Իշխող ուժը պետք է միջոցներ ձեռք առնի, որ էդ մարդիկ մենակ կարտոֆիլ չուտեն

Հարցազրույց ԱԺ Հանրապետական խմբակցության նախկին պատգամավոր **Գարեգին Նուշիկյանի** հետ։



**- Պարոն Նուշիկյան, ՀՀԿ-ի ցուցակում չհայտնվելուց հետո հայտարարեցիք, որ մնալու եք քաղաքականության մեջ, ՀՀԿ-ի հետ համագործակցությունը շարունակելու եք, տնտեսական հանձնաժողովի հետ չեք խզելու կապը, հիմա Ձեր գնահատականն ենք ուզում լսել 2018-ի բյուջեի նախագծի մասին, որն աշխատավարձերի, կենսաթոշակների բարձրացում չի նախատեսում։**



- Կառավարությունը ելնելով իրողություններից է բյուջեի նախագիծը ներկայացրել, պոպուլիստական բյուջե չէ, իհարկե, շատ ավելի ցանկալի կլիներ, որ աշխատավարձեր, թոշակներ բարձրանային, բայց մեր իրականությունն այնպիսին է, ինչպիսին որ կա։



**- Ինչպե՞ս պետք է ապրի միջին վիճակագրական քաղաքացին, որի ո՛չ աշխատավարձն է բարձրանում, ո՛չ թոշակը, բայց փոխարենը թանկացումների ալիք է բարձրանում։**



- Շատ վատ է, ես հետեւում եմ հրապարակումներին, բայց, ճիշտն ասած, խանութ չեմ հաճախում, չգիտեմ ինչ թանկացումներ են, բայց եթե մամուլը գրում է, ուրեմն այդպես է։ Կան օբյեկտիվ ու սուբյեկտիվ մեկնաբանություններ՝ այդ թանկացումների հետ կապված, բայց կարծում եմ, որ կառավարությունն ինչ-որ քայլեր պետք է ձեռնարկի, զսպի թանկացումների բումը։ Միշտ էլ Նոր տարվա նախաշեմին թանկացումներ լինում են, բայց չափը չեմ կարող ասել՝ ա՞յս տարի է ավելի շատ, թե՞ նախորդ։ Կառավարությունը, Շաբոյանի կազմակերպությունը պետք է միջամտեն, մենաշնորհների, գերիշխող դիրքի հետ կապված խնդիրներ կան, անպայման պետք է միջամտել, որպեսզի զսպեն գնաճը։



**- Դատելով ՀՀԿ-ական իշխանավորների հայտնած մտքերից, որ թանկացումներն աղքատ խավին չեն հարվածում, քանի որ աղքատը գնում է էժան ապրանքներ եւ ուտում է կարտոֆիլ, իսկ թանկանում են միսը, կարագը եւ այլ թանկ մթերքներ, կառավարությունը միջամտություն կցուցաբերի՞։**



- Դե, նայած ինչ արտադրատեսակն է թանկացել։ Դուք երեւի Հակոբյանի հայտարարությունը նկատի ունեք։



**- Ոչ միայն, նաեւ Խոսրով Հարությունյանը՝ տնտեսական հանձնաժողովի նախագահը, մոտավորապես ասում է, թե նրանք, ովքեր հիմնականում կարտոֆիլ են ուտում, թող չնեղվեն այս թանկացումներից, դա իրենց չի վերաբերում։**



- Դե, իհարկե, ես չեմ կիսում այդ տեսակետները։ Իշխող ուժը պետք է միջոցներ ձեռք առնի, որ էդ մարդիկ մենակ կարտոֆիլ չուտեն։ Ես համոզված եմ, որ իրենք ուրիշ բան նկատի ունենալով են երեւի դա ասել, դա չեն ասել այնպես, ինչպես մեկնաբանություններն են մամուլում։ Աղքատներին վիրավորելու բացարձակ խնդիր ես չեմ տեսնում։



**- Իսկ ի՞նչ են նկատի ունեցել այդ դեպքում։**



- Ես չգիտեմ, իրենց հետ չեմ խոսել, ուղղակի իրենց ճանաչելով, իրենց հետ երկար տարիներ աշխատելով գիտեմ, որ այդպիսի մոտեցում ընդհանրապես չունեն ո՛չ այդ հարցի, ո՛չ աղքատության հարցի հետ կապված։ Ուղղակի ուրիշ բան են ուզել ասել, ուրիշ բան է ստացվել։ Ես անպայման այսօր կխոսեմ իրենց հետ, բայց մի բան վստահ կարող եմ ասել, որ այդ մարդիկ նման էություն չունեն։



**- Փաստն այն է, որ նման մարդկանցից ձեւավորված իշխանության պայմաններում Հայաստանում աղքատության ցուցանիշը մոտ 30 տոկոս է, եթե մի քիչ մտածեին ժողովրդի մասին, գուցե այլ պատկեր լիներ, սա իրենց վարած քաղաքականության արդյունքն է, չէ՞։**



- Ես Ձեզ հետ համաձայն եմ, ուղղակի թող ժողովուրդը, հասարակությունը այդ գնահատականը տան ընտրությունների միջոցով… ի՞նչ ասեմ։ 30 տոկոս աղքատություն է, բայց ձայների մեծամասնություն են տանում։ Ուրեմն մեր երկրում ինչ-որ բան այնպես չէ։



**- Իսկ Դուք համաձա՞յն եք Նիկոլ Փաշինյանի հետ, նա իր վերջին ելույթում ասաց, որ այս իշխանությունները միտումնավոր են նման քաղաքականություն վարում, որ աղքատների թիվը չնվազի, որովհետեւ այդ խավին հեշտ է 10 հազար դրամով ընտրությունների տանել, եթե ժողովուրդը հարստացավ, ապա ՀՀԿ-ի վերարտադրությունը կդժվարանա։**



- Ես, իհարկե, համաձայն չեմ, որովհետեւ իշխանության մեջ բոլորի նման մարդիկ են, որոնք ինչ-ինչ բաներով եկել են իշխանության, նախկինում ուրիշ մարդիկ են եղել… Բոլորն էլ սրտացավ են, մտահոգ են իրենց երկրի համար, որովհետեւ, վերջին հաշվով, այդ 30 տոկոսը նաեւ իրենց շրջապատն էլ է, չէ՞, իրենց շրջապատից էլ են այդ խավի մեջ մտնում։ Մտահոգ են, ինչ խոսք, ուղղակի շատ ու շատ հանգամանքներ կան, բայց հիմա ունենք այն, ինչ ունենք։ Վերջին հաշվով, պիտի կրկնեմ, որ այդ ամենը ձեւավորվում է ընտրությունների միջոցով։ Լավ է, վատ է՝ սա է։



**- Իսկ ինչպիսի՞ն է Ձեր գնահատականը նոր խորհրդարանի մասին։**



- Կոռեկտ չի լինի, որ ես գնահատական հնչեցնեմ։ Թողենք, որ հասարակությունը գնահատական տա։



**- Բոլոր դեպքերում՝ կարծիքներ կան, որ այն որակապես տարբերվում է նախորդից։**



- Ես կարող եմ ասել, որ նախորդն ավելի ակտիվ էր թեկուզ ընդդիմության տեսանկյունից, ընդդիմությունն ավելի ակտիվ էր, չգիտեմ, բայց երեւի նախորդն ավելի արդյունավետ էր, ավելի հետաքրքիր։



**- Վերջին շրջանում Հայաստանում հյուրանոցների կառուցման բումը Դուք ինչպե՞ս կբացատրեք, հասել են արդեն պետական գերատեսչությունների շենքերին, տնտեսական զարգացման եւ ներդրումների, տրանսպորտի նախարարությունների շենքերն են արդեն վաճառվում:**



- Դե, դրսի մարդիկ ներդրումներ չեն անում, տեղացիներն են առաջին հերթին անում, որպեսզի դրսինն էլ տեսնի, որ տեղացիներն իրենց երկրի ապագայի հանդեպ ունեն վստահություն, ներդրումներ են անում, որպեսզի իրենք էլ գան, ներդրումներ անեն։ Հիմա եթե նայենք, թե երկրի զարգացման ինչ ուղղություններ ունենք, ապա ամենակարեւորներից մեկը տուրիզմն է, իսկ տուրիզմի համար, բնականաբար, ենթակառուցվածքներ են հարկավոր։ Հարեւան Վրաստանն այս տարվա կտրվածքով մոտ 7 միլիոն տուրիստ է ընդունել, մոտ մեր բյուջեի չափ եկամուտ է ունեցել այդ տուրիզմից։ Տուրիզմի աճ ունենք, բնականաբար՝ հյուրանոցների պահանջ, կարող ենք ասել, որ կամաց-կամաց զարգանում է։ Բոլոր ուղղություններով պետք է զարգացում ապահովենք։



**- Մոտ մեկ տարի առաջ ներդրողների ակումբ ձեւավորվեց, 30-ից ավելի գործարարներ հավաքվեցին այդ ակումբում, խոստացան ներդրումներ անել, սակայն մինչ օրս մենակ Սամվել Կարապետյանն է ներդրումների մասին հայտարարել։ Չնայած վստահեցումներին, թե նպաստավոր պայմաններ են ստեղծվել, բայց այլ ներդրումների մասին չենք լսում։**



- Ես չեմ կարող ասել՝ արդյոք խուսափում են, թե չեն խուսափում կամ ինչու են խուսափում, որովհետեւ ծանոթ չեմ այդ ակումբին։



**- Կարեն Կարապետյանի պաշտոնավարման ժամկետում ի՞նչ փոփոխություններ եք նկատել, նա, ստանձնելով այդ պաշտոնը, գեղեցիկ խոստումներ էր տալիս դաշտն ազատականացնելու եւ այլնի մասին, հաջողվո՞ւմ է կյանքի կոչել դրանք։ Ինչո՞վ է նա նախորդներից տարբերվում։**



- Ես, ճիշտն ասած, գեղեցիկ խոստումներ չեմ լսել, ներկայիս վարչապետը շատ իրատեսական առաջին օրը տնտեսության վիճակը ծանր գնահատեց։ Համենայնդեպս տեսանելի է, որ ամեն ինչ արվում է, որպեսզի երկիրն այս վիճակից դուրս հանվի։ Թե ինչքանով է ստացվում, ինչքանով՝ ոչ, արդեն երկրորդ հարցն է։



**- Ստացվո՞ւմ է, թե՞ ոչ, որտե՞ղ է տեսանելի, որ գործ է արվում, կա՞ առաջընթաց։**



- Մեկը, ինչպես Դուք նշեցիք, հյուրանոցների կառուցման բումը, արդեն իսկ փոփոխություն է։ Գիտեք, մեր գլխին միանգամից մանանա չի թափվի։ Վերջին հաշվով, Ձեր հարցի ենթատեքստն էլ… շատ է քննարկվում ապրիլի հարցը, երեւի սպասում են տեսնեն, թե ինչպես է լուծվում։ Ցանկացած ընտրություններից մոտ մեկ տարի առաջ տնտեսության հետ կապված որոշակի դժվարություններ են սկսում տեղի ունենալ, այդ սպասումները եւ այլն, եւ այլն։ Հիմա ապրիլն էլ մի ընտրության պես բան է։ Ապրիլից հետո կարծում եմ, որ ավելի արագ տեմպերով փոփոխություններին ականատես կլինենք։



**- Իսկ Դուք ինչպե՞ս եք պատկերացնում «Կարեն Կարապետյան, թե Սերժ Սարգսյան» դիլեմայի լուծումը։**



- Պարույր Սեւակն է, չէ՞, ասել․ «Ինչ լինում է, թող որ շուտ լինի»։



**- Թող որ լինի միանգամից... բայց Դուք համաձա՞յն եք ՀՀԿ-ականների հետ, որ Սերժ Սարգսյանն անվտանգության երաշխավորության առումով անփոխարինելի է, հետեւաբար՝ նա էլ պետք է ստանձնի երկրի ղեկավարումը։**



- Խոսքը գնում է վարչապետի՞ պաշտոնի մասին, թե՞ ՀՀԿ-կուսակցության ղեկավար պաշտոնի մասին։ Նոր Սահմանադրությամբ վարչապետը ե՛ւ տնտեսության պատասխանատուն է, ե՛ւ անվտանգության, եւ այլն, եւ այլն։ Հիմա ո՞րն է ավելի կարեւոր․ իմ կարծիքով՝ ե՛ւ տնտեսությունը, ե՛ւ անվտանգությունը, բայց ավելի կարեւոր է երեւի անվտանգությունը։ Որովհետեւ տնտեսությունը կամաց-կամաց կգնա, եւ այնպես չէ, որ դեպի վատն ենք գնում, ժամանակի հարց է։ Անվտանգության առումով, այո, Սերժ Սարգսյանը տիրապետում է ամեն ինչին։ Նա գալիս է ակունքներից։ Իսկ եթե խոսքը տնտեսությանն է վերաբերում, բնական է, որ Կարեն Կարապետյանն ավելի լավ մենեջեր է, ղեկավար, ավելի լավ է պատկերացնում տնտեսությունը։

Հանրապետականը, Ձեր ասած մարդիկ միասին կնստեն, կորոշեն, միգուցե, ինչպես մամուլն է գրում, Սերժ Սարգսյանը դառնա վարչապետ անվտանգության, արտաքին հարաբերությունները կարգավորող, Կարեն Կարապետյանն էլ՝ փոխվարչապետ՝ տնտեսությունը ղեկավարող։ Սա շատ արդյունավետ բաժանում կլինի։



**- Բրյուսելում նոյեմբերի 24-ին Հայաստանը շրջանակային համաձայնագրին միացավ, կարծում եք դա «եւ-եւ»-ի քաղաքականության իրագործո՞ւմ էր, թե՞ սա բոլորովին այլ փաստաթուղթ է, քան տարիներ առաջ մեզ առաջարկվող ասոցացումը։**



- Տարիներ առաջ այլ փաստաթուղթ էր, որ ստորագրեց Վրաստանը, եւ այսօր արդյունքներն ակնհայտ են, բայց այսօրվա փաստաթուղթը, կարծում եմ, ժամանակի ընթացքում կվերածվի հենց Վրաստանի ստորագրած փաստաթղթին։



**- Իսկ ճի՞շտ որոշում էր՝ մերժել «Ելքի» առաջարկը ԵԱՏՄ-ից դուրս գալու գործընթաց սկսելու վերաբերյալ։**



- Մենք գտնվում ենք այնպիսի վիճակում, եւ աշխարհն էլ այնպիսի վիճակում է, որ մեզ սուր, կտրուկ քայլեր ձեռնտու չեն, դա կլինի ԵԱՏՄ, թե ուրիշ հարց։ Որովհետեւ տարածաշրջանն այնքան փխրուն է, փխրուն են հարաբերությունները՝ Թուրքիա, Իրան, Ադրբեջան, Իսրայել եւ այլն, այնքան պրոբլեմներ կան, որ կտրուկ քայլի գնալու կարիքը չկա։



**- Պարոն Նուշիկյան, ապագայում քաղաքականություն վերադառնալու ցանկություն ունե՞ք, համենայնդեպս, ամիսներ եք ունեցել այդ մասին ծանրութեթեւ անելու։**



- Նախ ասեմ, որ ծանրութեթեւ անելը մինչեւ այդ քանի ամիսն է եղել։ Ես ուղղակի ինձ ավելի արդյունավետ եւ օգտակար՝ թե՛ երկրի, թե՛ հասարակության համար, տեսնում եմ տնտեսության մեջ։ Ես տնտեսության մեջ ավելի օգուտ կարող եմ բերել, քան քաղաքականության մեջ։ Հիմա կոնկրետ աշխատում եմ որոշակի ծրագրի վրա, որը մեր երկրի, մեր քաղաքի եւ, ընդհանրապես՝ աշխատատեղերի հետ կապված շատ կարեւոր է։ Կարճ ժամանակ հետո, կարծում եմ, ես ավելի բովանդակային կներկայացնեմ այդ ծրագիրը։



**- Նոր բիզնե՞ս եք հիմնում։**



- Կարելի է այդպես ասել։ Ներդրումային ծրագիր է, որի իրականացմանը կառավարությունն ամեն ինչով փորձում է աջակցություն ցուցաբերել։ Երբ հասունանա, անպայման կներկայացնեմ։



**Լուսինե ՇԱՀՎԵՐԴՅԱՆ**