Ֆորս մաժորային իրավիճակում գործատուն իրավունք ունի չվարձատրել. Քաղսի համայնքի ղեկավար
Պարետի որոշմամբ մայիսի 18-ից վերաբացվեցին մանկապատեզները: Եթե քաղաքային համայնքներում մանկապարտեզները որոշ չափով աշխատում են, ապա գյուղական համայնքներում մանկապարտեզները դեռ փակ են:
Կոտայքի մարզի Քաղսի համայնքի մանկապարտեզը նույնպես անորոշ ժամանակով չի գործի: Մեզ դիմած մանկապարտեզի աշխատակիցը նշում է, որ գյուղապետը այլեւս չի պատրաստվում անգամ հարկադիր պարապուրդ վճարել, աշխատակիցներն էլ՝ հայտնվել են անելանելի վիճակում:
Քաղսի համայնքի ղեկավար Ռաֆայել Գրիգորյանը մեզ հետ զրույցում ասաց, որ համայնքի բյուջեյով հնարավոր չի աշխատակիցներին աշխատավարձ վճարել. «Խնդիրը երկու կողմ ունի՝ իրավական եւ բարոյական: Իրավական կողմը այն է, որ 156 հադվածի 6-րդ, եւ 7-րդ կետը հստակ ասում է, թե ինչի համար իրենք չեն վարձատրվում, այսինքն՝ երկրում ֆորս մաժորային իրավիճակում գործատուն իրավունք ունի չվարձատրել: Հիմա իրենց 2 ամիս վարձատրել ենք:
Քանի որ, այս վիճակը երկարացավ եւ ծայրն էլ չի երեւում, որոշեցի, որ մայիս ամսին տնօրենը, հաշվապահը եւ դաստիարակները, ովքեր հեռավար ուսուցում են անցել վարձատրել աշխատավարձի 2/3-ի չափով: Հունիս ամսից դաստիարակներն էլ չեն վարձատրվի, որովհետեւ, դաստիարակների խոսքով՝ այլեւս հեռավար ուսուցում չեն կարողանում կազմակերպել, որ դա ձեւական բնույթ է կրում: Երեխաները չեն միանում, ծնողներն էլ՝ չեն զբաղվում: Բարոյական կողմ էլ այն է, որ եթե աշխատողները չեն աշխատում, իրենցից ավելի ծանր վիճակում գտնվող քաղաքացիներ ունենք, որ այս ամսվա մեջ մտադիր եմ ալյուր եւ դիմակներ բաժանել: Շատ դիմումներ ունեմ, որ վիրահատության համար մարդիկ գումար են խնդրում, քանի որ ուրիշ ճար էլ չունեն: Այս ամենը ես հանգամանորեն բացատրել եմ եւ ասել եմ, որ ձեզ աշխատանքից չեմ ազատում, բայց պետք է հասկանան, որ չեն վարձատրվի: Որ ահազանգել են, մի քիչ տարօրինակ ա հնչում իմ համար, որովհետեւ աշխատակիցները բոլորը ներկա են եղել, բացատրել եմ իրենց ու ըմբռնումով են մոտեցել , ինչը որ շատ գովելի է»:
-Մի գուցե համարձակություն չեն ունեցել Ձեր դեմ արտահայտվելու:
-Չեմ կարծում, որ իմ պաշտոնավարման ընթացքում այնպիսի ձեւ եմ դրսեւորել, որ իմ աշխատակիցը համարձակություն չունենա, իր խնդիրը բարձրաձայնելու: Այս հարցը մարզպետի հետ չեմ քննարկել, ավագանու հետ եմ քննարկել եւ ընդհանուր որոշման եկել:
Զրուցեցինք նաեւ մի քանի համայնքի ղեկավարների հետ, պարզելու, թե այլ գյուղական համայնքներում մանկապարտեզի աշխատակիցները վարձատրվո՞ւմ են, թե ո՞չ:
Նոր Գեղիի համայնքի ղեկավար` Վարդան Պապյանը մեզ հետ զրույցում ասաց, որ համայնքում 3 մանկապարտեզներ կան, այս պահին չեն գործում, սակայն աշխատակիցները վարձատրվում են 100% -ի չափով. «Եթե այս իրավիճակը երկարաձգվի մենք մտադիր ենք վճարել մինչեւ վերջ: Բյուջեն չունի հնավարություններ, ուղղակի մեր աշխատակազմը, այդ թվում՝ ես կամավոր ձեւով կհրաժարվենք մեր աշխատավարձի ինչ-որ մասից, որ կարողանանք մնացածներին 2/3%-ի վճարենք»:
«Մենք հարցում արեցինք ծնողներին, եկանք այն եզրակացության, որ առայժմ մանկապարտեզ դեռ չենք բացելու, բայց աշխատակազմը պատրաստ է ցանկացած պահին անցնել աշխատանքի: Այս պահին հարկադիր պարապուրդ ենք վճարում աշխատավարձի՝ 2/3-ի չափով: Մենք շահագրգռված ենք որեւէ մեկին աշխատանքից չազատել: Որքան կարող ենք այս իրավիճակին դիմանալ եւ հաղթահարել, այնպես պետք է անենք, որ օրենքի շրջանակներում մարդկանց օգտակար լինենք»,-մեզ հետ զրույցում ասաց Լեռնանիստ համայնքի ղեկավար՝ Արտյոմ Հայրապետյանը:
Կարծիքներ