Բաներ կան՝ տեսել եմ, բայց չեմ ուզենա մեկնաբանեմ․ պարտված թեկնածու Արթուր Ղազարյան

Աբովյանի ընտրություններում պարտված թեկնածուներից Արթուր Ղազարյանը, որը նախնական հաշվարկով ընդամենը 139 ձայն է հավաքել, կարծում է, որ ընտրությունները կազմակերպված էին շատ բարձր մակարդակով, և աբովյանցին իրեն արժանի ընտրություն է արել։ Հիշեցնենք, որ այդ արժանի ընտրության արդյունքում հաղթեց գործող քաղաքապետ, ԲՀԿ-ի աջակցությունը վայելող Վահագն Գևորգյանը։ Նրան ընդամենը 400 ձայնով զիջեց ՔՊ-ական թեկնածու Գրիգոր Գուլյանը։

Արթուր Ղազարյանը Hraparak.am-ի հետ զրույցում հաջողություններ մաղթեց հաղթած թեկնածուին։ Ղազարյանն ինքնառաջադրված էր, որևէ քաղաքական ուժ, ըստ նրա, իրեն չէր սատարում։

-Պարոն Ղազարյան, հասարակությունը, այդ թվում՝ աբովյանցիները, Ձեր և մյուս թեկնածուների մասին շատ տեղեկացված չէին, քանզի պայքարը կարծես ընթանում էր երկու հոգու միջև՝ ՔՊ-ի թեկնածուի և գործող քաղաքապետի։ Եվ Դուք ստվերում մնացիք այդ ֆոնին։ Արդյոք սա ազդե՞ց Ձեզ քվեների վրա։

-Ինձ թվում է՝ դա վերլուծաբանների խնդիրն է, իրենք կփորձեն ինչ-որ բաներ գտնել կամ չգտնել։

-Դուք, ամեն դեպքում, զգո՞ւմ էիք, որ պայքարը երկու թեկնածուների միջև է ընթանում, և Դուք հայտնվել էիք, այսպես ասած, լուսանցքում կամ ստվերում։

-Չէ, ասացի, չկար տենց բան, բոլորի համար հավասար պայմաններ էին ստեղծված։ Կարող է սատարող ուժեր կային պետական ռեսուրսներից, բայց դա ինձ ոչ մի բան չի ասում։ Աբովյանցին իր քայլն արեց ու իր որոշումը կայացրեց՝ անկախ սատարող ուժերից, անկախ ամեն ինչից։

-Իսկ պետական ռեսուրսի չարաշահում նկատե՞լ եք, քանզի դժգոհում էին, որ Կոտայքի մարզպետն իր մարզպետական ռեսուրսներն էր ներդրել, որ անցկացներ իրենց թեկնածուին։

-Ինձ թվում է՝ դիտորդական խմբերն իրենց մեկնաբանությունները կտան։

-Անկախ դիտորդների մեկնաբանություններից՝ Դուք անձամբ տեսե՞լ եք պետական ռեսուրսի չարաշահում։

-Բաներ կան՝ տեսել եմ, բայց էլի չեմ ուզենա մեկնաբանեմ։ Բաներ կան՝ հա, ակներև է եղել, թե՛ պատգամավորների քանակից, թե՛ Աբովյան մտած նախարարների քանակից։

-ՔՊ-ի թեկնածուի օգտի՞ն, թե՞ այլ։

-Կապ չունի, նախարարները էդքան չէին գալիս Աբովյան։

-Այսինքն՝ այս ամենն ազդե՞լ է վատ իմաստով մյուս թեկնածուների քվեների վրա։

-Չէ, պետք չի տենց միաժամանակ ասել՝ վատ իմաստով։ Մենք հիմա ի՞նչ ենք անում, վերլուծում ենք՝ արվել է, թե՝ ոչ, չէ՞։ Այսինքն՝ գնահատական չենք տալիս, թե վատ իմաստով է արվել, թե լավ։ Բայց տենց բան արվել է։

-Շնորհավորելո՞ւ եք վերընտրված քաղաքապետին։

-Միանշանակ, իհարկե։ Չէ՞ որ ես էլ եմ Աբովյանի քաղաքացի, ու ես էլ եմ ապրում էս քաղաքում։ Ու ես էլ մնացած աբովյանցիներին կմիանամ, ովքեր որ շնորհավորանքներին են միացել բնականոն քաղաքացիական կյանքը ապրելու համար։