնում եմ, որպես ԿԸՀ նախագահ, ամեն ինչ անելու եմ՝ ի շահ Հայաստանի Հանրապետության, ի շահ մեր ընտրական համակարգի, որպեսզի ընտրողը մեկ կաթիլ անգամ կասկած չունենա, որ իր ձայնով է որոշվելու։ Բայց թե ինչ գնահատականներ կլինեն Ձեր կողմից․․․

- Ես՝ «ջհանդամ», կարեւորը՝ Դանիել Իոաննիսյանն ու ՀԿ-ները Ձեր հասցեին գնահատականներ չհնչեցնեն։

- Դա, խնդրում եմ, պարոն Իոաննիսյանին արդեն։