Կոնկրետ ինձ համար անհասկանալի է իրար փոխադարձ դավաճան անվանելը

Ապրիլի 3-ին «Լաթար» հյուրանոցում տեղի է ունեցել նոր ստեղծվող հերթական կուսակցության համագումարը, որի ձեւավորման հիմքում կանգնած են ՀՀԿ-ից դուրս եկած մի խումբ գործիչներ՝ Ֆիրդուս Զաքարյան, Լեռնիկ Ալեքսանյան եւ այլք։ Կուսակցությունը կոչվում է «Կայունություն», նախագահը Ֆիրդուս Զաքարյանն է՝ սփյուռքի նախարարության աշխատակազմի նախկին ղեկավարը։ Սակայն կուսակցությունը դեռ չի գրանցվել։

Զաքարյանն ասաց՝ գրանցման համար անհրաժեշտ պայմաններն ապահովել են՝ համագումարին 300 հոգուց ավելի մարդ է մասնակցել։ Լեռնիկ Ալեքսանյանն էլ, խոսելով կուսակցության ստեղծման մասին, ասաց, որ ի սկզբանե իրենք հասարակական կազմակերպություն էին ստեղծել՝ երբեմնի «Միասնություն» դաշինքի գաղափարակիրների ակումբ, եւ երկրում առկա քաղաքական իրավիճակից ելնելով՝ որոշեցին այդ հենքի վրա կուսակցություն ստեղծել։ Ալեքսանյանը նաեւ նշեց, որ իրենց կուսակցությունում նախկին ՀՀԿ-ականներ էլի կան, ասենք՝ ավելի շատ՝ ներքին օղակներից, մարզերից։

- Իսկ ֆինանսական հարցերն ինչպե՞ս եք լուծելու, կուսակցություն բացելը մեծ ծախսեր է պահանջում։

- Ֆինանսական հարցերն ամենաբարդն է, իհարկե, բայց էդքան մեծ ծախսեր չի պահանջում։ Մենք շատ համեստ ենք ամեն ինչին վերաբերվում՝ սկսած գրասենյակից, վերջացրած մյուս հարցերով․ քարտուղարուհի, գործավար, բան՝ մենք ենք աշխատում դրա փոխարեն, մեր ակտիվիստներն են աշխատում։ Որոշ ծախսեր հավաքում ենք, ասեմ՝ անդամավճար, բայց մի 50-60 մարդ օգնում է, առայժմ փորձում ենք էդպես լուծել հարցերը, ու, պատկերացրեք, էդքան շատ մեծ ծախսեր չեն եղել, հետագայում կտեսնենք։ Հիմնականում հույսներս դրել ենք, որ անդամավճարների հավաքման տեսքով կփորձենք լուծել ու էդքան շատ մեծ ծախսեր չենք անելու, չենք էլ կարող անել։

- Ընտրություններին մասնակցելո՞ւ եք, կուսակցության նպատակը դա՞ էր՝ հավանական ընտրություններից առաջ կուսակցություն բացել։

- Չէ, նպատակն ընտրություններին մասնակցելը չի եղել, նպատակը քաղաքական դաշտում էդ թեւը, էդ ուղղությունը, որը ձախակողմյան է, բաց էր, նպատակն էդ բաց դաշտը լրացնելն է, եւ, ինչո՞ւ չէ, եթե հասցրինք եւ լուրջ ուժ հավաքեցինք, կարող է նաեւ մասնակցենք ընտրություններին։ Կարճ է ժամանակը, դրա համար եմ էդպես կասկածելով խոսում։

- Հիմա, այս նախընտրական շրջանում, եթե, իհարկե, ընտրություններ տեղի ունենան, բազմաթիվ կուսակցություններ են բացվում, մի մասը՝ կեղծ ընդդիմության ֆունկցիայով, իշխանության կցորդն են լինելու, մյուս մասը՝ իրական․ դուք ինչպե՞ս եք դիրքավորվելու այս միջավայրում։

- Գիտե՞ք ինչ, ես էդ շատ լավ հասկանում եմ, որ էսօր կուսակցություն ստեղծելը շնորհակալ գործ չէ, լավ չի նայվում ո՛չ հասարակության կողմից, ո՛չ էլ, նույնիսկ, մեր կողմից։ Դրա համար մենք ամենասկզբում ստեղծեցինք հասարակական կազմակերպություն, բայց նաեւ լինել ինչ-որ մեկի կցորդը, ինչ-որ մեկի ստեղծագործությունը կամ թեկուզ ֆինանսապես օգտվել ինչ-որ մեկից, դա մեզ ճանաչողները գիտեն, որ մենք երբեք նման բան չենք անի, մենք սկզբունքային դեմ ենք դրան։ 

- Իսկ դուք արմատական ընդդիմությո՞ւն եք լինելու գործող վարչակարգին։

- Բացարձակ։

- Չե՞ք քննադատելու Փաշինյանին։

- Եթե սխալներ լինեն, անպայման կքննադատենք, Փաշինյանին էլ կքննադատենք, մնացածին էլ կքննադատենք, բայց մենք դրա համար չենք ստեղծում էս կուսակցությունը, ստեղծում ենք, որ մեր գաղափարները, ծրագրերը հասարակությանը ներկայացնենք, եւ, բնականաբար, որոնք չեն համապատասխանում մեր գաղափարներին, կքննադատենք։ Ե՛վ էսօրվա իշխանություններին, ե՛ւ անցած իշխանություններին, բնականաբար, քննադատելու բան կա, եւ կքննադատենք։

- Ի՞նչ է նշանակում՝ «եթե սխալներ լինեն», դեռ չկա՞ն սխալներ այս իշխանությունների կողմից։

- Իհարկե, կան։

- Իսկ ինչո՞ւ չեք քննադատում։

- Իսկ ո՞վ է ասում, թե չենք քննադատում։ Նախ՝ հիմա հրապարակային հարցազրույցներ շատ քիչ ենք տալիս, բայց եղել են դեպքեր, եւ կոնկրետ ես ասել եմ, որ էսօրվա իշխանություններն էն ամենասկզբում շատ լավ գաղափարներ, շատ լավ ծրագրեր ունեին՝  պայքար կոռուպցիայի դեմ, արդարություն եւ այլն։ Եվ ես, լինելով ՀՀԿ խորհրդի անդամ, ողջունել եմ էդ ամեն ինչը, որ եթե իրոք էդ ամեն ինչն իրականանալի է, գնանք կանգնենք էդ մարդու կողքին, բայց դա չիրականացավ, ուշացավ, ասվեց՝ չարվեց։ Դրանք ունեն ե՛ւ օբյեկտիվ, ե՛ւ սուբյեկտիվ պատճառներ։ Էդ ամենի մասին կոնկրետ ես ասել եմ իմ անունից, որովհետեւ դեռ կուսակցությունը չկար։ Հիմա, եթե կուսակցությունն էլ գրանցվի, բնականաբար, արդեն էդ նույն բաները կասենք կուսակցության անունից։ Մենք քննադատել ենք նաեւ հին իշխանություններին։ Լինելով այդ կուսակցության խորհրդի անդամը՝  նաեւ քննադատաբար, ինքնաքննադատաբար նույնիսկ մեր հավաքի ժամանակ վեր ենք կացել ու արտահայտվել ենք, որ, գիտե՞ք ինչ կա, պարոն ղեկավարներ, Սերժ Սարգսյան, Ձեր առաջին ելույթում՝ տասը տարի առաջ, ասել եք՝ պայքարել կոռուպցիայի դեմ, մյուսի դեմ, բայց էդպիսի բաներ չեղան։ 

- Բայց Ձեր նշած նախկինները երկիրը չէին հանձնել թուրքին, դավաճանության մեջ չէին մեղադրվում, նրանց օրոք հազարավոր զոհեր չունեինք։

- Ասեմ Ձեզ, հիմա կոնկրետ ինձ համար անհասկանալի է էդ փոխադարձ դավաճան անվանելը։ Հասարակությանն էլ, շատերին անհասկանալի է։

- Կարծում եք՝ դավաճանություն չի՞ եղել, պարտությունը բնակա՞ն ճանապարհով է տեղի ունեցել։

- Ես չեմ կարող կարծել այդպես՝ գիտե՞ք ինչու, որովհետեւ հասարակության համար անհասկանալի հարցեր կան, ու էդ օրվա իշխանություններն առաջին հերթին պարտավոր են էդ հարցերին կա՛մ պատասխանել ու հիմնավորել, կա՛մ հերքել։ Քանի հասարակությունը չի ստացել էդ հարցերի պատասխանները, էս ընտրությունների արդյունքն էլ չի լինի էն, որը մենք ուզում ենք։